{idkey=4449b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4565-evelyn-wever-croes-mep-aruba-lo-gosa-atrobe-di-prosperidad-seguridad-y-dignidad%3FItemid%3D101][title=Evelyn+Wever-Croes+%28MEP%29%3A+Aruba+lo+gosa+atrobe+di+prosperidad%2C+seguridad+y+dignidad][desc=LIDER+DI+MEP+CU+DISCURSO+ELOCUENTE+Y+INSPIRATIVO+%26amp%3Bnbsp%3B+%26amp%3Bnbsp%3BDen+Parlamento+diahues+ultimo+Lider+di+MEP+Evelyn+Wever-Croes+a+duna+un+discurso+elocuente%2C+y+cu+sigur+a+inspira+tur+cu+a+scuche%2C+apesar+cu+el%26%23039%3Ba+wordo+interumpi+frecuentemente+pa+oponentenan+politico.%26amp%3Bnbsp%3BNos+ta+comparti+e+discurso%2C+tresiendo+speransa+den+comunidad.%26amp%3Bnbsp%3B%26quot%3BMi+kier+pidi+nos+concuidadanonan%2C+pa+no+perde+speransa.+Pasobra+mescos+cu+despues+di+cualquier+tempestad+solo+ta+sali+atrobe%2C+despues+di+e+tempestad+cu+yama+gabinet]}
LIDER DI MEP CU DISCURSO ELOCUENTE Y INSPIRATIVO    

Den Parlamento diahues ultimo Lider di MEP Evelyn Wever-Croes a duna un discurso elocuente, y cu sigur a inspira tur cu a scuche, apesar cu el'a wordo interumpi frecuentemente pa oponentenan politico. Nos ta comparti e discurso, tresiendo speransa den comunidad. 

"Mi kier pidi nos concuidadanonan, pa no perde speransa. Pasobra mescos cu despues di cualquier tempestad solo ta sali atrobe, despues di e tempestad cu yama gabinete Mike Eman, solo lo sali atrobe, pa nos recobra nos prosperidad, nos seguridad y nos dignidad. MEP tin e vision y e solucion.

Pa prome nos lo enfoca riba dos area importante: e area financiero y e área di integridad. Pa SANEA FINANSAS DI PAIS ARUBA, nos lo baha di 9 pa 7 minister y cantidad di consehero pa cada minister. Nos lo para biahenan y gastonan inecesario y di luho di y contrato y proyectonan cu no tin prioridad. Nos lo elimina tur e diferente fondonan, manera fondo di turismo y incorpora nan bek den presupuesto di pais Aruba. Asina so nos por bai refinancia y restructura e debe nacional cu un plan di rescate pa por haya interes abou

PA RECORBRA INTEGRIDAD DEN GOBERNACION nos lo bin cu leynan di screening di político, pa evita cu nos ta haya gobernantenan corupto envolví den tur clase di escandalo cu ta pone nos pais su cara na berguensa. Tambe e ley pa regula financiamento di partidonan político, pa evita cu placa di baho mundo ta dicta den gobernacion. Nos lo introdusi un control estricto riba integridad di gobernantenan y un ministerio publico cu ta investiga gobernantenan y ex-gobernantenan SIN MIEDO.

Esakinan ta e dos pilarnan riba cual nos ta bai construi un Aruba mihor, y bienestar pa tur y riba tur tereno:

NOS KIER UN ARUBA MAS SIGUR. Pa logra esaki nos ta cuminsa cu un control hopi mas estricto di nos costanan , y duna Warda Nos Costa material y autoridad, y despues enfoca mas riba prevencion, mas “blauw” riba caya. Pa hasi e area hotelero mas atractivo, polis especialmente orienta riba turista. Nos lo equipa Cuerpo Policial cu suficiente personal y material pa por combati criminalidad; nos lo trese orden y respet pa nos Cuerpo Policial cu awor ta gana menos cu un coordinador cu ta gana 9 mil florin. Y nos mester duna prioridad tambe na combati adiccion y brinda e guia y tratamento cu cada adicto mester.

NOS LO BAHA COSTO DI BIDA, y pa logra esaki nos lo amplia e canasta basico y control mas riguroso di prijs di productonan basico. Nos lo baha prijs di awa y coriente, buscando e mescla ideal pa Aruba di energía limpi. Nos enfasis mester cambia di e aventuranan "green" carísimo, pa e solucionnan “clean and affordable”. 

