{idkey=2994b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1963-booshi-wever-upp-kiko-ta-e-punto-di-discusion-introduccion-di-parkeermeternan-of-salba-comercio-den-caya-betico-croes%3FItemid%3D101][title=Booshi+Wever+%28UPP%29%3A+Kiko+ta+e+punto+di+discusion%3A+introduccion+di+parkeermeternan%2C+of+salba+comercio+den+Caya+Betico+Croes%3F+%5B%2Baudio%5D][desc=E+forma+con+politica+ta+wordo+propaganda+na+Aruba%2C+ta+laga+hopi+di+desea.+No+ta+pornada+cu+e+expresion+%E2%80%9CAruba+ta+politiek+verziekt%E2%80%9D+ta+wordo+scucha+mas+y+mas+cerca+pueblo.+No+ta+pasa+un+dia+sin+cu+nos+no+ta+wordo+bombardea+den+medionan+di+comunicacion+cu+sea+propaganda+door+di+esnan+cu+ta+na+fabor+di+e+maneho+di+gobierno%2C+y+di+otro+banda+critica+door+di+esnan+cu+ta+contra+e+gobierno.+Lamentablemente+no+ta+duna+pueblo+un+splicacion+obhetivo+di+e+embergadura+di+e+proyectonan+en+cuestion%2C+pero+]}
E forma con politica ta wordo propaganda na Aruba, ta laga hopi di desea.
No ta pornada cu e expresion “Aruba ta politiek verziekt” ta wordo scucha mas y mas cerca pueblo.
No ta pasa un dia sin cu nos no ta wordo bombardea den medionan di comunicacion cu sea propaganda door di esnan cu ta na fabor di e maneho di gobierno, y di otro banda critica door di esnan cu ta contra e gobierno. Lamentablemente no ta duna pueblo un splicacion obhetivo di e embergadura di e proyectonan en cuestion, pero ta prefera di recuri na e uso di insultonan personal of manipulacion di e opinion publico cu detayes cu por lo general no ta al caso y tin como único meta tira santo den wowo di e consumidor.

Un proyecto cu te ainda ta hala hopi atencion, ta e introduccion di e parkeermeternan.
E minister encarga cu transporte a duna un relato riba e motibonan dicon gobierno a haña necesario pa introduci parkeermeternan den centro di ciudad.
E meta, segun e minister, tabata pa sigui cu e maneho cu e gobierno di Mike Eman I a encamina na 2010 pa revitalisa centro di ciudad.
Gobierno a tuma e decision na 2009 pa haci como prioridad number uno, inverti den nos infrastructura pa asina aumenta e posibilidad pa un crecemento substancial di nos economia (groeien en niet snoeien).
A dicidi pa muda e waf di container pa Barcadera, a diseña un plan pa embeyese e area rond di waf, y tambe mehora e fluho di personanan pa caya Betico Croes pa medio di un tram.
E meta primordial tabata pa rebiba e centro di ciudad.
Caya Betico Croes a bin ta perde hopi di su encanto comercial, despues cu a permiti construccion di mall-nan grandi dilanti di e area turistico Pabou di Brug. A base di un mercadeo excepcional e ehecutivonan di e mall-nan tabata brinda e consumidor e oportunidad pa un experiencia nobo cu e posibilidad pa un parkeo facilmente accesibel y enfoca riba e famia.

Comercio den Caya Betico Croes a hala na prome instancia un suspiro di speransa ora gobierno a presenta un plan pa rebiba centro di ciudad.
Inversionnan miyonario lo mester a trece e consumidor back den e centro di ciudad, pero e realidad a resulta di ta otro. A tarda mas cu a pronostica pa haci e cambionan necesario pa e tram por a circula den e caya, y e comercio mes no a ripara un aumento di e fluho di esnan cu potencial financiero pa haci compras den e negoshinan.

Gobierno no a sinta keto y a dicidi di reintroduci un plan pa instalacion di parkeermeternan cu ya caba durante e gobierno anterior a wordo prepara pero nunca ehecuta.
Manera ta custumber caba di e gobierno actual y sigur di minister Oduber, a ignora atrobe tur conseho manera esun di Raad van Advies (igual a sosode cu introducion di ANSA), y a dal bay cu ehecucion di introduccion di parkeermeternan.
Minister Oduber recientemente a trata di hustifica esaki door di trece padilanti cu e compania encarga cu e maneho di e parkeermeternan, a indica cu a nota un aumento di e entrada despues di un start hopi floho, pero no a duna cifra cu lo por a substancia e ponencia aki. Tambe a haci mencion di e hecho cu a mehora e seguridad den centro di ciudad door di presencia di e parkeerwachternan.

Pero e intencion pa trece e tram, y introduci parkeermeternan, no tabata pa revitalisa e centro di ciudad?
Cu a mehora seguridad ta di aplaudi y cu awor e consumidor tin un chens mas grandi pa por haña un lugar cerca di parkeer, tambe ta genial, pero KIKO e resultado directo ta pa e comercio mes??
UPP por a tuma nota di un comunicado di prensa durante apertura di e aña escolar, cu e comercio den Caya Betico Croes no a ripara un aumento di entrada.
Tambe nos por a tuma nota di un relato di Camara di Comercio na unda a expresa un desapunto grandi cu tur e medidanan cu a wordo tuma pa embeyece centro di ciudad, pasobra e comerciante no por a ripara un aumento di benta.

UPP ta di opinion cu ya caba a tram y e parkeermeternan t’ey, y cu no ta bale la pena pa awor sigui dedica tanto tempo riba e materia aki.
Mas importante ta keda e situacion fragil di nos economia, pasobra te ainda ningun plan di e gobierno a duna su fruto, alcontrario a hinca nos pais den un debe astronomico y a resulta den entrega di nos orguyo partrio cu ta nos autonomia.

E unico forma pa re-establece confiansa den politica y hiba nos pais back den un recuperacion economico, ta mara e man di e politico, discuti riba e condicionnan pa introduci un compromiso nacional cu lo mester salbaguardia nos autonomia y Status Aparte.
Esey mester ta nos meta y tambe e caminda pa salba Aruba.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, october 7, 2015

Expresionnan haci den e articulo aki no necesariamente ta refleha opinion di ArenaPoliti.co