{idkey=126b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F387-jan-de-ruijter-recordatorio-pa-ministerio-publico-encuanto-denuncio-di-fraude-y-corupcion-contra-otmar-oduber%3FItemid%3D101][title=Jan+de+Ruijter%3A+Recordatorio+pa+ministerio+publico+encuanto+denuncio+di+fraude+y+corupcion+contra+Otmar+Oduber][desc=Den+un+carta+fecha+dia+5+di+januari+2015%2C+dirigi+na+sr.+Olthof%2C+Hoofdofficier+van+Justitie%2C+sr.+Jan+de+Ruijter+a+recorda+e+ultimo+aki+riba+su+carta+fecha+dia+2+di+december+2014%2C+relaciona+cu+su+denuncia+contra+minister+di+turismo%2C+Otmar+Oduber.%26amp%3Bnbsp%3BE+carta+ta+bisa%3A+Mi+ta+lamenta+masha+hopi+mes+cu+mi+no+a+tende+absolutamente+nada+di+bo+persona+relaciona+cu+mi+carta+anterior+di+dia+2+di+december+2014.+Mi+ta+lamenta+esey+hopi+pasobra+bo+predecesor%2C+sr.+Blanken%2C+nunca+a+inicia+un+persecucion%2C+y+ni+]}

Den un carta fecha dia 5 di januari 2015, dirigi na sr. Olthof, Hoofdofficier van Justitie, sr. Jan de Ruijter a recorda e ultimo aki riba su carta fecha dia 2 di december 2014, relaciona cu su denuncia contra minister di turismo, Otmar Oduber. E carta ta bisa:

Mi ta lamenta masha hopi mes cu mi no a tende absolutamente nada di bo persona relaciona cu mi carta anterior di dia 2 di december 2014.

Mi ta lamenta esey hopi pasobra bo predecesor, sr. Blanken, nunca a inicia un persecucion, y ni siquiera a haci un investigacion riba e denuncianan di fraude y corupcion cu mi a raporta cerca dje, peri sí ela invitami repetidamente pa conbersa, unda continuamente ela mustrami ki pasonan mi mester tuma ainda pa haci posibel un investigacion y persecucion.

Awor mi kier haci uso di e oportunidad si, pa elabora riba mi denuncia a base di locual a tuma lugar despues di e sentencia den e caso KG 2255/2014.

1. Oduber mes ta admiti su culpa.
Despues di e sentencia Oduber NO a bay den “hoger beroep” (aunke ela declara esey si riba NoticiaCla, pero esaki tambe a resulta di ta un declaracion falso), y a bisa publicamente cu e lo no cuminza un “bodemprocedure”.

E sentencia di huez tabata encera claramente cu si Oduber NO tabata di acuerdo cu mi acusacionnan cu e ta corupto, y cu e ta facilita fraude y estafa den e proyecto Hard Rock-hotel, e lo mester demostra publicamente PAKIKO mi no tin razon den esaki.

Awor cu e no ta bay den “hoger beroep”, cu e no ta cuminza cu un “bodem-procedure”, y cu e no ta contradeci mi acusacionnan den nan contenido, ta un hecho indiscutibel, cu e TA di acuerdo cu, y pues ta acepta mi acusacionnan di cu e ta corupto y ta comete fraude. 

No ta al caso mas si su postura ta basa of no riba e ponencia di huez cu e mester realisa su mes cu un “bodemprocedure” lo bira hopi dificil p’e, en bista di mi materialnan di prueba.


