{idkey=8400b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3136-gabinete-me-ii-cuenta-anual-2014-a-keda-aproba-den-parlamento-di-aruba%3FItemid%3D101][title=Gabinete+ME+II%3A+Cuenta+anual+2014+a+keda+aproba+den+Parlamento+di+Aruba][desc=ORANJESTAD+-+Diaranson+mainta+Minister+di+finanzas%2C+Angel+Bermudez+tabata+den+parlamento+pa+asina+trata+e+cuenta+anual+2014+di+pais+Aruba.+Den+oranan+di+atardi+e+reunion+publico+a+finalisa+cu+aprobacion+di+nos+cuenta+anual+2014+cu+12+voto+na+fabor+y+6+en+contra.+%26quot%3BNos+ta+den+un+trayecto+pa+reduci+nos+deficit+anualmente%2C+pero+esaki+mester+wordo+trata+den+e+a%C3%B1anan+venidero+pa+en+berdad+na+2018+nos+tin+un+presupuesto+sin+deficit%26quot%3B%2C+e+Minister+encarga+cu+Finansas+di+Pais+Aruba+a+expresa.Minister+Berm]}
ORANJESTAD - Diaranson mainta Minister di finanzas, Angel Bermudez tabata den parlamento pa asina trata e cuenta anual 2014 di pais Aruba. Den oranan di atardi e reunion publico a finalisa cu aprobacion di nos cuenta anual 2014 cu 12 voto na fabor y 6 en contra. "Nos ta den un trayecto pa reduci nos deficit anualmente, pero esaki mester wordo trata den e añanan venidero pa en berdad na 2018 nos tin un presupuesto sin deficit", e Minister encarga cu Finansas di Pais Aruba a expresa.

Minister Bermudez ta splica cu e tratamento di nos cuenta anual ta hopi importante, pues e ta un forma di controla tambe con e ehecucion di e presupuesto a cana. "Ora bo tin un presupuesto, ta bon pa ora di ehecuta esaki, a base di bo responsabilidad, pa bo duna cuenta con e ehecucion a bay, con a anda cu e autorisacion ricibi di parti di parlamento pa por haci e gastonan den e presupuesto aki y den caso cu a surpasa of si a keda bou di e limitenan, pa splica tambe con e deficit den e caso aki a sali y kico ta e medidanan of temanan cu mester wordo trata."

E dignatario a indica cu e ley di LAft tambe ta hunga un papel esencial, pues den e ley aki tin diferente stipulacion y diferente 'deadline' pa loke ta trata e manera cu Gobierno mester raporta y entrega documentonan. Esaki ta cuminsa cu e presupuesto unda mester wordo entrega prome cu 1 di September di e aña anterior na parlamento. "E aña aki e ta mi intencion serio pa esaki sosode tambe pa prome biaha, contrario di con e proceso aki a cana den e ultimo añanan", asina e sr. Bermudez a confirma.

Esaki ta e di dos cuenta anual cu Minister Bermudez ta entrega na parlamento desde cu e la asumi cargo como Minister di Finanzas. Tumando na cuenta tambe lo cual ta stipula den e ley di LAft, Minister di Finansas ta sigura cu cada kwartaal ta haci entrega di un rapport cu avance y desaroyonan riba tereno di finanzas. "For di aña pasa caba nos a cuminsa cu nos reportahenan cada kwartal, tanto na Staten como na Conseho di Minister y otro institutonan, pa asina tin mas transparencia den ehecucion di presupuestonan," sr. Bermudez a splica.

Segun e dignatario e reportahenan y instrumento aki ta necesario, pero mester tin nan na tempo tambe. Minister Bermudez tin hopi siguransa cu porfin e aña aki lo logra cumpli cu e secuencia cu e ley di Laft ta prescribi, lo cual ta nifica cu e presupuesto di 2017 ta bay ta na tempo pero tambe cu e cuenta anual di 2015 tambe lo wordo trata y entrega e aña aki. Sin laga un banda e reportahenan cu e Minister ta entrega cada kwartaal, pues sr. Bermudez mes ta confirma cu e trabounan ta riba e bon caminda pa loke ta trata transparencia y responsabilidad riba e ehecucion di nos presupuesto.

Minister Bermudez ta hopi satisfecho cu e avance y cu e cuenta anual 2014 a wordo trata y aproba den parlamento y ta sigura cu di su parti e documentacion y reportahenan cu falta tambe ta canando riba liña manera ley ta prescribi.

Finalmente Minister Angel Bermudez a remarca cu na su opinion e tratamento di e cuenta anual mester wordo compaña pa un relato di Minister President encuanto e maneho cu a wordo hiba a base di e presupuesto.

Expresionnan haci den e articulo aki no necesariamente ta refleha opinion di ArenaPoliti.co