{idkey=4357b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3106-mireille-sint-jago-mep-na-2015-mas-cu-30-tienda-den-caya-g-f-betico-croes-mester-a-sera-nan-porta%3FItemid%3D101][title=Mireille+Sint+Jago+%28MEP%29%3A+Na+2015+mas+cu+30+tienda+den+Caya+G.F.Betico+Croes+mester+a+sera+nan+porta%21][desc=Nos+tur+sa+cu+e+situacion+na+Aruba+ta+malo.+Nos+tur+por+wak+con+dia+pa+dia+mas+tienda+ta+sera+nan+porta+pa+semper.+Con+ton+varios+tienda+cu+no+ta+sende+airco+mas+y+laga+nan+portanan+hancho+habri+pa+logra+por+lo+menos+un+benta+pa+dia.+E+siman+aki+nos+por+a+nota+con+a+celebra+na+grandi+cu+un+tienda+di+pa%C3%B1a+di+4+piso+a+habri+su+portanan+den+Caya+G.F.+Betico+Croes.+Pero+nos+tur+sa+e+storia+di+berdad.+Cu+e+cantidad+di+negoshi+cu+ta+sera+ta+subi+mas+rapido+cu+tin+negoshi+cu+ta+habri.+Nos+tur+sa+cu+e+]}
Nos tur sa cu e situacion na Aruba ta malo. Nos tur por wak con dia pa dia mas tienda ta sera nan porta pa semper. Con ton varios tienda cu no ta sende airco mas y laga nan portanan hancho habri pa logra por lo menos un benta pa dia. E siman aki nos por a nota con a celebra na grandi cu un tienda di paña di 4 piso a habri su portanan den Caya G.F. Betico Croes. Pero nos tur sa e storia di berdad. Cu e cantidad di negoshi cu ta sera ta subi mas rapido cu tin negoshi cu ta habri. Nos tur sa cu e pintura cu Mike Eman kier pinta pa nos, ta uno di fantasia cu un Arco Iris shinishi. 

Locual nos no ta tende nada di dje, ta e dolor cu e empleadonan den Caya G.B. Betico Croes a pasa door di dje. Den un aña tin 33 tienda den Caya G.F.Betico Croes, cu mester a sera nan portanan pasobra no tin benta. Di bayna e doñonan di negoshi cu ainda tin, por sobrevivi. Mayoria di nan, nan mes mester traha den nan propio negoshi enbes di maneha e negoshi tras di cortina. Nos tur a nota con varios tienda, cu tawata existi pa decadas largo, a muri na un manera silencioso y tristo. 

Awor e pregunta ta, cuanto di e tiendanan por a florecia, si Aruba tawata gosa di un bon maneho manera den tempo di Gobernacion di MEP. Tempo cu no tawata tin tram, cu no tawata tin parkeermeter y cu BBO tawata e unico problema cu nos Rubianonan tawata tin. Placa cu tawata wordo uza pa trece prosperidad y crecemento di economia di Aruba. 

E tempo ey nos tawata resta placa ainda pa bay haci compras den Caya G.F. Betico Croes. Awor no resta ni un "yotin" den nos cartera pa nos bay gasta den  Caya. E placa awor ta wordo   gasta na un prijs di coriente sumamente halto, na Serlimar, pa nos paga demaciado hopi placa na gasolin tur luna, durante un tempo cu nunca prome den historia gasolin tawata asina barata. Ainda falta pa e Gobierno aki kita e BBO cu nan a hasta subi cu e porcentahe pa BAZV. 

Promesanan falso di AVP cu nan lo habri Valero bek, awor ta laga varios hende rabia, pasobra e Gobierno aki ta tumanan haci. "Si pa 6 aña largo mi no tin ganashi cu mi negoshi, pasobra e economia di Aruba no ta crece, mi unico opcion ta pa abandona Aruba." Asina un amigo di mi, cu tin su propio negoshi, a comparti e dolor cu e ta sinti. Mientras cu Prome Minister Mike Eman ta celebra cu un tienda a habri, tin 33 doño di trabou cu mester a manda nan trahadornan cas door di e mal maneho di AVP y wak con solo a baha pa nan negoshi. Mike Eman lo laga un y tur papia malo partido MEP y acusa lider di MEP, pero nada cu ningun di nan a yega di acusa Evelyn Wever Croes di dje a wanta den corte. 

Partido MEP a prueba den pasado caba cu nan por maneha finansas di Aruba na bienestar di pueblo di Aruba. Mientras AVP tin e 'honor' di tin un Minister di  Finansas cu a wordo manda prison! MEP a logra un sur plus y balanced budget, AVP a redobla e debe nacional den apenas 5 aña, sin cu tin return of investment. Partido MEP lo pone Aruba bek riba tur 4 pia, pasobra ora e unico direccion pa bay ta ariba!  Asina so, solo ta sali pa nos tur. Un partido cu nunca a defrauda e confiansa di su pueblo, cu nunca a entrega e autonomia di su pais y cu semper a sali na defensa di su pueblo. Aruba mester di un lider cu un curazon di un mama, un dama cu lo para banda di su pueblo manera el a para semper banda di su casa y cuida su pueblo manera e ta cuida su famia. Asina so, nos lo por crea un clima positivo bek pa negoshinan por florece y asina crea mas cupo di trabou. Pueblo sa kico pa haci, ora e momento yega pa tuma un decicion pa cu e rumbo di Aruba. Asina so solo ta sali pa nos tur. 

Expresionnan haci den e articulo aki no necesariamente ta refleha opinion di ArenaPoliti.co