{idkey=6348b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F530-mep-pregunta-na-e-politiconan-envidioso-di-avp-cuanto-scol-cas-social-cas-di-anciano-warda-di-polis-y-parke-deportivo-a-ser-construi-pa-avp-durante-e-ultimo-6-ananan%3FItemid%3D101][title=MEP%3A+Pregunta+na+e+politiconan+envidioso+di+AVP%3A+Cuanto+scol%2C+cas+social%2C+cas+di+anciano%2C+warda+di+polis+y+parke+deportivo+a+ser+construi+pa+AVP+durante+e+ultimo+6+a%C3%B1anan%3F][desc=Despues+cu+e+Comision+Financiero+CFT+a+emiti+pa+di+dos+biaha+un+rapport+devastador+relaciona+cu+e+situacion+y+desaster+financiero+crea+pa+Gabinete+Eman%2C+nos+por+a+bolbe+mira+mandatario+y+politiconan+di+AVP+bay+den+defensa+y+cuminsa+tira+skop+pa+loco+den+direccion+di+MEP+y+su+8+a%C3%B1anan+di+gobernacion.+%26amp%3Bnbsp%3BAsina+un+y+tur+por+a+bolbe+scucha+Promer+Ministro+Mike+Eman+for+di+Merca+declara+cu+su+gobierno+a+haya+e+pais+Aruba+den+deterioro+na+final+di+2009.+Sinembargo%2C+si+el+a+haya+Aruba+den+un+situac]}
Despues cu e Comision Financiero CFT a emiti pa di dos biaha un rapport devastador relaciona cu e situacion y desaster financiero crea pa Gabinete Eman, nos por a bolbe mira mandatario y politiconan di AVP bay den defensa y cuminsa tira skop pa loco den direccion di MEP y su 8 añanan di gobernacion.  Asina un y tur por a bolbe scucha Promer Ministro Mike Eman for di Merca declara cu su gobierno a haya e pais Aruba den deterioro na final di 2009. Sinembargo, si el a haya Aruba den un situacion financiero pesimo manera cu e ta pretende, di con  e tempo ey tur instancia internacional manera IMF, Fitch y Standard & Poor’s a elogia e maneho financiero hiba pa Gabinete Oduber y cu nos pais tabata goza di un Credit Rating di A- for di e instancianan aki?

Redoblacion di debenan
Hecho ta cu awe bao di Gabinete Eman nos pais apenas tin un rating di BBB- y un stap leu for di un Junk rating, ya cu nos pais ta den estado di bancarota, danki na e malgastamento y fiamento descabeya di placa door di Gabinete Eman. No ta CFT mes a declara cu bao di Gabinete Eman nos debenan a mas cu redobla for di 40% di GDP na 2009 te 82% na 2014? No ta asina cu CFT a declara cu lo bay dura te cu 2034 cu nos pais lo por bolbe yega na e nivel di 40% di debe di 2009? Y cu den e proximo 20 añanan nos pueblo mester bay sufri cu medidanan drastico y cruel imponi riba nan lomba?  Ta con Mike Eman por a declara cu su gobierno a haya caha di gobierno bashi, siendo cu Gabinete Oduber a laga atras mas cu 150 miyon florin di e restante di placa di Plant N.V., a laga atras mas cu 190 miyon florin di fondonan di FDA, a laga atras 280 miyon florin di placa di BBO riba export di Valero y cu Mike Eman den un locura nunca visto a regala e multinational Valero un suma di 76 miyon florin? Bo mester ta di mente diferente pa declara tanto estupidez asina riba partido MEP!

Logronan di MEP
Tambe den e ultimo dianan nos a haya un parlamentario kende mester ta un berguensa pa henter Parlamento, esta Marlon Sneek ta declara cu durante e 8 añanan di Gabinete Oduber ningun proyecto y/of edificio di gobierno a wordo ehecuta y construi den e pais aki. Ta parce cu Marlon ta un politico ignorante y/of di mala fe, pasobra e cantidad di edificionan cu gobierno di MEP a laga construi durante 8 aña ta visto pa un y tur cu kier mira realidad. Pa duna algun ehempel: Edificio nobo di Belasting y Finansa na Camacuri, edificio nobo di DOW/Kadaster na Sabana Blanco, edificio nobo di ATA na Boulevard, Centrale di Setar, Warda di polis nobo na Noord, Warda di polis nobo y Centro di Husticia na Santa Cruz, edificio nobo di SVB na San Nicolas, edificio nobo di IMSAN na San Nicolas. Y pa no papia mes di tur e scolnan cu a ser construi y renoba durante Gabinete Oduber. Tambe tur e casnan social, casnan di anciano, parkenan deportivo, teleshopnan y parke di molina. Ta ciego mes Marlon ta cu e no ta mira tur e obranan aki?

Berguensa total
Sinembargo lo ta bon pa Marlon splica pueblo cuanto scol nobo, cuanto cas social, cuanto cas di anciano, cuanto parke deportivo, cuanto parke di molina a ser construi durante e ultimo 6 añanan di Gabinete Eman y compara esaki cu e 8 añanan di Gabinete Oduber? Ta un berguensa di marca mayor, ya cu gobierno di AVP no a construi ni un cas social, no a construi ni un scol nobo, no a construi ningun cas pa anciano, no a construi ni un warda di polis nobo, no a construi ni un parke deportivo y ni un parke di molina. E unico dos edificionan cu nan a logra construi tabata e Cocolishi y e ex-Ontvanger y cual financiamento a bay mediante di e fondonan astronomico di FDA (190 miyon) cu gobierno MEP a laga atras na 2009. Por lo demas, nada nada mas! Ta pesey mes CFT den su ultimo rapport a declara cu menos cu 1% di e gastonan total a ser usa pa inverti den e pais aki na 2014 (“De investeringen vanuit de overheidsbegroting zijn gedurende de hele periode laag gebleven en uitgekomen op minder dan 1% van de totale uitgaven in 2014”). No ta un berguensa esaki ta pa Marlon Sneek y e otro politiconan di AVP?

Por ultimo, lo ta bon pa Marlon Sneek splica pueblo na kico y unda e restante di e 99% di e gastonan total di gobierno a bay, ya cu den inversionan siguramente esaki no a ser hinca!

Expresionnan haci den e articulo aki no necesariamente ta refleha opinion di ArenaPoliti.co