{idkey=2053b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3000-partido-abo-fiesta-y-show-e-droga-pa-pone-pueblo-lubida-y-bira-un-esclavo-moderno%3FItemid%3D101][title=Partido+ABO%3A+Fiesta+y+show.+E+droga+pa+pone+pueblo+lubida+y+bira+un+%E2%80%98esclavo+moderno%E2%80%99][desc=Den+literatura+mundial+riba+e+tema+di+economia+y+politica%2C+un+pais+cu+un+sistema+democratico+debil+ta+wordo+caracterisa+manera+un+pais+cu+conoce+un+fanatismo+politico+halto%2C+hopi+faboritismo+y+un+nivel+structural+di+corupcion+halto.+E+sistema+democratico+deficiente+aki%2C+ta+wordo+alimenta+cu+hopi+fiesta+y+show%2C+pa+mantene+e+clase+politico+tradicional+na+poder.+E+arma+politico+di+fiesta+y+show+ta+hopi+efectivo%2C+manera+e+ta+duna+un+parti+di+e+electorado+e+falso+sintimento+cu+tur+cos+ta+bon+y+cu+e+c]}
Den literatura mundial riba e tema di economia y politica, un pais cu un sistema democratico debil ta wordo caracterisa manera un pais cu conoce un fanatismo politico halto, hopi faboritismo y un nivel structural di corupcion halto. E sistema democratico deficiente aki, ta wordo alimenta cu hopi fiesta y show, pa mantene e clase politico tradicional na poder. E arma politico di fiesta y show ta hopi efectivo, manera e ta duna un parti di e electorado e falso sintimento cu tur cos ta bon y cu e clase politico tradicional ta laga pueblo comparti den e rikesa di e pais. Lamentabel esaki ta leu for di e berdad. En realidad e arma di fiesta y show ta sirbi pa cubri e situacion desastroso real di e pais. Ironia di bida ta, a pesar cu hopi hende sa esaki, nan ta prefera di sigui acepta esaki. E motibonan principal ta: miedo di persecucion politico, un vinculo directo cu e politico, un nombramento den e aparato gubernamental, a haya un pida tereno, cas social of permiso, a bira ‘miembro’ di e fan club di un politico tradicional of ’nan tambe mag di horta’. Unda e sentido comun a bay? Unda e interes general a bay? Unda e moralidad a bay?

E coronacion di cuanto balor nos Status Aparte a perde, a bini aña pasa ora Aruba a perde su autonomia financiero. A pesar cu Aruba su entrada nacional tabata crece cada aña, tur aña e debe nacional tambe a sigui crece. Den e ultimo 6 añanan hasta explosivo. Pues mas entrada, pero tambe mas debe. Algun politico tradicional ta gusta mustra riba cuanto edificio nan a verf, cuanto buraco den caya nan a yena y e ultimo añanan cuanto proyecto nan a anuncia. Pa cuminsa cu e ultimo. Ultimo añanan tabata tin algun bario cu a haya ‘klinker’, un tram miyonario cu a mata e centro comercial di Oranjestad (cu btw no tin un fin di caba), un ‘Caminda Scur’ di 750 miyon cu ta yega te Pos Chikito y un expansion biyonario di hospital unda nan a lubida e sala di operacion. Dus ban bisa  laba laba 5 proyecto den e ultimo 6 añanan: 0.83 proyecto pa aña. Pa algun hende esaki ta un logro grandi. Pero en realidad esaki ta hopi tristo. Pasobra no ta gobierno cu ta realisa e proyectonan, pero contratistanan. Dus gobierno su contribucion ‘grandi’ ta, e la firma 0.83 proyecto pa aña. Banda di esaki, ningun di e proyectonan ta wordo ehecuta pa cual nan a wordo presupuesta of cu nan ta caba na tempo. Semper tin ‘meerwerk’.

Pues den 30 aña, e clase politico tradicional a condiciona e mente di pueblo pa pensa cu gobernacion ta pa anuncia y inicia algun proyecto. A pesar cu nan a laga e electorado pensa cu mas proyecto wordo anuncia ta sinonimo cu bon gobernacion, e resultado ta keda tristo: 0.83 firma pa un proyecto den 365 dia pa un salario di minimal 20.000 florin mensual. Y no lubida, esaki ta si nos no pensa riba e gastonan ridiculo cu cada proyecto ta costa pueblo. Con porta cu pueblo ta keha tur dia riba e costo di bida halto, e insiguridad halto, e desempleo halto, e cantidad halto di migrante, corupcion halto y ainda e ta keda ciego y keto pa un sistema democratico cu no ta funciona?

Awendia e politiconan tradicional ta sigui uza pluma y logronan di estadista grandi di pasado, pa cubri nan falta di logronan. Hasta tin algun ta bezig di falsifica historia. Ta poco politico actual por bisa kico nan a contribui real na e desaroyo di e isla cu no ta un otro proyecto anuncia. Con a para cu duna contenido real na e Status Aparte? Con a para cu bon gobernacion of uno di transparencia? Con a para di duna pueblo participacion real, enbes di solamente 1 dia en 4 aña? Con a para cu sirbi interes di pueblo enbes di sirbi interes propio?

Haci pueblo un pedido di limosna, sumiso na otro nacionalidadnan y bancarota pa generacionnan largo, no ta un logro. E ta un berguensa. Ni maske cuanto proyecto a wordo anuncia, esey no por sconde cu awendia corupcion a sali for di man y a bira normal. Pero tanten cu pueblo keda adicto na e fiesta y show politico, e lo keda ciego pa e realidad amargo. Asina poco poco e futuro generacion lo lubida kico realmente e lucha di Status Aparte tabata encera, kico realmente democracia ta y kico un pueblo orguyoso ta significa.

Danki na e clase politico tradicional y su arma di fiesta y show, cu awendia Aruba ta bek na e mesun situacion di antes. Un situacion unda un grupito tin tur cos y tambe tur cos di bisa, mientras e mayoria di pueblo a bira dependiente di e grupito privilegia aki y asina un ‘esclavo moderno’.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co