{idkey=2730b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4323-parlamentario-mr-xiomara-maduro-mep-e-drama-rond-di-nombracion-di-e-gobernador-nobo-ta-djies-un-otro-smokescreen%3FItemid%3D101][title=Parlamentario+mr.+Xiomara+Maduro+%28MEP%29%3A+E+drama+rond+di+nombracion+di+e+Gobernador+nobo+ta+djies+un+otro+smokescreen][desc=Ta+prepara+Pueblo+pa+guli+un+otro+cambio.%26amp%3Bnbsp%3BDen+e+dianan+aki+nos+por+observa+e+mesun+patronchi+di+evento+cu+tabata+tin+na+2014+ora+cu+a+yega+e+momento+cu+Aruba+mester+a+bay+bou+di+supervicion+financiero+di+CFT.+E+tempo+ey+Minister+Eman+a+keda+nenga+te+na+final+cu+ela+firma+pa+CFT+bira+activo+na+nos+Pais.+E+mandatario+a+monta+full+un+show+di+welga+di+hamber+pa+aparenta+cu+e+ta+para+pa+defende+e+autonomia+di+Aruba%2C+siendo+cu+desde+2010+caba+ela+firma+tur+sorto+di+protocol+cu+Hulanda+pa+entrega+]}
Ta prepara Pueblo pa guli un otro cambio. 

Den e dianan aki nos por observa e mesun patronchi di evento cu tabata tin na 2014 ora cu a yega e momento cu Aruba mester a bay bou di supervicion financiero di CFT. E tempo ey Minister Eman a keda nenga te na final cu ela firma pa CFT bira activo na nos Pais. E mandatario a monta full un show di welga di hamber pa aparenta cu e ta para pa defende e autonomia di Aruba, siendo cu desde 2010 caba ela firma tur sorto di protocol cu Hulanda pa entrega e Status Aparte na pida pida bek. E tempo ey a haci tur e show aki y e lastramento di Gobernador Refunjol como smokescreen pa prepara Pueblo pa guli e hecho cu nos autonomia lo wordo mina y cu mester acepta e supervicion financiero di CFT. Awe na 2016 no ta nada diferente. E drama rond di e nombracion di Gobernador nobo ta djies un otro smokescreen pa prepara Pueblo pa guli un otro cambio cu ta na caminda.

Minister Eman tabata sa cu Hulanda lo nenga
Mescos cu tempo di welga di hamber, e biaha aki tambe Minister Eman a recuri na un acto di desesperacion pa haci pasa cu e no tabata sa nada di e abuso di Hulanda. Den e caso aki e abuso ta cu Hulanda no a bay di acuerdo cu nombracion di Minister Bermudez como Gobernador y a djies nombra sr Alfondo Boekhoudt, kende no tabata un candidato riba e lista di tres persona proponi pa Minister Eman. Aki ta unda cu nos mester remarca cu ta imposibel cu Minister Eman no tabata sa cu Hulanda no a haya su candidatonan bon. Pasobra tabata tin un tardansa enorme y hasta e prolonga e temporada di Gobernador Refunjol. Minister Eman tabata sa masha bon y a djies bira hunga e wega di gania rabia y bula bay Den Haag pa 2 dia pa saca potret cu Minister Plasterk pa Pueblo pensa cu Minister Eman a sali na defensa di Aruba. Anto como pleister riba e herida, Hulanda ta admiti di no a anda netjes cu e nombracion di e Gobernador nobo.

Puro smokesreen pa locual mester bin
Lamentabel ta cu tur esaki ta djies un smokescreen pa traha e scenario pa Pueblo guli e cambionan cu mester bin. Na man di tur e drama aki di nombracion di Gobernador nobo, lo bay cambia entre otro nos Staatsregeling pa asina elimina of limita e influencia di Gobernador den nos sistema democratico. Lo bin cu cambio di Statuut pa asina limita of kita e responsabilidadnan di Reino pa locual ta trata bon gobernacion di nos Pais. Y lo sigi un lobby grandisimo pa cambia e constelacion den Reino, den cual lo pone precion pa e Paisnan autonomo bira parti di Hulanda ala BES of un otro constelacion den cual e responsabilidad di Hulanda pa e otro Paisnan ta wordo limiti of elimina. Mas cu claro a cuminsa di awor caba pa hinca miedo den Pueblo door di menasa cu esun cu no kier esaki mester bira independiente. No ta pornada cu ya caba den Tweede Kamer bo ta haya politico ta papia cu nan kier bay Nacionnan Uni pa libra Hulanda for di e otro Paisnan den Reino. E motibo pa tur esaki ta simpel. Hulanda kier haci negoshi riba cabes di e Pueblo di Aruba, pero e no kier wordo atendi pa e comunidad internacional pa su fayonan ora cos bay robes. Di e manera aki por saca un probecho maximo y mas cu claro Minister Eman, cu nunca ta defende Aruba, ta keda un ficha importante pa haci tur e cambionan aki un realidad. Cu tempo nos lo realisa cu mescos di tempo di welga di hamber y e introduccion di CFT, e drama rond di e nombracion di e Gobernador nobo tabata nada mas cu un smokescreen pa otro cambionan cu e Pueblo di Aruba mester bay guli manda abou.

18 oktober 2016

Expresionnan haci den e articulo aki no necesariamente ta refleha opinion di ArenaPoliti.co