{idkey=7143b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4069-dangui-oduber-mep-promer-minister-mike-eman-mester-asumi-su-responsabilidad%3FItemid%3D101][title=Dangui+Oduber+%28MEP%29%3A+Promer+minister+Mike+Eman+mester+asumi+su+responsabilidad%21][desc=Nos+pais+ta+den+problemanan+hopi+serio.+E+explosion+social+cu+a+wordo+causa+pa+gabinete+Mike+Eman+1+y+2+ta+wordo+sinti+den+tur+skina+na+Aruba.+E+problemanan+di+nos+pais+ta+grave+y+esaki+a+conduci+na+un+aumento+drastico+di+criminalidad.+E+gobierno+aki+no+di+awor+sino+for+di+comienzo+no+por+a+fiha+kiko+ta+prioridad+den+gobernacion.+Prioridad+nunca+por+tawata+bin+cu+4+tram+cu+a+costa+nos+pais+mas+cu+30+miyon+florin+y+awe+mas+bien+a+mata+Caya+Betico+Croes+pasobra+e+tram+a+impedi+circulacion+di+trafi]}
Nos pais ta den problemanan hopi serio. E explosion social cu a wordo causa pa gabinete Mike Eman 1 y 2 ta wordo sinti den tur skina na Aruba. E problemanan di nos pais ta grave y esaki a conduci na un aumento drastico di criminalidad. E gobierno aki no di awor sino for di comienzo no por a fiha kiko ta prioridad den gobernacion. Prioridad nunca por tawata bin cu 4 tram cu a costa nos pais mas cu 30 miyon florin y awe mas bien a mata Caya Betico Croes pasobra e tram a impedi circulacion di trafico.

Nos pais na e momentonan aki ta wordo sacudi pa un ola di criminalidad, un ola di atraco y hasta un ola di asesinato. Minister di husticia Douwers a bisa den parlamento cu e mester minimal 10 miyn florin extra pa combati criminalidad pero en realidad e mester 50 miyon florin extra. Loke nos no por compronde di e ponencia aki ta e hecho cu e tambe ta forma parti di gabinete Mike Eman 2 y mi ta asumi e ta tambe den e conseho di minister. Con por ta posibel cu no tin placa pa atende cu crimnalidad y di otro banda proyectonan manera Green Corridor y Watty Vos Boulevard ta sigui normal y ta proyectonan cu ta costa nos pueblo casi 700 miyon florin. Prioridad awor aki ta pa garantiza nos pueblo seguridad. No por ta asina cu ciudadanonan ta sera porta di nan cas 7 or di anochi y ta biba den angustia y miedo. No por ta asina cu un gobierno ta inverti 700 miyon florin den infrastructura y no tin placa pa ensejanza, no tin placa pa construi scolnan, no tin placa pa combati criminalidad. E ta imcomprendibel y absurdo con un minister presidente ta hiba un maneho asina. Mike Eman como promer minister di e pais aki ta esun responsabel y esun culpabel pa e decadencia y deterorio di nos pais. E ta esun cu ta scohe pa inverti placa di pueblo den prioridadnan robez. E ta esun responsabel pa e inseguridad cu ta reina den pueblo awor aki. Como promer minister e mester por fiha prioridad pa su gobierno y esaki no a wordo haci. E problema di criminalidad ta touch nos tur cu ta biba riba e pais aki. Criminalidad no tin color politico y nos mester atende cu esaki awor. Promer minister mester asui su responsabildiad y stop di sconde pa pueblo. Duna pueblo cara, duna pueblo splicacionan, atende cu e problemanan di pais Aruba y stop di corre pa bo responsabilidad.

Un promer minister cu ta corre pa su responsabilidad y no por atende cu problemanan di pais no por ta digno di confianza di nos pueblo!

Expresionnan haci den e articulo aki no necesariamente ta refleha opinion di ArenaPoliti.co