{idkey=3066b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5239-marisol-lopez-tromp-por-minister-presidente-a-retira-profesionalnan-pa-motibo-netamente-politico%3FItemid%3D101][title=Marisol+Lopez-Tromp+%28POR%29%3A+Minister+Presidente+a+retira+profesionalnan+pa+motibo+netamente+politico][desc=E+candidato+riba+lista+di+POR+e+Plataforma+Forza+Nobo+drs.+Marisol+Lopez-Tromp+a+haci+declaracionnan+fuerte+y+contundente+durante+e+rueda+di+prensa+di+diamars.+El+a+papia+tocante+e+retiro+di+diferente+miembro+di+hunta+di+comisarionan+di+companianan+cu+ta+representa+gobierno%2C+y+cu+a+wordo+nombra+tempo+cu+Otmar+Oduber+a+fungi+como+minister+di+e+carteranan+Turismo+y+Transporte%2C+cu+ta+e+sectornan+cu+a+keda+afecta+cu+retiro+di+profesionalnan.%26amp%3Bnbsp%3BLopez-Tromp+no+a+toca+e+parti+huridico+pero+si+kico+e]}
E candidato riba lista di POR e Plataforma Forza Nobo drs. Marisol Lopez-Tromp a haci declaracionnan fuerte y contundente durante e rueda di prensa di diamars. El a papia tocante e retiro di diferente miembro di hunta di comisarionan di companianan cu ta representa gobierno, y cu a wordo nombra tempo cu Otmar Oduber a fungi como minister di e carteranan Turismo y Transporte, cu ta e sectornan cu a keda afecta cu retiro di profesionalnan. 

Lopez-Tromp no a toca e parti huridico pero si kico esaki ta nifica pa e tendencia cu gobierno aworaki ta tumando riba institutonan imparcial autonomo, manera fundacionnan y otro instancianan estatal y independiente, cu tin nan propio bestuurs y directornan. Lopez- Tromp a bisa cu ta un secreto publico cu basta tempo caba gobierno, y muy en particular  Minister Presidente, ta pretende di por mete of por drenta y duna opdracht directamente den cierto Institutonan, fundacionnan of companianan estatal. 

Loke ta e kehonan cu mi ta tende riba esaki, pero loke ta mas cla ainda y mester ta cla pa pueblo, ta cu diferente di e personanan cu ta traha sea den directivanan of bestuurs, a wordo nombra a base di nan profesionalismo y di un profil caminda cu nan ta wordo nombra pero nan ta pasa den screen prome cu haya trabao, si nan ta cumpli cu cierto exigencianan pa por haci e trabao aki” segun Lopez- Tromp.

A trece dilanti cu hopi bez e instituto, instancia of fundacion tin cu cumpli cu bon gobernacion, loke ta nifica cu hopi biaha hasta screening ta tuma lugar riba e instancianan, incluso Banco Central ta wak si e personanan aki ta cumpli cu cierto exigencianan prome cu nan wordo tuma den e funcionnan aki, no obstante cu ta un minister of gobierno kier nombra su miembronan eyden. El a mustra cu e retironan cu a tuma lugar den ATA, ANSA, Arubus y Triple A no ta nan so, pasobra tin mas instituto y lugarnan cu ta wordo manca no pasobra e personanan aki lo no a haci nan trabao bon, no pasobra nan a faya, no pasobra nan a haci un eror, pero netamente pa motibonan politico ta loke a tuma lugar recientemente. 

E razon ta cu Minister Presidente ta kere cu e por, pa mete den asuntonan cu ni ta di su competencia caminda por ta mester sigui otro procedure, ta bisa ken ta wordo tuma of nombra den cierto instituto, den cierto puesto. Na momento cu esaki sosode of e haci esaki y esaki no a wordo sigui pa instancianan, bo ta haya un problema caminda e ta sinti cu e por sea hala e trahadornan un banda, kita nan, of hasta presiona of menaza nan. “Esaki ta e realidad cu ta tumando lugar aworaki na 2017” Marisol Lopez- Tromp a exclama. 

Expresionnan haci den e articulo aki no necesariamente ta refleha opinion di ArenaPoliti.co