{idkey=5859b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5432-parlamentario-chris-romero-mep-pobresa-na-aruba-ta-birando-alarmante%3FItemid%3D101][title=Parlamentario+Chris+Romero+%28MEP%29%3A+Pobresa+na+Aruba+ta+birando+alarmante][desc=E+realidad+cu+nos+ta+bibando+na+Aruba+na+a%C3%B1a+2017+ta+cu+tin+hopi+pobresa+scondi%2C+y+e+gran+parti+di+e+personanan+aki+tin+miedo+of+berguensa+pa+sali+y+bisa+cu+nan+mester+ayudo.+Nos+mesun+hendenan+tin+un+impresion+robes+di+locual+ta+trata+pobresa.+Ora+nos+usa+e+palabra+pobresa%2C+nos+ta+pensa+hopi+liher+riba+locual+nos+ta+wak+na+television.+Pero+pobresa+na+Aruba+ta+ora+un+mucha+ta+bay+scol+tur+dia+cu+hamber%2C+pero+tambe+sin+nada+di+come.Pobresa+na+Aruba+ta+ora+bo+tin+cuatro+diferente+famia+bibando+bo]}
E realidad cu nos ta bibando na Aruba na aña 2017 ta cu tin hopi pobresa scondi, y e gran parti di e personanan aki tin miedo of berguensa pa sali y bisa cu nan mester ayudo. Nos mesun hendenan tin un impresion robes di locual ta trata pobresa.

Ora nos usa e palabra pobresa, nos ta pensa hopi liher riba locual nos ta wak na television. Pero pobresa na Aruba ta ora un mucha ta bay scol tur dia cu hamber, pero tambe sin nada di come.
Pobresa na Aruba ta ora bo tin cuatro diferente famia bibando bou di e mes un dak pasobra nan no tin manera pa busca nan mesun lugar.
Pobresa na Aruba ta ora bo mira casnan cu ta pasa lunas sin awa of coriente, y hopi biaha sin niun di dos.

Hopi biaha nos tin e tendencia di pensa cu pobresa na Aruba ta algo cu ta afecta solamente e comunidad stranhero ariba nos isla, pero no bou nos mesun hendenan. E pensamento aki ta uno robes y e cifranan oficial ta confirma e existencia di pobresa bou di nos arubianonan.

No por ta posibel cu den aña 2017 ainda tin cosnan asina ta sosede aki na Aruba. Na Parlamento mocionan a keda entrega pa yuda NGO´s pa por cumpli cu e demanda grandi di cuminda cu mester pa yuda studiantenan cu ta den necesidad alimenticio, pero lastimamente te cu awe nada a keda hasi.

Pa loke ta trata e problematica di famianan sin awa na nan cas, nos di fraccion di MEP a entrega un mocion caminda ta propone pa instala un reducer den e liña di awa pa asina controla y reduci e fluho y di e manera aki un famia cu debe nunca por keda sin awa. Teniendo na cuenta si cu cada ken lo keda cu e obligacion di cumpli cu nan debernan.
Den e materia aki Gobierno a priminti hopi, pero no ta hasiendo nada pa bin cu solucion of ayudo pa cu e situacion di famianan den necesidad.

Tin 2 grupo di atencion pa loke ta pobresa na Aruba: hobennan y pensionadonan.
Bou di hobennan ta trece hopi mas problema aserca ya cu nan lo busca un manera of otro, sea bon of malo, pa yega na nan necesidadnan y aki hopi biaha ta unda criminalidad ta bira un caminda fasil pa nan cana.
Desempleo entre nos hobennan ta conduci na criminalidad y hopi otro problemanan social cu ta nos mes mester bay atende cu nan despues.
Pensionadonan ta keda un grupo vulnerabel tambe. Nan a traha full nan bida pa por gosa di nan pensioen, y awor tin cu pasa den duro sin cu nan curpa ta duna pa nan por yuda nan mes.
E reto no ta bay ta facil, pero nos mester por logra cu un dia nos lo por elimina pobresa for di Aruba por completo. 

Expresionnan haci den e articulo aki no necesariamente ta refleha opinion di ArenaPoliti.co