{idkey=8549b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3624-dangui-oduber-mep-gobierno-no-kier-tuma-accion-pa-scapa-caya-betico-croes%3FItemid%3D101][title=Dangui+Oduber+%28MEP%29%3A+Gobierno+NO+kier+tuma+accion+pa+scapa+Caya+Betico+Croes%21][desc=Algun+siman+atras+nos+a+bishita+Caya+Betico+Croes+y+nos+a+trece+e+imagenan+pa+pueblo+mes+por+wak+con+e+situacion+den+Caya+ta.+Un+situacion+hopi+penoso+caminda+tin+mas+tienda+sera+cu+tin+tienda+habri+den+Caya.+Durante+nos+bishita+nos+a+constata+cu+tin+30+tienda+a+sera+nan+portanan+y+awor+cu+nos+ta+na+fin+di+luna+di+juni+4+mas+a+sera+nan+portanan+cu+ta+yega+na+un+total+di+34+tienda+sera.+E+situacion+den+Caya+no+a+bira+mihor+sino+a+empeora.+Envez+cu+gobierno+di+Aruba+a+tuma+accion+y+a+haci+algo+pa+]}Algun siman atras nos a bishita Caya Betico Croes y nos a trece e imagenan pa pueblo mes por wak con e situacion den Caya ta. Un situacion hopi penoso caminda tin mas tienda sera cu tin tienda habri den Caya. Durante nos bishita nos a constata cu tin 30 tienda a sera nan portanan y awor cu nos ta na fin di luna di juni 4 mas a sera nan portanan cu ta yega na un total di 34 tienda sera. E situacion den Caya no a bira mihor sino a empeora.

Envez cu gobierno di Aruba a tuma accion y a haci algo pa trece un alivio pa comercio den playa, nan ta sigui castiganan. Gobierno di Mike Eman ta prefera pa tur tienda sera nan portanan promer cu tuma accion. Nos mester tene bon na cuenta cu na momento cu un tienda sera su porta esaki kiermen, mas desempleo, menos entrada di BBO pa gobierno, menos entrada di primanan AZV y AOV pa gobierno, menos entrada di loonbelasting pa gobierno y asina nos por keda menciona tur e consequencianan cu cada cierre di tienda ta trece cune. Tin solucion pa e situacion pero gobierno ta ignorante y terco. Nan no kier yuda comercio, kiko comercio a haci nan nos no sa.

Gobierno mester por habri Caya Betico Croes pa circulacion di trafico. Si esaki pasa lo trece bida bek den centro di ciudad y e fluho aki mes lo yuda tiendanan cu nan benta. Aruparking ta keda un problema hopi serio y nos a spera mas comprension di parti Otmar Oduber. Envez cu e purba yuda ta critica comercio y ta culpanan cu nan no ta bende. E la bisanan cu nan NO ta inverti, nan NO ta innova y nan mester percura pa aumenta nan benta. Loke Otmar Oduber NO ta compronde ta e hecho cu bao di e circunstancianan cu Caya Betico Croes ta, ni con bon bo producto y surtido ta, BO NO TA BENDE. Gobierno a hacie imposibel cu introduccion di Aruparking, pa comercio por bende. Lo ta bin pa Mike Eman, Otmar Oduber y Benny Sevinger mes bai cana den Caya Betico Croes y nan mes papia cu e comerciantenan y puntranan con e benta ta bayendo. Puntra nan si benta a aumenta manera Otmar Oduber ta bisa? Puntra nan si bao di e circumstancianan actual nan lo sobrevivi. Na momento cu un gobierno NO kier scucha pueblo y no kier scucha comercio e ta bira un problema serio pa un pais.

Otmar Oduber kier keda insisti cu Aruparking ta algo bon y e la yuda comercio. Loke e no ta compronde ta cuanto tienda a sera nan portanan, con hopi benta di comercio a cai den Caya oa via di Aruparking y na e momentonan aki hopi mas lo sera na portanan,

Kiko ta costa gobierno haci algo cu Aruparking. Si nan no kier elimine, duna algun ora pa dia di parkeo gratis pa wak si esey lo yuda. Keda sin tuma accion lo siginifica fin di Caya Betico Croes. Ta tristo y lamentabel con un gobierno ta wak su Caya ta sangra, su caya ta wordo mata y NO kier tuma accion y trece cambio!

Expresionnan haci den e articulo aki no necesariamente ta refleha opinion di ArenaPoliti.co