{idkey=4442b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5453-mep-jeffrey-kelly-no-ta-na-altura-ainda-di-tur-e-promesanan-falso-haci-pa-mike-eman-durante-campana-2009%3FItemid%3D101][title=MEP%3A+Jeffrey+Kelly+no+ta+na+altura+ainda+di+tur+e+promesanan+falso+haci+pa+Mike+Eman+durante+campa%C3%B1a+2009%3F][desc=Ta+un+lastima+pa+mira+siman+pasa+un+parlamentario+di+AVP%2C+sr.+Jeffrey+Kelly+skirbiendo+tanto+ridiculez+y+no+ta+haci+su+trabao+den+forma+responsabel%2C+esta+di+controla+su+gobierno%2C+siendo+cu+e+ta+wordo+bon+paga+cu+un+salario+%26amp%3Bnbsp%3Bdi+mas+di+12+mil+florin+pa+luna+%26amp%3Bnbsp%3Bpa+por+haci+esaki.+Den+su+ultimo+comunicado+sr.+Kelly+a+trece+padilanti+cu+%E2%80%9Cora+MEP+bisa+kico+nan+ta+bay+haci%2C+nan+tin+cu+splica+con%E2%80%9D.+Sin+duda+cu+e+ponencia+aki+di+Jeffrey+Kelly+tin+su+efecto+di+boomerang+riba+su+propio+partido+]}
Ta un lastima pa mira siman pasa un parlamentario di AVP, sr. Jeffrey Kelly skirbiendo tanto ridiculez y no ta haci su trabao den forma responsabel, esta di controla su gobierno, siendo cu e ta wordo bon paga cu un salario  di mas di 12 mil florin pa luna  pa por haci esaki. Den su ultimo comunicado sr. Kelly a trece padilanti cu “ora MEP bisa kico nan ta bay haci, nan tin cu splica con”. Sin duda cu e ponencia aki di Jeffrey Kelly tin su efecto di boomerang riba su propio partido AVP y su lider Mike Eman.

Eliminacion di BBO 
No ta lider di AVP Mike Eman durante campaña pa eleccion 2009 a priminti pueblo cu asina nan drenta gobierno nan lo elimina e BBO di 3%, ya cu esaki supuestamente ta strangulando henter nos pueblo? Echo ta cu na lugar di elimina e BBO, Mike Eman a aumenta esaki te 3.5%. Door di no elimina e BBO manera cu el a priminti, Mike Eman su gobierno a ricibi un suma di 822 miyon florin na BBO durante 2010-2015.Esaki ta sin conta e suma cu a wordo genera di e BAZV cu tambe ta surpasa 100 miyon florin tur aña.
No ta Mike Eman durante campaña pa eleccion 2009 a priminti cu ‘from day one’ e lo percura pa reduci e tarifa di awa y coriente cu 25.5% y den e aña siguiente e lo reduci esaki cu un otro 25.5%, pues den total un reduccion di 51%? Mike Eman no a cumpli cu e promesa falso aki, pero al contrario, el a claba pueblo un Hedging criminal riba e prijs di crudo y consecuentemente nan a ranca mas di 400 miyon florin di e pueblo consumidor y alabez lagando miles y miles di casnan sin awa y coriente!

Laptop gratis 
No ta Mike Eman a priminti tur e hobennan cu ta bay scol basico y secundario un laptop gratis ya cu esaki lo bay yuda nan den nan estudio? Despues di 8 aña di Gabinete Eman, kico a para di e proyecto aki? No por a resta sikiera algun miyon florin di e 2.7 biyon florin cu Gabinete Eman a haya extra na entrada y p’asina por a regala e laptopnan aki? Tambe no ta Mike Eman a priminti cu nan lo bay elimina e Boekenfonds di Colegio Arubano? Y con bin Gabinete Eman a redobla e collegegeld di Universidad di Aruba for di 1200 florin te cu 2500 florin?  Y pa no papia mes di e aumento drastico di schoolgeld. Jeffrey, papiando di “con”, con bo partido por a haci tur e abusonan aki contra nos hobennan?
Alavez no ta e mesun Mike Eman cu su cara di lamchi a priminti cu asina e drenta gobierno e lo percura pa tur habitante den e pais aki por biba den tur trankilidad ya cu lo no bay tin ningun criminalidad mas? Pero no ta su mesun gobierno a core elimina e 2 radarnan, helicopter y tambe Warda Nos Costa, ya cu esakinan tabata proyectonan di MEP? Ta con boso gobierno por combati criminalidad y ilegalidad di un forma vengativo asina?

Casnan social y edad di pensioen 
Den e programa di AVP pa eleccion 2009 ta para cu lo ‘introduci un plan di vivienda pa esnan cu entradanan mas abao por cumpra of huur cas di FCCA’. Nos tur por mira cu durante e ultimo 8 añanan Gabinete Eman no a construi ni un cas social pa comunidad. Jeffrey por splica con esnan di menos recurso por cumpra of huur un cas social anto?
Tambe partido AVP a pone den su programa di 2009 cu lo ‘fiha e edad di pensioen pa tur hende na 60 aña’. Jeffrey por splica pueblo di con awe e edad di pensioen ta na 65 aña?

Esakinan ta solamente 6 di tur e promesanan falso y engañoso di partido AVP durante campaña pa eleccion 2009 y cu awe Jeffrey Kelly tin e pudor di puntra MEP kico MEP ta bay haci y tambe con esaki lo wordo haci. Talvez Jeffrey Kelly den su ignorancia politico no ta na altura di tur locual MEP a priminti den pasado y a cumpli cabalmente cu esakinan, principalmente nos Status Aparte ya cu ta danki na e logro aki, Jeffrey Kelly a haya e oportunidad unico di por yama su mes parlamentario di pais Aruba, aunke cu esaki tabata di cabey boto y cu esaki ta den caba aki 5 luna. 

Expresionnan haci den e articulo aki no necesariamente ta refleha opinion di ArenaPoliti.co