UPP a tuma nota di un conferencia cu lo bay tuma lugar na Universidad di Aruba dia 11 di april 2017. E conferencia lo wordo organisa pa un organisacion cu ta carga e nomber “Circular Economy Platform of the Americas”. E contenido di e conferencia ta cuadra completamente cu e empeño cu mi persona, como titular di Salubirdad y Medio-Ambiente, a bin ta desplega den pasado pa soluciona e problema creciente di e desperdicio cu ta keda wordo acumula na e dump na Parkietenbos.
 
Economia circular, contrario na e economia linear, ta re-usa e desperdicionan cu den nos sociedad ta sigui aumenta. Na diferente parte di mundo e aspecto di re-usa desperdicio a conoce un desaroyo impresionante y e motibonan ta facil. Na prome lugar e poblacion mundial ta sigui crece y obviamente e desperdicio tambe. Si no haci nada anto e sero di desperdicio lo surpasa hasta e montaña mas halto di mundo. Na di dos lugar re-usa e desperdicio a resulta di ta un entrada basta importante pa e companianan cu a inverti den e desaroyo BLAUW aki. 
 
Esnan cu a sigui e desaroyo di un economia sostenibel y a inverti en grande den esaki, a bin ta realisa cu e economía GREEN aki no a duna e resultado cu nan a premira. Tin diferente motibo, manera e hecho cu e prijs di crudo a baha considerable y cu te ainda ta sigui haña mas reservanan di petrolio den mundo. Otro motibo ta cu e ganashi di companianan cu a inverti den e economía GREEN, y den nos sistema capitalista ta ganashi ta e meta final, no a surti manera cu a wordo spera. Esey a pone cu companian a cuminsa ta inverti den e economia linear atrobe.
 
E economia blauw conoce su retonan, pasobra e ta nobo y desconoci, pero si evalua en concreto kico e economia circular ta encera anto no por tin ningun otro solucion cu mester hinca mas empeño pa desaroya e tipo di economia BLAUW aki. Awor e topico aki no ta nada nobo pa nos gobierno cu a indoctrina nos pueblo cu e economia sostenibel GREEN como tambe “groeien en niet snoeien”, cu a hinca nos pueblo den un abismo financiero nunca bisto.

A trece TNO Aruba pa supuestamente duna contenido na e vision di e economia GREEN aki, pero banda di un edifico y yen di MoU cu a wordo firma, nunca nos por a waak un intento di TNO pa incorpora e economia circular na Aruba. Alcontrario  awor hasta TNO a cera un deal cu Cuba pa desaroya e economia green na e pais aki. Pues TNO a usa Aruba como "sprinkplank" pa su propio beneficio.
 
UPP ta apoya e desaroyo BLAUW aki por completo pasobra , a pesar cu nos ta un isla chikito, toch nos tambe mester atende cu desperdicio di un forma eficiente y efectivo y alabes  crea e oportunidad pa nos propio entrepeneurs Arubiano participa den un tipo di economia cu lo faborece nan y nos pueblo. Y finalmente nos di UPP hopi orguyoso cu e color blauw cu ta representa e color di nos bandera di Aruba y di nos partido ta bin den luz di dia como un fuente di speransa pa futuro di nos pais.

Partido UPP
Booshi Wever
3 april 2017