{idkey=9676b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F443-booshi-wever-calidad-di-cuido-na-aruba-lo-mehora-cu-un-conferencia-manera-palabra-na-ipko%3FItemid%3D101][title=Booshi+Wever+%28UPP%29%3A+Calidad+di+cuido+na+Aruba+lo+mehora+cu+un+conferencia+manera+palabra+na+IPKO%3F][desc=Parlamentario+sra.+Mervin+Wyatt-Ras+parce+di+no+ta+comprende+e+materia+di+salubridad%2C+of+e+no+tin+oido+pa+e+critica+insistente+di+nos+pueblo+entorno+e+calidad+di+cuido+cu+ta+ser+ricibi+na+Aruba.+E+parlamentario+a+%E2%80%9Clogra%E2%80%9D+durante+e+encuentro+di+IPKO+pa+minister+di+Salubridad+di+Aruba+organisa+un+congreso+cu+e+meta+principal+pa+haci+palabracionnan+concreto+con+pa%3A1.+logra+mihor+cooperacion+entre+e+paisnan+den+Reino+pa+medio+di+protocolnan+y+MoU%E2%80%99s%3B2.+garantisa+calidad+di+cuido+halto%3B3.+baha+g]}Parlamentario sra. Mervin Wyatt-Ras parce di no ta comprende e materia di salubridad, of e no tin oido pa e critica insistente di nos pueblo entorno e calidad di cuido cu ta ser ricibi na Aruba.

E parlamentario a “logra” durante e encuentro di IPKO pa minister di Salubridad di Aruba organisa un congreso cu e meta principal pa haci palabracionnan concreto con pa:



1. logra mihor cooperacion entre e paisnan den Reino pa medio di protocolnan y MoU’s;
2. garantisa calidad di cuido halto;
3. baha gasto dor di entre otro traha hunto pa loke ta trata diferente specialisacion;
4. baha gasto dor di compra di servicio, medicamento y instrumentonan medico conhuntamente.

E parlamentario a declara en corto cu e lo kier waak un salubridad di calidad halto cu menos costo y mas cerca di nos isla posibel. Mi sa cu esaki ta e “cabay di campaña” di e parlamentario, pero mi ta convenci cu e parlamentario lo mester haci su huiswerk un tiki mas mihor. Na promer lugar e cuido riba e islanan mes mester mas atencion. Nos tin pa 5 aña un gobierno y dos minister di salubridad cu a neglisha salubridad por completo. E minister anterior a stop tur actividad na ImSan y a priminti cu lo bin cu un Centro di oncologia, pero te ainda net nada, y e aparatonan sofistica y di technologia avansa ta para frustia den e edificio di ImSan. E minister actual a haña caba un “brevet van onvermogen” di Raad van Advies y te ainda ta wardando riba plannan concreto pa mehora e calidad di cuido na Aruba mes.

Awor e parlamentario a declara cu kier garantisa un bon calidad di cuido, pero e no mag di costa placa. Ta manera sra. Wyatt-Ras kier laga nos compronde cu: E KIER GANA LOTTO, PERO SIN CUMPRA UN LOT!! Salubridad mundialmente lo sigui mira un crecemento di costo, y Aruba lo no keda atras si nos tene na cuenta e “vergrijzing”, e aumento di problemanan cardio-vascular door di diabetes, presion halto y obesidad, y un mehoracion tecnologico cu tratamentonan costoso pa e.o. cancer.

Na Corsou e enfermeronan di e sala di emergencia a bay den accion dia 13 di januari 2015, pasobra nan no tin e capacidad ni formacion pa atende cu patientnan critico cu no por wordo admiti na ICU of CCU (problema di curazon) pasobra nan ta yen. Atrobe ta señala un aumento di patient, tambe na Corsou, cu problemanan complica cu mester di mas cuido, y no tin lugar.

Gobierno di Aruba representa pa nos minister di salubridad, a “atende y soluciona” e problema aki door di inverti MENOS den salubridad ya cu door di e maneho desastroso di gabinete Mike E. e debe di pais Aruba a redobla, y mester a tuma medida di austeridad riba tur departamento cu excepcion di turismo. Igualmente a prefera di reparti gran parti di e presupuesto pa e architecto y contratista cu lo bay traha na renovacion di hospital. Ta p’esey sra. Wyatt-Ras, e 1% di BBO mester a bin, y NO pa cubri e gastonan adicional di AZV pa nos cuido cu tur aña lo sigui aumenta.

Pa finalisa mi kier ta hopi cla: mehoracion di cooperacion entre e islanan ta semper bonbini, pero por fabor ban analisa prome mihor e situacion local di salubridad. Nos NO tin un salubridad di 5 strea, pero nos tin si un problema di maneho di 5 strea door di e minister actual di salubridad, cu by the way kier regresa atrobe eherce su profesion di longarts.

Lo ta bon pa e parlamentario haci pregunta na e minister con ta para cu e peticion cu e a haci pa funciona parttime como longarts, pero tambe pa haci pregunta con ta para cu e investigacion haci pa posibel casonan fraudulento na sala di operacion di hospital, y tambe con ta para cu Landslaboratorium, financiamento di SABA y e Centro oncologico na ImSan.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, 14 januari, 2015

Expresionnan haci den e articulo aki no necesariamente ta refleha opinion di ArenaPoliti.co