{idkey=7178b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3119-gerick-croes-mep-banco-central-ta-desenmascara-gabinete-eman-cu-cifranan-di-2015-y-mustra-incapacidad-di-minister-de-meza%3FItemid%3D101][title=Gerick+Croes+%28MEP%29%3A+Banco+Central+ta+desenmascara+Gabinete+Eman+cu+cifranan+di+2015+y+mustra+incapacidad+di+Minister+de+Meza%21][desc=%26quot%3BYou+can+run+but+you+can%26%23039%3Bt+hide%26quot%3B+sigur+ta+un+expression+cu+ta+cuadra+ora+nos+ta+papiando+di+e+maneho+financiero+di+Aruba+bou+Gabinete+Eman.+Gobierno+a+demostra+cu+su+actitud+cu+e+ta+dispuesto+y+determina+%26amp%3Bnbsp%3Bpa+manipula+pueblo+tapando+e+berdad+financiero+di+nos+pais+ora+e+la+hasi+entrega+di+e+uitvoeringsapportage+di+e+4to+kwartaal+di+2015+na+CAFT.+Den+nan+raportahe+a+gaba+nan+mes+cu+nan+lo+ta+cumpliendo+cu+e+normanan+prescribi+den+articulo+14+di+ley+CAFT+door+di+sera+e+a%C3%B1a+cu+un+deficit+di+98]}
"You can run but you can't hide" sigur ta un expression cu ta cuadra ora nos ta papiando di e maneho financiero di Aruba bou Gabinete Eman. Gobierno a demostra cu su actitud cu e ta dispuesto y determina  pa manipula pueblo tapando e berdad financiero di nos pais ora e la hasi entrega di e uitvoeringsapportage di e 4to kwartaal di 2015 na CAFT. Den nan raportahe a gaba nan mes cu nan lo ta cumpliendo cu e normanan prescribi den articulo 14 di ley CAFT door di sera e aña cu un deficit di 98 miyon florin (deficit 2%) door di a castiga tanto e cuidadano y comerciante cu belasting sin piedad. AVP a sali brabo den prensa ta pronkia cu pluma di bon maneho financiero como sifuera ta semper nan a hasie. Nan a hasta reta y cuestiona dicon nos no a comenta di nan logro. Logicamente esaki tawatin di haber cu e duda y e manera cuestionabel cu a presenta e cifranan. Pero tur pakiko tin su pasobra... y den caso di tapa e realidad door di konkel cu cifra 2015 e berdad ta sali na cla. Riba 14 maart Banco Central  a publica e cifranan di e  ultimo kwartaal cu ta kita e mascarada di falsedad di parti Gabinete Eman pasobra a resulta cu e deficit ta 201.7 miyon florin dus dobbel!! Esaki ta pone automaticamente cu e deficit ta subi riba 4% y ta pone Gabinete Eman for di e norma prescribi di 3.7% pa cumpli cu ley...

Crecemento economico
Remarcabel ta cu tur e tempo Gabinete Eman a calcula e deficit di 2015 basa riba un pronostico hopi "out to date" di Banco Central di Aruba. Netamente pa e motibo aki CAFT ora di controla e cifranan di presupuesto 2015 a recomenda pa hasi uso di un pronostico nobo di e crecemento economico pero AVP den su terkedad ta drumi soña cu economia lo bai crece riba 3% y nos GDP lo surpasa 5 biyon! Wel e soño aki a keda te eynan pasobra ora e berdad a presenta su mes den e pronostico di 5 april 2016 a resulta cu tawatin " virtually no economic growth" pasobra e aumento tawata 0.1% casi nada ! 

Kiko esaki ta bisabo? Cu gobierno a faya di stimula nos economia y ta un manipulador na gran escala pa trata na pinta e situacion mas mihor di loke e ta! "You can run but you can't hide" pasobra awor pueblo sa cu 1) bo no a cumpli cu ley 2) bo no a cumpli cu norma di deficit pasobra esaki ta riba 4% 3) bo a manipula cu cifra atrobe 3) enbes di baha e debe nacional a conoce un crecemento atrobe yega te 83.3% di nos producto domestico bruto. Pa colmo bo a tranca e economia y no a crea ningun cuponan di trabou pa nos localnan sino awendia nos lo ta mihor para.

Minister de Meza un fracaso
Pueblo por conclui cu Sr. De Meza a resulta di ta e fracaso financiero mas grandi cu nos pais a yega di conoce. 
Pa di promer bou di su mandato e debe nacional a crece asina drastico kibrando record den solamente 4 aña. Pa colmo tur e tempo cu a pasa  1 % so a wordo hinca den economia di Aruba. Unda e 99% di e biyones a bai anto?! Na segundo lugar awor cu Mike de Meza ta Minister di economia e la demostra incapacidad atrobe cu e asunto di hedging cu a strangula pueblo sin e chens di por a paga menos na coriente y awa. Na tercer lugar te ainda e no por a yega na un acuerdo final indicando cu e ta demasiado complica pe e por handle of kizas ainda nan kier sigui cu desmantelacion?! Pero su astucia no ta caba eynan pa corona e obra e ultimo "economica forecast monitor" ta demostra awe cu e taesun culpabel pa tranca nos economia pasobra no tawatin crecemento economico pa 2015! Pa aña 2016 esaki lo ta tambe hopi menos di loke nan a calcula. Awor ta keda na pueblo pa caba di husga esnan cu ta perhudicando e pais aki!

Expresionnan haci den e articulo aki no necesariamente ta refleha opinion di ArenaPoliti.co