{idkey=2152b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3528-mike-de-meza-ta-bay-tin-trabou-pa-tur-esnan-cu-a-traha-den-refineria-esnan-cu-mester-a-bay-afo-y-tambe-pa-esnan-cu-kier-sina-e-trabou%3FItemid%3D101][title=Mike+de+Meza%3A+Ta+bay+tin+trabou+pa+tur+esnan+cu+a+traha+den+refineria%2C+esnan+cu+mester+a+bay+afo+y+tambe+pa+esnan+cu+kier+si%C3%B1a+e+trabou][desc=Mike+de+Meza+durante+celebracion+na+San+Nicolas%26amp%3Bnbsp%3BORANJESTAD+%E2%80%93+Riba+e+mesun+dia+di+firmamento+di+acuerdo+cu+CITGO%2C+Minister+di+di+Economia%2C+Comunicacion%2C+Energia+y+Medio+ambiente+ing.+Mike+de+Meza+a+bay+celebra+cu+e+pueblo+na+entrada+di+refineria+na+San+Nicolas.+Aki+el+a+cuminsa+na+duna+Dios+Todopoderoso+danki%2C+el+a+gradici+e+ekipo+di+negociacion+forma+pa+nos+mesun+hendenan+y+a+bisa+na+un+y+tur+pa+prepara+paso+ta+bay+tin+hopi+trabou.+%E2%80%9CEsaki+ta+pa+e+pueblo+di+Aruba+en+general%2C+y+specialmen]}
Mike de Meza durante celebracion na San Nicolas 

ORANJESTAD – Riba e mesun dia di firmamento di acuerdo cu CITGO, Minister di di Economia, Comunicacion, Energia y Medio ambiente ing. Mike de Meza a bay celebra cu e pueblo na entrada di refineria na San Nicolas. Aki el a cuminsa na duna Dios Todopoderoso danki, el a gradici e ekipo di negociacion forma pa nos mesun hendenan y a bisa na un y tur pa prepara paso ta bay tin hopi trabou. “Esaki ta pa e pueblo di Aruba en general, y specialmente e pueblo di San Nicolas. Ban hisa nos glas y celebra.”

Rondona pa e persona comun, e trahado cu a spera cu ansha pa e dia aki yega, di e manera ey Minister Mike de Meza a celebra fin di un dia historico pa nos pais. E ta admiti cu no tabata facil y cu ainda tin asuntonan pendiente, pero cu pa 1 di augustus tur e trabounan ta bay cuminsa y na San Nicolas lo tin otro celebracion grandi pa marca esaki. “Nos lo ta bay tocando e pito ey tur dia manera e tabata antes,” asina Minister de Meza a bisa cu emocion.

Awor gobierno ta bezig cu Valero cual ta hopi avansa, y tambe tin e parti entre Valero cu CITGO, pero tur cos lo ta cla pa e fecha stipula di 1 di augustus. “Tin hopi trabou na caminda,” asina Minister de Meza a duna di conoce. E rehabilitacion di e refineria ta bay tuma entre 2 pa 4 aña. E mandatario ta calcula cu entre awo y proximo aña ya lo tin 3 mil persona trahando, pero e cuponan di trabou directo e indirecto ta alcansa e 5 mil total.
“Boso tur cu a traha na e refineria lo wordo contrata, CITGO ya caba a bisa nos cu nan mester di tur hende paso nan no tin suficiente,” Minister de Meza a bisa e grupo grandi di hende reuni diabierna anochi pafo di e murayanan di Valero. “Tur e hendenan di instrumentacion, tur e hendenan di electricidad, inspector, operador y ingenieronan prepara pasobra nan ta bay tuma bo na trabou y nan ta bay tuma tur e hendenan cu a traha den e refineria.”

CITGO ta bay tin mester di hende nobo tambe pasobra tin un grupo di ex-trahador cu a bira grandi y bay cu pension. Minister de Meza a papia cu tin hopi luga pa tur hende y cu esnan cu no a yega di traha ainda den refineria, ta bay haya entrenamento.

“Tur nos rumannan, tur Arubiano cu mester a bay for di Aruba pa bay traha na Surinam, na Qatar, na Saudi Arabia, na Abu Dhabi y na diferente caminda; tur ta bon bini pa bin bek paso tur lo haya trabou na refineria, sin excepcion, tur di nan. Asina ta, prepara paso e trabou ta bay cuminsa hopi rapido. Ya caba nan kier bay busca algun hende paso tin hopi trabou aya’den,” Minister de Meza a bisa cu hopi alegria den su bos.

E acuerdo cu CITGO ta pa 25 aña, loke ta mas cu suficiente. Algun por pensa cu mester a bay mas, pero ta bon pa nos laga nos yiunan cu e oportunidad pa dia di mañan bolbe negocia y dicidi kico nan kier haci. Pa e tempo ey, segun de Meza, ya Aruba lo tin su propio gas y petroleo.

Expresionnan haci den e articulo aki no necesariamente ta refleha opinion di ArenaPoliti.co