{idkey=3857b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2964-jan-de-ruijter-nos-turismo-e-consecuencianan-di-e-maneho-desastroso-den-nos-industria-turistico%3FItemid%3D101][title=Jan+de+Ruijter%3A+Nos+turismo%3A+e+consecuencianan+di+e+maneho+desastroso+den+nos+industria+turistico][desc=E+periodo+cu+pa+loke+ta+trata+e+industria+turistico+riba+Aruba+ta+wordo+considera+e+asina+yama+%E2%80%9Chigh+season%E2%80%9D+%28temporada+halto%29%2C+ya+caba+ta+casi+pertenece+na+pasado.+E+pregunta+ta%3A+ta+di+ki+temporada+halto+nos+ta+papia%3F%21Aki+na+Aruba+casi+nos+no+por+papia+di+un+%E2%80%9Chigh+season%E2%80%9D+den+turismo%2C+cu+manera+a+bisa+caba%2C+pa+colmo+ya+casi+a+pasa+pa+historia.+Nos+ta+den+yega+luna+di+april%2C+y+e+ora+ey+e+hotelnan+lo+ta+bashi+atrobe.Durante+e+temporada+%E2%80%9Chalto%E2%80%9D+actual+e+porcentahe+di+ocupacion+%28%E2%80%9Coccu]}
E periodo cu pa loke ta trata e industria turistico riba Aruba ta wordo considera e asina yama “high season” (temporada halto), ya caba ta casi pertenece na pasado. E pregunta ta: ta di ki temporada halto nos ta papia?!
Aki na Aruba casi nos no por papia di un “high season” den turismo, cu manera a bisa caba, pa colmo ya casi a pasa pa historia.
Nos ta den yega luna di april, y e ora ey e hotelnan lo ta bashi atrobe.
Durante e temporada “halto” actual e porcentahe di ocupacion (“occupancy”) di e hotelnan ta desastrosamente abou, mientras 33 % di e viaheronan rumbo Aruba – cu tanto minister O.O. como ATA eroneamente ta yama “turista” - ta hospeda den acomodacionnan alternativo manera cabañanan (hutnan) chicito y palapanan.  
Den dos palabra: un maneho escandaloso! Di e ministernan Arthur Dowers, Paulus Croes y Otmar Oduber, pero tambe di FTA!!!

E Casino Aura den Hotel Occidental.
Tanto gobierno, como ministernan Dowers, Croes, y Oduber, y Hubert Dirksz di FTA seriamente ta kere cu net na comienzo di e temporada ABAO (LOW season) e casino Aura lo bay habri atrobe, y pa colmo cu e dealernan kendenan ya pa 3 luna ta canando rond sin ricibi pago di salario??
Ban ta serio; no gaña hende cu e cos aki, pasobra esey nunca lo bay pasa.
Lo ta mihor pa gobierno admiti cu no ta interesanan ningun bledo cu ta no menos cu 44 famia cu no tin un entrada mas.
Pasobra, no ta asina toch cu no a importa e gobierno ningun bledo, ora cu na aña 2009 tabatin 350 empleado para riba caya dilanti di Hotel Tropicana & Casino, y 450 empleado dilanti di Westin Hotel??
Y awor bo kier pone hende kere cu e 44 personanan aki lo bay haya nan trabao back? A no ser cu nan ta bay acepta un salario hopi mas abao; pero na final nan lo djis haya un pakete pa “donder op”!
Y tur esaki, danki na e ministernan Dowers, Croes y Oduber, pero danki tambe na e presidente di FTA, kende mester tin un alianza secreto cu AVP.
Aki tambe, ki un maneho escandaloso!!

