{idkey=5735b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3113-ministerio-di-transporte-a-ratifica-e-relacion-positivo-existente-cu-tur-e-trabounan-haci-durante-ultimo-ananan%3FItemid%3D101][title=Ministerio+di+Transporte%3A+A+ratifica+e+relacion+positivo+existente+cu+tur+e+trabounan+haci+durante+ultimo+a%C3%B1anan][desc=Minister+Oduber+a+reuni+cu+U.S.+Customs+and+Border+Protection.%26amp%3Bnbsp%3BMinister+Oduber+tabata+na+Washingthon+D.C.+pa+un+bishita+di+trabou+unda+a+probecha+pa+reuni+tambe+cu+U.S.+Customs+and+Border+Protection.+E+Minister+ta+indica+cu+ta+hopi+importante+cu+na+momento+cu+U.S.+Customs+and+Border+Protection+ta+cambiando+nan+procesonan+den+9+diferente+pais%2C+cu+ta+bay+tin+10+instalacion+di+Pre-Clearance+Americano+pafo+di+teritorio+pa+reuni+cu+nan.+Condicionnan+a+cambia+completamente+y+lo+kier+a+base+di+e+t]}
Minister Oduber a reuni cu U.S. Customs and Border Protection. 

Minister Oduber tabata na Washingthon D.C. pa un bishita di trabou unda a probecha pa reuni tambe cu U.S. Customs and Border Protection. E Minister ta indica cu ta hopi importante cu na momento cu U.S. Customs and Border Protection ta cambiando nan procesonan den 9 diferente pais, cu ta bay tin 10 instalacion di Pre-Clearance Americano pafo di teritorio pa reuni cu nan. Condicionnan a cambia completamente y lo kier a base di e tratado existente pa mantene e relacion solido. Durante e reunion a ratifica e relacion positivo existente cu tur e trabounan haci durante ultimo añanan, pa cu un acuerdo cu tin di mas di 25 aña bieu  pa cu Aruba su Pre-clearance Mericano, pero cu den e ultimo añanan aki diferente componentenan legal y aspectonan di siguridad, Aruba a percura pa cumpli y cuadra cu e exigencianan di CBP. Minister Oduber acompaña pa Minister Plenipotenciario Sr. Andy Lee y Sr. Edwin Kelly Director di Aviacion Civil a reuni cu director Randy Howe, director suplente Kurry Pastilong y gerente Adam Rottman.

E mandatario ta splica cu durante reunion a toca entre otro dos topico di interes mutuo di ambos Aruba pero pa CBP tambe. Un ta e expansion di e servicio di CBP na Aruba locual ta e parti di Pre-Clearance Americano, caminda ta mira cu den e proceso di sigui expande Aeropuerto Reina Beatrix, ta bay tin e necesidad aki. Sr. Oduber ta referi na e momentonan peek, specialmente den fin di siman, caminda tur e "bridge" y "gate" nan cu tin ariba na aeropuerto ta bira teritorio Americano. Tur ta wordo uza pa avionnan cu ta yega of bay Merca, mientras Aruba no por brinda e mesun servicio aki na aerolinea di otro continentenan, lo expande parti aki den e aña venidero cu tres "gate" mas creando mas posibilidad pa un demanda cu tin caba pa avionnan adicional den momentonan cu ta pafo di e peek y pafo di e orario operacional di CBP na e momentonan aki na Aruba. Minister Oduber ta splica cu esaki tabata un situacion practicamente imposibel anteriormente durante su ultimo bishita, y awor a base di e cambionan haci, ta logra cu lo por añadi e servicionan adicional aki sea den personal of den e fluho di e cantidad di pesonan cu ta pasa via nos aeropuerto pa drenta Merca.

E di dos punto cu a logra atende cu ne tambe ta cu den e proceso di renobacion di nos aeropuerto, ta bay tin un sistema nobo di "in-line baggaging". Cu otro palabra henter  e proceso di recoge bo maleta di nobo despues cu bo check in, pa despues bolbe laga esaki na aduana Mericano, lo pasa pa pasado dentro di e proximo dos añanan. Minister Oduber ta splica cu esaki ta significa tambe cu lo crea facilidadnan pa e pasaheronan cu diferente cooperacionnan di U.S. Customs and Border Protection y nan "software" existente. Esaki lo por crea e facilidad cu practicamente for di momento cu e pasahero ta na balie di check in di e aerolinea, lo por tin un proceso cu lo por agilisa na e momento aki caba e parti di Pre-Clearance di inmigracion Americano. Banda di e "boarding pass", porta hunto cu ne bo ta haya un otro tipo di documento cu bo ta mustra cu ba check in caba y ora pasa den e sala di inmigracion Americano nan lo por scan esaki sin cu mester pasa dor di henter e proceso di nobo.

Minister Oduber ta indica cu esaki ta entre otro 2 punto cu ta riba plan y cu awor lo cuminsa cana su proceso den negociacionnan hunto cu aeropuerto di Aruba y tur e partnernan concerni,  pa mira si e por cana man den man, cu na momento cu aeropuerto aki un aña y mey  pa 2 aña termina e fase di expansion y renobacion, cu e ora ey lo por introduci e sistemanan aki hunto cu tur e cambionan na caminda.  Un otro reunion positivo na Washington D.C. unda tur presente e keda ansioso pa traha hunto y pa mira e futuro plannan keda concretisa.

Expresionnan haci den e articulo aki no necesariamente ta refleha opinion di ArenaPoliti.co