Nos lo cobra belasting na tempo, duna placa bek tambe na tempo, y paga interes ora gobierno debebo placa. Elimina belasting riba pensioen di biehes, y baha edad di pensioen bek na 62 aña.

NOS PUEBLO MERECE UN MIHOR CUIDO, pa logra esaki nos lo bin cu centro medico  y di diagnostico den area di Paradera/Santa Cruz. IMSAN mester bira un hospital, proyectonan di OK y centro di oncologia. NOs lo percura pa mas dokter di cas, mas specialista y mas enfermero, pa asina e lista di espera bira mas cortico, y traha mas shifts den hospital di por ehempel 7 am pa 7 pm, pa hasi testnan necesario. Lo bin un miho maneho di gastonan di AZV. Y na nos grandinan nos lo duna cuido digno pa nos grandinan den casnan di cuido, y pa esnan cu ta biba na cas tambe. 

NOS MESTER MEHORA CALIDAD DI ENSEñANSA, pa logra esaki nos lo hasi enseñansa accesible pa TUR studiante. Nos lo dirigi enseñansa riba necesidad di trabou na Aruba. Nos lo percura pa tin mas asistencia social na scolnan y asina docentenan por concentra riba duna les. Digitalisa Enseñansa cu smart boards, tablets y I-pads lo haya prioridad, y Noord lo haya si MAVO/HAVO.

NOS MESTER CREA MAS EMPLEO Y MESTER STIMULA DESAROYO ECONOMICO  CON LO HASIE? Semper nos a lucha pa re-apertura di e refinería, y nos ta satisfecho cu e re-apertura pero cauteloso, pasobra nos no a mira e prosperidad cu e refineria lo trese ainda pa nos cuidadanonan; nos si lo percura pa esey. Mes momento nos ta compromete pa cuida nos medio ambiente y exigi di TUR inversionista cu ta interesa di inverti den nos pais, c unan mester tene nan mes na standardnan. Nos lo crea empleo pa nos hobennan y studiantenan den exterior, y hasi’e atractivo pa nan bolbe bek Aruba. Nos lo bin cu un banco di desaroyo pa empresanan chikito y mediano, pa duna asistencia y guía na cada cuidadano cu kier habri su empresa of su fabrica. E banco aki lo no presta placa so, sino lo yuda cu tur asistencia legal y consehonan financiero pa e empresa por ta exitoso. Enfasis lo wordo duna tambe na agricultura, cria y pesca. Nos lo enfoca bek riba turismo di calidad y no cantidad so, tresiendo mas cupo di trabou y prosperidad pa tur. MEP lo percura pa dialogo REAL dunando un participacion REAL cu sindicato y gremionan.

Nos lo percura pa SOLO SALI PA NOS TUR, pa nos muchanan, pa nan por haya ensenjansa riba bon nivel, y cu nan diplomanan ta wordo reconosi den exterior; pa nos hobennan tin oportunidad di recreación sano, y oportunidad di empleo; pa nos mamanan soltera haya sosten  necesario pa nan hiba nan famia padilanti; pa nos grandinan haya e cuido digno cu nan merece.

Concuidadanonan, e reto ta grandi, e caminda ta largo pero e determinacion y e compromiso tey. Na momento cu bo pone e ser humano central di berdad, bo prioridadnan ta cambia. No tin prioridad mas na asfalt, beton y klinkers, tin prioridad pa prosperidad, tranquilidad, y dignidad di e ser humano.Ora MEP goberna no tin KB y no mester di CFT. Aki tin integridad, aki tin responsabilidad y aki tin un equipo di politiconan cu  capacidad cu e vision correcto pa hiba Aruba unda e merece di ta. Un Aruba prospero, un Aruba UNI cu ta convivi den pas y harmonia, pa nos pone Aruba riba e caminda di progreso.

Puntra bo mes, aki 25 anja, ora nos yiunan y nan yiunan husga nos, y nan lo hasi’e, kiko nos lo contesta? Nos lo contesta cu nos a sinta un banda y laga nan caba cu nos pais? Of nos lo contesta cu nos a LANTA PARA y lucha pa nan bienestar?
E 7 parlamentarionan di MEP cu orguyo por lanta y bisa nos a LANTA PARA y lucha pa nan bienestar.

Cu Dios bendiciona nos dushi Aruba"

Expresionnan haci den e articulo aki no necesariamente ta refleha opinion di ArenaPoliti.co