{idkey=9016b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4322-mireille-sint-jago-mep-maneho-di-mike-eman-ta-un-berguensa-pa-aruba%3FItemid%3D101][title=Mireille+Sint+Jago+%28MEP%29%3A+Maneho+di+Mike+Eman+ta+un+berguensa+pa+Aruba%21][desc=E+maneho+di+Mike+Eman+of+mas+bien+e+falta+di+maneho%2C+ta+un+berguensa+pa+nos+tur+na+Aruba.+Un+biaha+mas%2C+Mike+Eman+a+logra+haya+atencion+na+un+manera+negativo+pa+nos+pais+den+Reino+y+den+exterior.+Asina+e+ta+sigui+duna+Aruba+un+mal+nomber.+Un+Prome+Minister+cu+na+a%C3%B1a+2014+a+cuminsa+un+welga+di+hamber+pasobra+Gobernador+no+kier+a+firma+su+presupuesto.+Durante+di+e+welga+aki+el+a+yora+y+grita+%E2%80%98over+su+dead+body%E2%80%99+y+na+e+mesun+momento+a+yama+e+mandatarionan+di+Hulanda+pa+verkrachters.+E+mesun+pe]}
E maneho di Mike Eman of mas bien e falta di maneho, ta un berguensa pa nos tur na Aruba. Un biaha mas, Mike Eman a logra haya atencion na un manera negativo pa nos pais den Reino y den exterior. Asina e ta sigui duna Aruba un mal nomber.

Un Prome Minister cu na aña 2014 a cuminsa un welga di hamber pasobra Gobernador no kier a firma su presupuesto. Durante di e welga aki el a yora y grita ‘over su dead body’ y na e mesun momento a yama e mandatarionan di Hulanda pa verkrachters. E mesun persona a yama Hulanda bon bini na Augustus 2015 ora el a duna instruccion na su fraccion den Parlamento, pa aproba e Ley di CaFT. Un mandatario asina, bo no por tuma hopi na serio.

E posicion di Gobernador ta uno sumamente importante y na e mesun momento hopi delicado. Min. Pres. Mike Eman a tarda mas cu un aña pa propone un persona cu Hulanda por a aproba. Ademas e no a propone solamente un persona, manera a wordo haci den tur otro caso di nombracion di Gobernador, no… el a propone 3 persona. Ningun di nan tawata na e gusto di Hulanda. Ami por imagina mi mes cu Hulanda, de Kroon, no kier a warda riba Mike Eman mas.

Cu e prome nombracion di un Gobernador pa Aruba, bou di Rey Willem Alexander, a bay na un manera asina no profesional, tambe lo por ta un motibo cu Hulanda kier a soluciona e situacion aki mas pronto posibel. Mi por imagina mi mes cu Hulanda tawata busca un persona cu, mes cos cu Gobernador Refunjol, por para firme ora ta necesario y por ehecuta su funcion como debe ser. Un persona cu no lo tuma orden di Mike Eman.

Naturalmente, ningun di nos sa kico lo ta e berdad. Kico en berdad lo a pasa entre Mike Eman y ‘De Kroon’. Si Mike Eman un biaha mas ta gaña rabia, grita y gaña yora pa desvia atencion di otro asuntonan di por ehempel inmigracion di Benny Sevinger, nos ningun no sa. Pero cu esaki no ta un sorpresa, pero e resultado di e mal maneho of falta di maneho di Mike Eman, esey si nos tur por conclui sin ningun duda. Bo ta cosecha locual bo ta sembra y Mike Eman no a sembra bon maneho, ni exito ni respet. Lamentablemente, cada bes cu Minister President Mike Eman faya, e ta pone nos cara na berguensa, no solamente den Reino pero tambe internacionalmente.

Mi ta haci un yamada na tur hende pa dia cu nos futuro Gobernador yega Aruba, door cu Mike Eman y tur e Ministernan a dicidi cu nan no tin confiansa den Minister Plenipotenciario Alfonso Boekhoudt mas, pa nos hisa nos bandera di Aruba pa demonstra cu nos SI ta sostene nos Gobernador nobo y nos no tin confiansa den ‘Mike E-rror-man y su Mini-strea-nan mas. Aruba merece un maneho hopi mas miho cu locual nos ta haya di e Gobierno aki.

Gisele-Mireille Sint Jago

Expresionnan haci den e articulo aki no necesariamente ta refleha opinion di ArenaPoliti.co