Departamento Hygienico ta sera algun restaurant.
By now bo mester conoce mi punto di bista: e minister di turismo ta responsabel pa TUR locual tin di haci cu turismo, pues pa “masterplanning”, transporte internacional y nacional/local, hotelnan, restaurantnan, entretenimiento, tienda- y pacusnan, eventonan special, promocion y mercadeo, preparacion- y cursonan,  calidad, permisonan, producto y servicio, etc., etc.
Pues tambe pa e calidad di restaurantnan; p’esey ta un berguenza cu cada biaha di nobo ta sera restaurantnan pa solamente algun dia, pa motibo di bestianan indesea (ongedierte), cacalaca, djaca, pushi, cacho, permitiendo di e manera aki cu hende ta burla di nos salud, y di e turistanan tambe.
Aruba tin mester di un maneho hopi severo y duro, cu multanan halto, y un sistema di 3 strikes y bo ta OUT, y ayo permiso!!
Esey lo siña hende pa no haci cos vies cu nos cuminda; y ta un berguenza y un scandal cu Otnar Oduber no ta tuma ningun responsabilidad pa cu esaki! Aki atrobe: ki un maneho escandaloso!

E presupuesto pa turismo di ATA.
Minister Oduber ta canta victoria y ta alega cu danki na su persona, O.O., ATA por a regala y hinca 22miyon florin den caha di Pais Aruba, y cu ainda e por a wanta otro 18 miyon como reserva, comosifuera cu eseynan ta tremendo logronan di su persona!
E manipulador aki no ta bisa acerca cu prome cu ATA sui generis a ser privatisa,ta 100% di e logeerbelasting tabata bay den e caha di Pais Aruba, y esey ta hopi mas cu e 22 miyon cu Otnar ta hinca aden awor aki!
E impuestonan awor aki ta bay directamente riba e cuenta di banco di ATA, di manera cu O.O. por dispone di esakinan completamente y manera cu e ta haya ta bon, sin cu Parlamento tin nada di bisa den e asunto ey!!
Pais Aruba cada aña atrobe mester wak con pa yena e buraco grandi aki ocasiona pa e hecho cu e entradanan na “logeerbelasting” a cay afo!
Y, Otnar pa keda broma cu ela regala Pais Aruba e suma di 22miyon florin!
Ki un manipulacion! Ki un manipulador! Ki un maneho escandaloso di turismo!

Huurmento ilegal.
Casnan, apartamentonan y condominionan cu ta ser gehuur ilegalmente, no ta paga nada na impuestonan di turismo; pero sí nan ta paga “erfpacht”, pero a base di e tarifa di un cas, pues 300 florin na lugar di 19.000 florin pa erfpacht comercial.
Un maneho escandaloso, sin mas!
Doñonan di casnan, apartamentonan y condominionan, cu ta wordo gehuur na turista, mester paga “roomtax”, paga e “erfpachtscanon” corecto, y mester cumpli cu exigencianan halto di calidad, esaki pa proteccion di e turistanan y e industria turistico.
Cu esaki no ta socede, ta maneho escandaloso!!

Hotelnan all-inclusive.
Otnar, bo no por regla esaki mas; bo ta mucho laat p’esey.
Si bo a traha cu un “masterplanning” oficial, lo bo por a indica eyden na unda por a establece hotelnan all-inclusive. Awor ta mucho laat; bo no por bay bisa ningun doño di hotel awor, con nan mag, of no, mercadea y promove nan hotel.
Hotelnan semper a bende “all-inclusive plans” bao di e nomber “FAP-plan”, esta e “Full American Plan”, locual ta e prijs di camber cu ta inclui full desayuno, almuerso y cena.
Bo no por obliga un doño of un operador di hotel, CON e mester bay yena su cambernan, y t’asina cu e demanda mundial di turistanan ta pa vacacionnan cu prijsnan all-inclusive, pues esey ta e “trend” mundialmente. Locual mester a sosode, ta mediante “masterplanning”. Door di, den cada region, duna espacio pa hotelnan all-inclusive, y banda di esey pa otro tipo di hotel.
Awor Otnar ta mucho laat; esaki ta otro prueba di e maneho cu ta mas cu escandalosamente malo.

Oranjestad, maart 13, 2016
Jan de Ruijter
This email address is being protected from spambots. You need JavaScript enabled to view it.

Expresionnan haci den e articulo aki no necesariamente ta refleha opinion di ArenaPoliti.co