{idkey=7912b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3326-minister-otmar-oduber-a-ricibi-un-grupo-di-taxistanan-preocupa-cu-e-fenomeno-di-all-inclusive%3FItemid%3D101][title=Minister+Otmar+Oduber%3A+A+ricibi+un+grupo+di+Taxistanan+preocupa+cu+e+fenomeno+di+All-inclusive][desc=Dialuna+mainta+Minister+Oduber+a+ricibi+un+grupo+di+taxista+cu+a+bin+entrega+un+manifestacion+unda+255+taxista+a+firma+contra+mas+camber+di+e+tipo+di+acomodacion+All-inclusive.+E+mandatario+ta+indica+cu+tin+un+ley+na+Parlamento+pa+atendende+netamente+cu+e+topico+aki.+Ta+trata+aki+di+un+ley+pa+percura+pa+un+balansa+den+e+inventario+di+acomodacionnan+na+Aruba.+Minister+Oduber+ta+splica+cu+na+ningun+momento+Gobierno+di+Aruba+ta+contra+di+acomodacionnan+All-Inclusive+cu+nos+tin+na+e+momento+aki+riba]}
Dialuna mainta Minister Oduber a ricibi un grupo di taxista cu a bin entrega un manifestacion unda 255 taxista a firma contra mas camber di e tipo di acomodacion All-inclusive. E mandatario ta indica cu tin un ley na Parlamento pa atendende netamente cu e topico aki. Ta trata aki di un ley pa percura pa un balansa den e inventario di acomodacionnan na Aruba. Minister Oduber ta splica cu na ningun momento Gobierno di Aruba ta contra di acomodacionnan All-Inclusive cu nos tin na e momento aki riba nos isla. E mandatario ta bay mas leu ainda bisando cu e tambe ta di opinion mescos cu e Associacion di Hotelnan, cu Aruba tabata exitoso a base di e mescla cu nos tin na e momento aki den inventario, caminda tin mas of menos un 32% pa 34% di nos cambernan EP (camber di hotel bendi como European Plan) como All-inclusive, y banda di esaki 40 % di e totalidad di nos cambernan na Aruba ta den e tipo Time Share, tur esaki hunto a crea un balansa ideal cu a haci posibel cu Aruba por a surpasa e diferente retonan cu nos a encontra nos mes cu ne durante e ultimo 20 pa 25 añanan.

E preocupacion di e Taxistanan ta un preocupacion cu Gobierno tambe ta hiba, ta un preocupacion cu a mira durante e ultimo añanan y sigur na momento cu a tuma over Westin Hotel, den e caso aki dor di e cadena Riu, e di dos edificio di Riu cu a wordo cumpra na Aruba, a wordo cumpra for di un hotel existente, cu tabata tin un permiso existente y por a mira e tempo ey e consecuencia di esaki. E fenomeno di All-inclusive ta cu nan ta bini cumpra hotelnan existente, cu permisonan existente, cu ta e peliger di mas grandi.

Durante reunion cu Minister Oduber e Taxistanan a comparti cu nan sigur a sinti e impacto negativo di e tendencia aki.

No ta taxistanan so a vocifera nan preocupacion e mandatario ta comparti cu durante e siman tras di lomba el a ricibi un gran cantidad di cartanan di diferente asociacionnan na Aruba, entre otro di 'wholesalers' proveedornan, importadornan di producto pa nos isla, por lo menos 4 compania di e tipo aki cu a dirigi e minister un carta. Doño di hotelnan cu a reuni cu e mandatario pa vocifera nan desaprobacion pa un aumento den e inventario di camber di e tipo di acomodacion All-inclusive, mirando e gran cantidad di inversion cu nan a haci. Nan a dirigi un carta caminda nan ta bisa cu nan ta prefera pa Aruba no sigui aumenta e cambernan All-inclusive paso esaki lo por deteriora e producto Aruba y e inversionnan cu nan ta haciendo. Tambe asociacion di restaurantnan tanto Aruba Gastronomic Association como  tambe un gran cantidad di restaurantnan cu no ta asocia cu A.G.A. pero cu ta situa den e area turistico tambe a dirigi carta pa e mandatario. Asina ta mira un cantidad grandi di gruponan den nos comunidad cu ta preocupa cu e fenomeno di All-inclusive.

E ley ya caba ta na Parlamento y ta trata di un ley grandi cu cambionan significativo cu lo tuma su tempo pa trata internamente. Tin varios reunionnan tumando luga cu e diferente comisionnan di Parlamento unda cu pa inicio di Juni preguntanan lo bin Gobierno, pa na nan turno keda contesta pa asina e por keda trata den Parlamento. Minister Oduber ta spera di por trata e ley aki prome cu reces.

Expresionnan haci den e articulo aki no necesariamente ta refleha opinion di ArenaPoliti.co