{idkey=3340b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3176-pdr-andin-bikker-ta-haya-cu-prome-cu-bira-minister-bo-mester-pasa-curso-di-ley%3FItemid%3D101][title=PDR%3A+Andin+Bikker+ta+haya+cu+prome+cu+bira+minister+bo+mester+pasa+curso+di+ley][desc=Andin+Bikker+lider+di+PDR%2C+a+trece+dilanti+den+rueda+di+prensa+semanal%2C+cu+e+ministernan+cu+no+tin+conocimento+di+Ley+mester+sigui+un+curso+basico+prome+cu+nan+bira+minister.El+a+ilustra+su+opinion+usando+un+experiencia+reciente+cu+el+a+pasa+aden+cu+minister+di+turismo+Otmar+Oduber.Esey+tabata+siman+pasa%2C+depues+cu+el+a+puntra+Minister+Otmar+Oduber+na+un+manera+elegante%2C+cu+e+tin+hopi+pregunta+tocante+e+maneho+di+beach+y+a+mande+su+preguntanan+por+escrito%2C+cu+por+cierto%2C+el+a+contesta+nan+masha+]}
Andin Bikker lider di PDR, a trece dilanti den rueda di prensa semanal, cu e ministernan cu no tin conocimento di Ley mester sigui un curso basico prome cu nan bira minister.

El a ilustra su opinion usando un experiencia reciente cu el a pasa aden cu minister di turismo Otmar Oduber.

Esey tabata siman pasa, depues cu el a puntra Minister Otmar Oduber na un manera elegante, cu e tin hopi pregunta tocante e maneho di beach y a mande su preguntanan por escrito, cu por cierto, el a contesta nan masha rapido. E ta haya e parti aki hopi bon di e mandatario, pasobra tin ministernan cu PDR a manda pregunta desde 2010 y te dia di awe PDR ta wardando riba contesta. Loke e ta sinti fastioso ta cu e minister a bay den prensa y a cuminza critica e preguntanan cu Bikker a haci y incluso haci chercha di nan.

Parlamentario mr. Bikker a reitera cu locual el a puntra e mandatario ta, na unda el a publica e policy y kico ta e diferencia entre esun di 2014 y esun nobo.

Bikker a bolbe bisa cu na 2014 gobierno a publica un maneho y tabata tin hopi critica for di e actornan cu mester a bay traha cu e maneho aki y el a haci e preguntanan na e minister pasobra a wordo skirbi den corant cu mester aplica full di nobo pa permiso, y e ta puntra su mes con un hende ta bay aplica pa un permiso sin sa pa kico e ta aplicando y pesey el a puntre na unda e policy aki ta publica.

Awor ta bin resulta cu mucho cambio no tin. Cu esun di 2014 esey t’e. El a bisa mi cu no tur ley mester wordo publica. Hello! Te cu mi sa cualkier hurista of studiante cu ta bay e prome les na Universidad di Aruba pa studia ley, sa cu e maneho den un estado di derecho, mester wordo publica pasobra ningun hende por sa di e maneho si e ta hinca den un lachi. Gobierno no por spera cu mester aplica pa un maneho full di nobo, anto nan no sa a base di cual maneho, kico a cambia, y ki caminda e ta publica” Bikker a bisa.

E parlamentario a remarca cu e minister mester bay un les basico di principio di bon gobernacion y cu esey ta conta tambe pa su amigo sr. Benny Sevinger pasobra den Parlamento el a bin bisa cu e lo cambia ROP, pasobra straño ta cu segun e lo ta pa cinco aña so e por wordo decreta.

“Mi amigo Benny, coi e ley un rato lese!! Den articulo 4 e Landsbesluit, e ordenanza di ROP, ta bisa duidelijk diez aña minimo, cu un posibilidad pa alargue cu cinco aña” Bikker a bisa y reitera cu si nan no ta hurista e ministernan por haya sikiera un curso di principionan di bon gobernacion y un estudio basico di e leynan cu nan mes ta maneha, pasobra despues, ora Parlamento haci preguntanan basa riba ley, y/of riba principionan di bon gobernacion, nan ta bin rabia pa motibo cu a haci pregunta.

Expresionnan haci den e articulo aki no necesariamente ta refleha opinion di ArenaPoliti.co