{idkey=321b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4391-parlamentario-mr-xiomara-maduro-mep-pa-un-capricho-gabinete-eman-ta-neglishando-e-salud-di-e-habitantenan-di-parkietenbos%3FItemid%3D101][title=Parlamentario+mr.+Xiomara+Maduro+%28MEP%29%3A+Pa+un+capricho+Gabinete+Eman+ta+neglishando+e+salud+di+e+habitantenan+di+Parkietenbos][desc=+E+salud+di+habitantenan+di+Parkietenbos+ta+wordo+neglisha+severamente+pa+Gabinete+Eman.+Despues+cu+nan+a+sobotia+e+proyecto+di+reduci+sushi+na+e+dump+na+Parkietenbos+desde+2009+e+Gobierno+aki+no+a+haci+nada+mas+pa+trece+un+solucion+pa+e+dump.+E+sero+di+sushi+a+keda+crece+constantemente%2C+sushi+ta+cay+den+lama%2C+tur+siman+tin+candela+den+e+dump+cu+ta+manda+holor+malo+y+mahos+bista+pa+nos+Pais.+Pero+mas+lamentabel+ta+cuanto+problema+e+dump+aki+ta+trece+pa+e+salud+y+bienestar+di+e+famianan+biba+den+]}
E salud di habitantenan di Parkietenbos ta wordo neglisha severamente pa Gabinete Eman. Despues cu nan a sobotia e proyecto di reduci sushi na e dump na Parkietenbos desde 2009 e Gobierno aki no a haci nada mas pa trece un solucion pa e dump. E sero di sushi a keda crece constantemente, sushi ta cay den lama, tur siman tin candela den e dump cu ta manda holor malo y mahos bista pa nos Pais. Pero mas lamentabel ta cuanto problema e dump aki ta trece pa e salud y bienestar di e famianan biba den cercania di e dump. Tristo ta cu tur e molester y e peliger pa salud aki ta djies pa un capricho di Gabinete Eman.

Tur hende ta laba man
E Gobierno aki ta propaganda como uno berde y sostenibel, pero no a percura despues di 7 aña na mando pa bin cu un solucion pa e problemanan na dump. E lugar a bay for di man. E dump ta constantemente na candela y e huma aki ta treciendo problema pa salud di e habitantenan di Parkietenbos. Nos tin hopi tempo ta cuestionando e crimen aki di Gabinete Eman, pero tur hende ta laba man. Minister Sevinger ta just sinta chercha di e situacion y ta just bisa cu Aruba a tira 28 miyon afor, Minister De Meza no ta move un dede pa proteccion di nos medio ambiente y no ta worry cu e hecho cu sushi di dump ta cay den lama y ta afecta hende y tambe nos mangelnan y mas tristo ta cu Minister Schwengle di Salubridad como un docter y riba dje un specialista di long nunca ta papia riba e danio cu e huma di dump ta ocaciona na e habitantenan di Parkietenbos. Pa no papia mes di Minister Eman cu ta gaba rond di mundo cu sostenibilidad di nos Pais, siendo cu ni un un dump drechi nos tin. Pues tur ta laba nan man riba e problemanan na dump, ma esnan biba den e vecindario ta keda bira victima di e negligencia di e mandatarionan aki.

Ecogas no a trece solucion
Nos no por sigi asina y Gobierno tin un obligacion moral pa presenta un solucion pa e problema aki. E ta bisto cu e proyecto di Bouldin & Lawson pa reduci sushi den forma di fluff a wordo boycotea pa asina e dump aki por bay den man of pa uso di e proyecto di Ecogas pa kima e sushi y manda e gas cu ta wordo produci pa WEB. Esaki ta un capricho cu Gabinete Eman desde day one tabata haci todo por todo pa cumpli cune. Ma e proyecto aki parce di a fracasa, ya cu ningun Minister a sali gaba bisa cu e proyecto aki ta un exito. Nos no mester lubida cu WEB a hinca 15 miyon den e proyecto aki y hasta bay den problema financiero cu a pone cu no a baha tarifa di awa y coriente na nos Pueblo. Pues un hende mester sali splica kiko ta pasando cu e proyecto di Ecogas y pakiko e no a trece e solucion cu a premira.

Mester castiga esnan responsabel
E sabotahe di e dump aki ta un crimen. E asunto aki merece di wordo investiga pa Parlamento di Aruba sea interpelando e Ministernan concerni of door di haci un encuesta parlamentario. Ta 7 aña caba cu nos Pueblo ta wordo teni den scur pa e asunto di dump aki. Sushi ta wordo kima y gasifica y gas ta bay den aire cu holor malo siendo cu ningun instancia ta bisa si esaki ta dañino pa salud. E molester pa e habitentenan ta birando cada dia mas grandi y nan salud ta na peliger. Nos no por sinta man crusa y laga esnan culpabel di e crimen aki keda sin wordo castiga.

30 oktober 2016

Expresionnan haci den e articulo aki no necesariamente ta refleha opinion di ArenaPoliti.co