{idkey=5525b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4087-gabinete-me-ii-despues-di-henter-un-bida-biba-aki-den-scuridad-porfin-nos-ta-haya-iluminacion%3FItemid%3D101][title=Gabinete+ME+II%3A+Despues+di+henter+un+bida+biba+aki+den+scuridad+porfin+nos+ta+haya+iluminacion][desc=Habitantenan+di+Sero+Grandiweg+contento+cu+Gabinete+Mike+Eman%3A%26amp%3Bnbsp%3BORANJESTAD+%E2%80%93+%E2%80%9CMi+tabata+cushina%2C+pero+mi+a+sali+mesora+pa+bin+gradici+Prome+Minister+Mike+Eman+y+Minister+Mike+de+Meza+personalmente+pa+saca+nos+di+e+scuridad+cu+nos+habitantenan+di+Sero+Grandiweg+a+bin+ta+biba+aden+pa+pracicamente+henter+nos+bida%2C%E2%80%9D+esaki+tabata+palabranan+di+Sandra+Arrindell%2C+kende+tabata+hopi+contento+di+porfin+por+mira+luz+den+su+caya.%26amp%3Bnbsp%3BDespues+di+varios+bicindario+na+Noord+e+campa%C3%B1a+di+%26%23039%3BLuz+den+Ba]}
Habitantenan di Sero Grandiweg contento cu Gabinete Mike Eman: 

ORANJESTAD – “Mi tabata cushina, pero mi a sali mesora pa bin gradici Prome Minister Mike Eman y Minister Mike de Meza personalmente pa saca nos di e scuridad cu nos habitantenan di Sero Grandiweg a bin ta biba aden pa pracicamente henter nos bida,” esaki tabata palabranan di Sandra Arrindell, kende tabata hopi contento di porfin por mira luz den su caya. 

Despues di varios bicindario na Noord e campaña di 'Luz den Bario' a yega San Nicolas, un area cu semper tabata y tin hopi atencion di Gabinete Mike Eman. 

No solamente adulto pero tambe muchanan a ricibi e dos mandatarionan cu alegria y abrazo pa e ceremonia di instalacion di e prome luz LED den Sero Grandiweg. Maneho di Gabinete Mike Eman II basa riba sostenibilidad a pone como meta pa cambia tur luznan di caya cu ta uza un tecnologia mucho mas eficiente. 

E proyecto aki, ta haci uzo di luznan basa riba tecnologia di LED, cu ta sumamente eficiente. Pa cada luz existente (bieu) cu wordo remplaza, ta costa 50% menos. Esey kiermen cu pa cada luz bieu reemplasa, por pone 2 di e luznan aki. E proyecto aki ta haci uzo di e spaarmento aki pa instala luz na barionan cu nunca a haya. Asina tambe, barionan, manera na Sero Grandiweg, cu nunca tabata tin luz y caminda bisiñanan semper a biba den scuridad, awe por tin luz de nan bario, treciendo asina siguridad cu ne.

For di tempran habitantenan a pone musica sperando yegada di e mandatarionan, ya cu “e hecho aki ta algo cu nos mester celebra. Ta henter nos bida nos a pidi y spera riba yegada di luz den nos caya y awo porfin el a yega danki na nos Prome Minister y Minister,” un di e ciudadanonan a comenta.

Sero Grandiweg ta cay net riba e caya largo di Juwanamortoweg y no ta un caya nobo. Mas o menos luna pasa ELMAR NV hunto cu Oficina di Prome Minister Mike Eman y Mnister de Meza a cuminsa cu proyecto di instalacion di puntonan di luz nobo na Seroe Pela, Palm Beach, Bakval, Sabana Liber y awor a yega San Nicolas.

Den tur e bishitanan cu Prome Minister Eman ta haci den bario cu su teamnan, mas iluminacion semper ta bini dilanti hunto cu mas caminda asfalta. Ya caba bou di Gobernacion di Gabinete Mike Eman I a instala un cantidad grandi di puntonan nobo di iluminacion y e programa aki ta continua awo “te ora cu nos ilumina cada skina di Aruba,” Prome Minister Eman a bisa.

Expresionnan haci den e articulo aki no necesariamente ta refleha opinion di ArenaPoliti.co