{idkey=2403b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4766-joselin-croes-por-mester-obliga-pais-aruba-contesta-tur-peticion-dentro-di-4-luna%3FItemid%3D101][title=Joselin+Croes+%28POR%29%3A+Mester+obliga+Pais+Aruba+contesta+tur+peticion+dentro+di+4+luna][desc=+Actualmente+varios+departamento+di+Gobierno+ta+tumando+entre+6+luna+pa+1+anja+pa+contesta+cualkier+peticion+pa+permiso+cu+wordo+pidi.+Esaki+no+ta+solamente+inaceptabel+pero+e+ta+enpugne+cu+e+intencion+di+nos+Lar+%28Landsverordening+Administratieve+rechtspraak+AB+1993%2C+45%29.+Conforme+e+Lar%2C+Pais+Aruba+tin+12+siman+pa+por+aproba+of+nenga+un+peticion+hasi+na+Pais+Aruba.+Si+Pais+Aruba+no+contestabo+dentro+di+e+12+siman%2C+esaki+lo+wordo+considera+como+cu+Pais+Aruba+a+nenga+bo+peticion+%28%E2%80%9Cfictieve+weige]}
Actualmente varios departamento di Gobierno ta tumando entre 6 luna pa 1 anja pa contesta cualkier peticion pa permiso cu wordo pidi. Esaki no ta solamente inaceptabel pero e ta enpugne cu e intencion di nos Lar (Landsverordening Administratieve rechtspraak AB 1993, 45). Conforme e Lar, Pais Aruba tin 12 siman pa por aproba of nenga un peticion hasi na Pais Aruba. Si Pais Aruba no contestabo dentro di e 12 siman, esaki lo wordo considera como cu Pais Aruba a nenga bo peticion (“fictieve weigering”). E persona cu a entrega e peticion tin e ora 8 siman pa bai encontra (“bezwaar”) di e desicion aki. Pais Aruba na su turno tin 12 siman atrobe pa contesta bo “bezwaar”. Si Pais Aruba no contesta bo bezwaar ni tampoco a aproba of nenga bo peticion, e ora esun cu a hasi e peticion tin 8 siman pa apela e caso na  Corte di Prome Instancia di Aruba. Esaki significa cu si por ehempel abo kier habri un restaurant na Aruba, bo mester prome cu tur cos incorpora un compania na Notaris, esaki lo dura 2 pa 3 luna, despues pidi un permiso di compania (“vestigingsvergunning”). Si e un di e donjonan ta stranjero bo mester pidi tambe un permiso di director (“directeursvergunning”).  Esaki ta wordo pidi na DEZHI y ta dura normalmemnte 2 pa 3 luna, pero si ta trata di un projecto grandi cu mester aprobacion di un of otro Minister esaki por dura te cu 1 anja. Un otro permiso cu bo tin mester ta esun pa construccion di bo edificio, cual mester wordo pidi na DOW. Esaki tambe por tarda entre 4 luna pa 1 anja.  Tambe bo mester un permiso pa restaurant cual mester wordo pidi na DWJZ, cual mester previo aprobacion di Polis, Volksgezondheid, Brandweer y Inspectie. Esaki por tarda entre 4 luna pa 1 anja. Awor si bo mester di un chef kok internacional pa traha den bo restaurant bo mester bai DPL y DIMAS pa un permiso di trabou. Esaki por dura entre 6 luna pa 1 anja tambe. Entretanto bo luga ta cla, bo empleadonan ta cla pa cuminsa traha y bo ta mara paso bo permisonan no ta cla. Pa un empresario chikito cu no tin capacidad di wanta 6 luna sin un entrada esaki ta funesto, pa e trahado esaki kiermeen cu e no por cuminsa traha y pa e caha di gobierno esaki kiermeen cu e no ta genera e entradanan di belasting cu e lo a genera si e luga por a habri na ora. Esaki ta un loose,  loose situacion pa tur esnan envolvi. Y ora bo reclama y puntra tur e departamentonan aki pakico e ta dura asina tanto pa duna un contesta riba un peticion, e ta semper falta di personal, trahado ta malo y of un ta punta dede riba otro.

E ley awo ta na beneficio di Pais Aruba y no na beneficio di e rubiano. Awo e rubiano mester bai Lar y of corte gasta miles di florin na abogado pa asina obliga Pais Aruba tuma un decision riba un peticion. A bira ora pa proteha e inversion di e rubiano y obliga Pais Aruba pa pone tur su departamentonan traha mas eficiente y mas liher.

Nos por soluciona e problema aki den dos forma. Of bo ta cambia e Lar mescos cu Hulanda a hasi den su Awb y bisa si despues di 4 luna Pais Aruba no tuma un desicion e ora e permiso no ta wordo qualifica como nenga y e persona cu e entreha e peticion por bai directamnete corte di Prome Instancia pa exigi Pais Aruba tuma un desicion, of nos por introduci un boet (“dwangsom”)  di un suma considerabel pa cada dia cu pasa despues di 4 luna cu Pais Aruba no cumpli di contestabo riba bo peticion te na e dia cu Pais Aruba contestabo cu un si of un no. Esaki lo obliga departamentonan manera DIMAS, DEZHI, DOW, DIP,  DPL, DWJZ y tur otro departamento cu ta entrega y ta trata cu peticionanan (“vergunning”) pa traha mas lihe y mas eficiente paso e ora nan tin un deadline pa cumpli cune.

Expresionnan haci den e articulo aki no necesariamente ta refleha opinion di ArenaPoliti.co