{idkey=3580b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4681-evelyn-wever-croes-mep-avp-ta-prueba-cu-nan-ta-bisa-un-cos-y-nan-ta-hasi-otro-cos%3FItemid%3D101][title=Evelyn+Wever-Croes+%28MEP%29%3A+AVP+ta+prueba+cu+nan+ta+bisa+un+cos%2C+y+nan+ta+hasi+otro+cos][desc=MIKE+EMAN+TA+HASI+PROMESA+FALSO+NA+HABITANTENAN+DI+PARKIETENBOS%3F%26amp%3Bnbsp%3BSTA+CRUZ+%E2%80%93+Lider+di+MEP+Evelyn+Wever-Croes+tambe+a+reacciona+tocante+e+welga+na+Serlimar.+%E2%80%9CNos+ta+sostene+e+lucha+di+empleadonan+na+Serlimar.+Ta+un+acto+hopi+cruel+y+di+sin+gevoel+ora+un+prome+minister+ta+anuncia+den+porta+di+fin+di+anja+cu+ta+bai+sera+Serlimar+poniendo+asina+e+pan+di+tata+y+mamanan+di+famia+na+peliger.Gabinete+Mike+Eman+a+faya+e+habitantenan+di+bario%2C+Mike+Eman+a+faya+e+empleadonan+di+Serlimar%2C+y+gobierno]}
MIKE EMAN TA HASI PROMESA FALSO NA HABITANTENAN DI PARKIETENBOS? 

STA CRUZ – Lider di MEP Evelyn Wever-Croes tambe a reacciona tocante e welga na Serlimar. “Nos ta sostene e lucha di empleadonan na Serlimar. Ta un acto hopi cruel y di sin gevoel ora un prome minister ta anuncia den porta di fin di anja cu ta bai sera Serlimar poniendo asina e pan di tata y mamanan di famia na peliger.Gabinete Mike Eman a faya e habitantenan di bario, Mike Eman a faya e empleadonan di Serlimar, y gobierno a faya henter Aruba ora ta trata e tema aki. Un partido cu a promove tur cos “green”, pero cu su hechos ta demostra net contrario. Mike Eman y su gobierno a inverti miyones di placa di pueblo den promove un sonjo “green”, pero no por a realisa nada di e sonjo ey. Prueba ta e candela y huma cu ainda tin na e dump na Parkietenbos, siendo cu na 2009 bou di gobierno di MEP a paga e candela ey. Ta e negligencia di gabinete Mike Eman a pone cu nos a cai bek na e situacion prome cu 2009. Mihor el’a inverti e placa ey den hasi Aruba mas sigur, of den ensenjansa, of den construi cas pa pueblo” segun lider di MEP.

HABITANTENAN 
“Nos di MEP tin 7 anja ta bishita e vecindario, y ta exigi atencion pa e problema cu e habitantenan ta biba aden. Ultimo biaha cu ami a bai dump pa denuncia e problema, nan a manda bewaker core cumi, pasobra mi no tabata mag di graba eynan. Mi coleganan tambe a wordo cori na mal forma. Nos peticionnan pa reuni cu Serlimar te dia di awe no a wordo honra. Tur esaki den un intento di parti di gobierno di AVP pa sconde e problema. Porfin e plegaria di habitantenan a wordo scucha, y Mike Eman a anuncia cu lo sera dump dia 1 di januari 2017, pero a costo di kiko? Y pa beneficia ken?
PROMESA FALSO, SIN ESTUDIO NI PLAN 
Awor cu empleadonan a pone trabou abou a bin resulta cu Mike Eman a djis hasi un promesa falso, un di e tanto nan, pasobra e no tin ningun plan kiko pa hasi cu  sushi di Aruba despues di 1 di januari 2017. Claro cu nos tur ta contento cu e habitantenan y trahadornan no mester sufri mas bou di e condicionnan ey, pero e promesa ta realistico? Y kiko ta bin na su lugar?

ECOGAS NO POR PROCESA TUR SUSHI DI ARUBA
Awor Mike Eman kier regala tur sushi di Aruba pa Ecogas, siendo cu den un reunion recien cu Ecogas nan a mustra nos cu Ecogas NO por procesa tur e sushi di Aruba. Kiermen eynan bo ta mira cu Mike Eman a core bisa algo cu e no por cumpli cun’e.
Ademas, con e por bai regala tur sushi na Ecogas, siendo cu esey ta e fuente di entrada pa Serlimar?
Mike Eman en todo caso a demostra un cos: cu e ta bisa un cos y e ta hasi otro cos. Cu e no tin interes at all pa yuda habintantenan, ni yuda Serlimar. Mike Eman su UNICO interes ta complase esnan serca di dje, y ken cu e mester trapa riba dje den su caminda, e ta hasi’e. den porta di fin di anja, esaki ta un acto hopi cruel pa hasi contra habitantenan, pero mas aun contra empleadonan di Serlimar” Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co