{idkey=2394b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2831-gabinete-me-ii-ta-premira-cu-mfa-paradera-ta-den-operacion-e-ultimo-kwartal-di-2016%3FItemid%3D101][title=Gabinete+ME+II%3A+Ta+premira+cu+MFA+Paradera+ta+den+operacion+e+ultimo+kwartal+di+2016][desc=Prome+Minister+di+bishita+na+sitio+di+contruccion%26amp%3Bnbsp%3BORANJESTAD+%E2%80%93+Mientras+MFA+Noord+ta+cumpliendo+excelentemente+cu+e+expectivanan+pa+cual+el+a+wordo+construi%2C+Gabinete+Mike+Eman+ta+contento+di+por+anuncia+cu+no+solamente+%26amp%3Bnbsp%3Be+proyectonan+di+e+otro+MFAnan+rond+di+Aruba+ta+canando+satisfactoriamente+nan+caminda+di+desaroyo%2C+pero+tambe+ta+trahando+riba+e+posibilidad+pa+a%C3%B1adi+un+Facilidad+Multifuncional+mas+na+e+lista+cu+ta+inclui+Paradera%2C+Santa+Cruz%2C+Savaneta+y+San+Nicolas.+Prome+Ministe]}
Prome Minister di bishita na sitio di contruccion 

ORANJESTAD – Mientras MFA Noord ta cumpliendo excelentemente cu e expectivanan pa cual el a wordo construi, Gabinete Mike Eman ta contento di por anuncia cu no solamente  e proyectonan di e otro MFAnan rond di Aruba ta canando satisfactoriamente nan caminda di desaroyo, pero tambe ta trahando riba e posibilidad pa añadi un Facilidad Multifuncional mas na e lista cu ta inclui Paradera, Santa Cruz, Savaneta y San Nicolas. Prome Minister Mike Eman tabata contento di por comparti e informacion aki diabierna merdia ora cu el a bishita construccion di MFA Paradera cu ta pronostica pa keda cla den luna di juli y pa cuminsa opera den ultimo kwartaal di 2016.

Minister President ta conoci pa sigui di cerca e proyectonan di su Gabinete y personalmente e ta bay na e luga di trabou pa haya presentacion di e ultimo desaroyonan. Na Paradera el a haya splicacion di arkitecto, ir. Joel Croes, como tambe di representante di Thiel Corporation. Hefe di Hulpbestuurskantoor Carina Croes y directiva di MFA tambe tabata presente. E prome mandatario ta pone atencion na tur detaye y ta haci su preguntanan skerpi, na unda ta necesario. Afortunadamente den e caso di MFA, tur cos ta bayendo segun plan y e expectativanan ta hopi positivo.

Tambe Premier Eman a combersda cu e trahadonan pa gradici nan personalmente pa nan contribucion y sigura cu nan ta den un bon ambiente di trabou. Tur esnan involucra ta haciendo nan parti, sea ta den construccion of preparacionnan pa fasenan futuro den su interior. Un ehempel ta Sra. Carina Croes mes kende a conta cu ya caba su departamento a cuminsa hinca cosnan den caha. E motibo ta cu nan ta hopi entusiasma pa muda pa e edificio nobo, pa asina por ofrece un miho servicio y por traha, den un miho ambiente.

Y nan no ta e unico.  Sin habri, e edificio multifuncional na Paradera ya caba ta kedando sin espacio. Otro departamento y instancianan priva ta den combersacion pa muda e MFA mas nobo. Ya caba por menciona Departamento di Asuntonan Social, practica di dokter di cas y tambe un oficina di psicologo. Fuera di e servicionan, tambe lo bin sala di estudio y cafetaria den un diseño moderno, pero ahusta na e deseo di e pueblo di Paradera. Esaki ta danki na e consulta y encuesta cu Gabinete Mike Eman a haci cu ciudadanonan di e bario for di prome instante.

Expresionnan haci den e articulo aki no necesariamente ta refleha opinion di ArenaPoliti.co