2. Ta proba cu e garantia di banco NO ta “unconditional” , ni “irrevocable”
Indudablemente bo persona lo a lesa tambe cu gobierno no a logra/no ta logrando cobra e garantia di banco cu e famia amigo Croes/Southwest Horeca Development a deposita via A.I.B.  Pa  esaki mester sigui e procedura di un caso legal.
No ta existi un mihor prueba adicional cu e garantia di banco cu AIB a duna na fabor di Southwest Horeca Development NO ta “unconditional” (sin ningun condicion) y NO ta “irrevocable” (no por ser revoca).
E garantia tabata contene condicionnan, e por a ser revoca, y e tabata mara na tempo. Exactamente manera mi a menciona esaki den mi denuncia.
Un garantia di banco “unconditional” y “irrevocable” (esey e garantia mester tabata!) ta ser entrega na e banco en cambio di placa cash (“verzilveren”), y no mester di ningun caso dilanti huez pa esaki!
Un bez mas ta comunidad ta esun cu mester carga e consecuencianan, y cu ta perde e suma di 2miyon dollar.

Awor mi mester insisti cerca bo pa bo informami kiko lo ta bo siguiente pasonan; lo mi NO bay tuma aden cu Mike Eman ta keda nenga di destitui Otmar Oduber for di su funcion, pendiente di e investigacion of no.
Esaki ta encera tambe cu lo mi no laga e caso aki drumi, y cu e problema no ta desaparece di su mes.  

Lo mi splicabo pakiko e asunto aki ta di tanto peso.
Na prome lugar, nunca lo mi kere cu Otmar Oduber y e famia di Tico Croes lo deshaci di nan plannan pa un proyecto pa un hotel y un casino na e sitio di e anterior Bushiri Hotel, a no ser cu Otmar Oduber wordo persigui.
Conociendo Otmar Oduber y Tico Croes y nan relacion, mi ta convenci cu nan lo sigui traha riba un scenario cu diripiente nan lo anuncia na e momento cu nan ta cla cu esey financieramente.
Pa ambos tin interesnan financiero mucho grandi den wega.

Na di dos lugar, un parti hopi grandi di nos comunidad ta en espera di locual ta bay socede cu minister Oduber, si ta existi husticia riba Aruba, y si Ministerio Publico lo sa di actua contra su propio patron.
Unda cu mi yega riba Aruba, mi ta scucha preguntanan y dudanan si ainda ta existi un trias politica riba Aruba.
Por ta bo no ta consciente totalmente cu henter Aruba ta den espera di bo decision encuanto e persecucion di Oduber.

Tanto na Aruba como den exterior, e asunto aki ta hala mas atencion, cu lo bo por a premira, y den caso cu bo no haci uso di e pruebanan cu mi a presenta na bo completamente cla den un teblachi di oro, e ora ey mi ta pidibo pa informami esey mas liher posibel, pa mi por bringa mi caso contra Otmar Oduber na un otro manera.
E actuacion y actitud di e minister pa mi pues ta totalmente inacceptabel; pa mi ta incomprendibel cu e minister aki ainda ta den funcion, y mi ta reserva tur derecho pa haci cualkier cos pa logra husticia.

Esaki pa mi ta un asunto di principio, pasobra cosnan robez manera henter e afair aki di Hard Rock simpelmente NO mag di tuma lugar.
Lamentablemente casonan asina ta socede continuamente riba Aruba, y pronto lo bo hayabo cu e siguiente caso, esta e fraude y e corupcion cu a aseguronan di 28mil studiante Arubiano na Hulanda, cu e minister di Enseñanza di Aruba, mediante un destaho “publico” secreto, lo a otorga na un empresa “BV”, cu lo no tin NINGUN empleado, cu lo ta alcansabel solamente via un number di telefon “06”, y cu lo tin un “geplaatst en gestort” capital di “zegge en schrijve” 1 (UN !!) Euro!
Pero esaki lo mi laga pa un siguiente biaha.

Mi ta conta riba un reaccion di bo banda e siman aki ainda, y por lo demas mi ta deseabo un feliz aña nobo riba Aruba.


Jan de Ruijter
This email address is being protected from spambots. You need JavaScript enabled to view it.
Tel.: 739-9241

Expresionnan haci den e articulo aki no necesariamente ta refleha opinion di ArenaPoliti.co