{idkey=3095b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2923-partido-abo-chichi-ta-puntr-abo-4%3FItemid%3D101][title=Partido+ABO%3A+Chichi+ta+puntr%26%23039%3Babo...][desc=Arubiano+orguyoso+di+su+himno+y+bandera+ta+para+su+auto+riba+linear+park+pa+no+tin+cu+cana+mucho+pa+atende+e+festival.+Anto+polis+no+a+haci+nada.+Ta+asina+ta+actua+consecuente%3F+Esey+kiermen+cu+Buchi+tambe+por+para+unda+cu+e+kier+y+no+por+dun%E2%80%99e+boet.+Educacion+ta+keda+esencial+pa+un+pueblo%2C+den+e+caso+aki+specialmente+pa+chauffeurnan+%26%23039%3Borguyoso%26%23039%3B+cu+rijbewijs+di+%26%23039%3Bcracker+jack%26%23039%3B.+Parlamentario+Marlon+Sneek+ta+trahando+duro+riba+e+ley+pa+prohibi+humamento+di+sigaria+etc.+den+luganan+publico.+Chichi+]}
Arubiano orguyoso di su himno y bandera ta para su auto riba linear park pa no tin cu cana mucho pa atende e festival. Anto polis no a haci nada. Ta asina ta actua consecuente? Esey kiermen cu Buchi tambe por para unda cu e kier y no por dun’e boet. Educacion ta keda esencial pa un pueblo, den e caso aki specialmente pa chauffeurnan 'orguyoso' cu rijbewijs di 'cracker jack'.

Parlamentario Marlon Sneek ta trahando duro riba e ley pa prohibi humamento di sigaria etc. den luganan publico. Chichi ta kere cu sr. Sneek tambe MESTER inclui y traha riba e autonan di diesel cu ta saca huma preto. Ta ridiculo cu den un luga publico supuestamente ta proteha salud di publico, anto na momento cu e sali pafo e ta haña su mes confronta cu huma preto di diesel, holo di gasolin, insecticida y dios sa cuanto otro elementonan mas cu ta dañino pa salud di hende.

Segun Union Europeo atrobe tin un crisis mundial na caminda cu lo ta pio cu esun di 2008. Cu e debe enorme cu Aruba tin, ta con nos isla ta bay haci si ya caba cos ta preta. Talbes e yegada di La Niña den e siguiente añanan por trece solucion?

Cada dia cu pasa ta mas dificil pa Chichi kere cu e refineria ta bay habri. Y mescos cu Chichi, Camara di Comercio tambe tin su dudanan. Nan tambe ta bisa cu ta un man di Arubiano so lo haya trabou eyden y kere mi cu den nan Buchi mi casa no lo ta.

Den opinion di Chichi, Aruba a yega e ‘pik’ di su Status Aparte: 30 aña di...NADA! Tabata di spera cu despues di 30 aña e isla aki lo ta un Dubai chikito. Pero ta net lo contrario. No tin structura riba ningun nivel, niun caminda. Aruba a keda e mesun ‘isla inutil’ mescos cu tempo el a wordo ‘descubri’. E soño di e Arubiano a comberti su mes den un pesadia.

Aunke mester bisa cu e 'trabou' a wordo 'bon' haci. Den menos di 8 aña, dos mandato sigui, pais Aruba a wordo reduci na nada dor di e debe grandi den cual a hinca e pais. Poco poco a introduci ciudadanonan Hulandes den posicionnan clave na diferente institucionnan Arubiano. Aruba ta bibando un tipo di ‘deja vu’ cu hopi no ta realisa.

Si no tin con pa paga e debe biyonario (corda cu ta via Hulanda so por fia placa), no tin trabou pa e Arubiano, kico ta bay pasa anto? Pa 1 aña Aruba ta presidi e organisacion OCTA (Overseas Countries and Territories Association) y pais Hulanda ta presidi Union Europeo pa 6 luna. Esaki lo ta un bon momento pa cambia Aruba su status di LGO pa UPG djis pa gobierno haña placa fia pa sigui gasta riba proyectonan miyonario, creciendo ainda mas e debe biyonario. Ahng si...y no lubida cu tur esaki ta wordo haci, no pa Aruba bay dilanti, pero pa e paisnan di Union Europeo progresa segun UPG su status... Chichi ta puntra si esaki lo pasa sin aprobacion di pueblo???

Riba su mes, nada ta cambia. E mesun situacion di 300 aña di colonisacion Hulandes lo sigui prevalece. Den practica esaki lo nifica cu e generacionnan cu ta sigui despues lo tin di traha un 'tiki' mas duro. E diferencia ta cu den e caso di tin e status di UPG lo tin mas cu un 'bomba' para cla pa suta ora no ta obra na gusto di e 'shonnan.

E 'soño' Americano di e Arubiano definitivamente lo pasa pa historia. Ta 'klinkers' so lo keda pa conta historia 'grandioso' di un pueblo orguyoso descendiente di indjannan manso cu a entrega nan oro pa cralchi di plastic 'made in china'..

Educacion di un pueblo, di chikito te grandi, ta esencial pa evita cu e ta tuma decisionnan robes of ta laga hende robes tuma decision nefasto pa su bienestar. Informacion mester ta na alcance di tur hende y di forma transparente. 'Ainda falta'... nos pueblo falta hopi educacion ainda y te awe ningun gobierno a percura pa esaki pa no perde e control di e masa... Dushi Aruba, lanta for di soño y caba cu e pesadia aki!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co