Ni Minister Paul Croes, ni Gobierno di AVP ta den posicion pa sigura ningun hende trabou den refinería tampoco

Momento cu bo forsa pa bira Minister y obliga bo Gobierno pa hasi gastonan adicional pa asina satisface bo gana di bira Minister, bo ta perde tur credibilidad.

E ta imposibel pa kere y confía den un Minister cu tambe ta culpabel di e gran cantidad di iregularidad cu ta forma parti di e maneho di partido AVP.

Ta berdad cu partido MEP no por duna ningun hende trabou den refeneria, pero e realidad ta cu partido AVP, pa ta specifico Minister Paul Croes, tampoco ta den posicion pa hasi tal.

Locual nos, como político, si por hasi ta pidi Citgo/PDVSA y e contratistanan pa considera un persona pa cierto cuponan di trabou cu lo tin disponibel. Nos no por lubida cu ta e companianan local lo bay haya contract for di Citgo/PDVSA pa hasi e trabounan necesario den e refineria. Ni MEP, ni AVP y mucho menos Paul Croes lo tin control ariba e parti aki.

Pesey, lagami splica un biaha mas kiko ta e intencion pa cu e oficinanan y pakiko partido MEP kier yuda mas hende bin na remarke pa haya un trabou den refineria.

Nos di partido MEP a bin cu e idea pa crea un helpdesk unda cu esnan cu ta interesa den traha den e refineria, por inscribi y asina crea un database. E database aki lo ta hopi beneficioso pasobra lo yuda na tin un bista mas amplio di e necesidad laboral aki na Aruba, como tambe e disponibilidad cu tin y pa cua areanan di trabou.

Informe cu nos a haya ta bisa cu tin un grupo di coordinador di cierto Ministernan a laga sa cu solamente si bo ta cu nan, esta si bo ta apoya partido AVP den e proximo campaña electoral, lo bo haya trabou den refeneria.

Mirando e actitud aki di cierto coordinador, e pregunta ta si nos ta kere cu AVP lo hasi e proceso aki na un manera husto y limpi, dunando tur hende e mesun chens. E pregunta aki no ta difícil pa contesta y logicamente e contesta ta uno negativo. Claro cu ta imposibel pa confía partido AVP cu algo asina, mas ainda mirando cu ya caba nan ta pleitando den nan mesun seno pa wak ken di nan campañadornan tin e prome opcion pa haya trabou den e refineria.