{idkey=9923b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4532-evelyn-wever-croes-mep-14-di-esnan-riba-65-ana-ta-haya-problema-di-memoria%3FItemid%3D101][title=Evelyn+Wever-Croes+%28MEP%29%3A+14%25+di+esnan+riba+65+a%C3%B1a+ta+haya+problema+di+memoria][desc=MEP+a+entrega+mocion+pa+actua+awor%2C+pa+e+no+bira+mas+halto%21%26amp%3Bnbsp%3BORANJESTAD+%E2%80%93+Hopi+biaha+ta+wordo+bisa+cu+edad+ta+bin+cu+perdida+di+memoria.+Sinembargo+esaki+no+mester+ta+asina.+Mundialmente+un+averahe+di+14%25+di+e+poblacion+riba+65+a%C3%B1a+ta+sufri+di+problemanan+neurocognitivo%2C+cu+por+conduci+na+perdida+di+memoria.+Na+Aruba%2C+segun+%E2%80%9CCentraal+Bureau+voor+de+Statistiek%E2%80%9D+%28CBS%29%2C+e+cantidad+di+personanan+riba+65+a%C3%B1a+lo+redobla+na+2030+compara+cu+2015+y+consecuentemente+e+cantidad+di+personanan+cu]}
MEP a entrega mocion pa actua awor, pa e no bira mas halto! 

ORANJESTAD – Hopi biaha ta wordo bisa cu edad ta bin cu perdida di memoria. Sinembargo esaki no mester ta asina. Mundialmente un averahe di 14% di e poblacion riba 65 aña ta sufri di problemanan neurocognitivo, cu por conduci na perdida di memoria.
Na Aruba, segun “Centraal Bureau voor de Statistiek” (CBS), e cantidad di personanan riba 65 aña lo redobla na 2030 compara cu 2015 y consecuentemente e cantidad di personanan cu problemanan neurocognitivo tambe lo redobla pa 2030. 

“Pesey den Parlamento mi a trese e punto aki padilanti. Na Aruba nos mester tuma accion awor pa prepara un Plan Nacional pa enfrenta e aumento drastico aki. Nos no por sinta man crusa.
Nos a reuni cu sra. Melva Croes-Yanez y sr. Robby Croes di Fundacion Alzheimer Aruba (FAA), cu a duna un presentacion cu a causa un impacto riba nos, y ta a base di esey cu nos a dicidi cu mester tuma accion awor.

E prome paso cu mester tuma ta di haci investigacion pa identifica ki maneho ta bay hiba y kico ta e obhetivonan y cambionan di maneho existente cu ta forma parti integral di un Plan Nacional.
E Plan Nacional mester defini e asina yama “care pathway” den cua ta stipula con lo atende e problema aki y con ta coordina ehecucion di e plan.

PAHO y WHO ta aplicando un “Health Agenda for the Americas 2008-2017” pa sigura e calidad di bida di personanan di 65+ door di duna e cuido necesario riba termino cortico, medio y largo.
Hasta tin fondonan cu a wordo poni disponibel door di PAHO y WHO pa entre otro desaroya plannan nacional.
Nos di MEP den Parlamento kier mira cu accion contra “Neuro Cognitive Disorders” wordo poni halto riba agenda di gobierno.
Den nomber di nos fraccion, mi a entrega un mocion pa urgi Gobierno di Aruba pa compromete su mes pa pone accion contra “Neuro Cognitive Disorders” halto riba agenda di gobierno y tambe pa prepara un Plan Nacional y e “care pathway” pa Aruba y presenta esaki na Parlamento mas pronto cu ta posibel.
Cu esaki nos como pais lo defini cu di berdad nos tin cuido di nos grandinan na pecho”, segun lider di MEP Evelyn Wever-Croes.

Ta importante pa tur hende compronde y tuma nos grandinan cu ta sufri di problemanan neurocognitivo, cu por conduci na perdida di memoria, na serio.

“Minister Schwengle su reaccion den Parlamento sinembargo tabata decepcionante. En bes di subraya e importancia di e tema, a hunga poltica barata cu salud di nos ciudadanonan.
En bes di mustra compasion pa e problemanan aki, a dedica su tempo na insulta mi persona, chercha mi y gaba cu e sa mas cumi.
Ami no a baha na su nivel y na final mi a urgi e minister pa ban duna atencion na e problematica aki. Nos tin e profesionalnan. Nos por haya fondo di PAHO y WHO. No ban laga e oprtunidad aki pasa”.

“Den reunion tambe mi a probecha pa repasa e vision di partido Movimiento Electoral di Pueblo pa cu nos grandinan. Nos lo elimina belasting riba pensioen di biehes, pa asina alivia nos pensionadonan cu e peso di belasting. Nos lo baha edad di pensioen, pa asina na un edad reasonable, nos grandinan por baha cu pensioen y gosa di un pensioen bon mereci.
Y nos ta compromete nos mes pa brinda un mihor cuido pa nos grandinan, na cas of den centronan di cuido. “To care for those who once cared for us is one of the highest honors”.
Pa mi sigur ta e honor di mas grandi, y nos lo pone den practica”, Evelyn Wever-Croes a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co