{idkey=617b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5455-mireille-sint-jago-mep-muchanan-ta-sina-miho-hayando-les-den-nan-lenga-materno%3FItemid%3D101][title=Mireille+Sint+Jago+%28MEP%29%3A+Muchanan+ta+si%C3%B1a+miho+hayando+les+den+nan+lenga+materno][desc=E+no+ta+nada+nobo%2C+cu+muchanan+cu+ta+haya+les+na+scol+primario+y+scol+basico+den+nan+lenga+materno+ta+si%C3%B1a+mas+miho.+Aruba+tin+dos+idioma+oficial+di+cual+un+di+nan+ta+wordo+papia+na+cas+pa+67%25+di+nos+muchanan.+Esey+ta+Papiamento.+E+otro+idioma+oficial%2C+Hulandes%2C+tin+un+representacion+di+12%25+na+scol+basico+y+un+cantidad+di+mas+cu+30%25+na+Colegio+Arubano.+%28Fuente%3A+Censo+2010%29.+A+base+di+esey+nos+por+conclui+cu+conocemento+di+e+idioma+Hulandes+tin+su+beneficionan.+Cu+nos+tin+decadanan+ta+uza+Huland]}
E no ta nada nobo, cu muchanan cu ta haya les na scol primario y scol basico den nan lenga materno ta siña mas miho. Aruba tin dos idioma oficial di cual un di nan ta wordo papia na cas pa 67% di nos muchanan. Esey ta Papiamento. E otro idioma oficial, Hulandes, tin un representacion di 12% na scol basico y un cantidad di mas cu 30% na Colegio Arubano. (Fuente: Censo 2010). A base di esey nos por conclui cu conocemento di e idioma Hulandes tin su beneficionan. Cu nos tin decadanan ta uza Hulandes como idioma di instruccion no kiermen cu e ta e miho manera pa educa e gran mayoria di nos muchanan. 

Aruba mas abou den Reino 
Resultadonan ta mustra cu pa e ultimo 6 añanan solamente 15% di muchanan di 6e klas di Aruba ta wordo admiti pa nivel di Havo, aunke na Curaçao e ta 40% y na Hulanda mas cu 50%. Pues Aruba tin e resultadonan mas abou. Na e otro paisnan den Reino, St.Maarten y Curacao nan ta ofrece diferente scol cu tin idioma Papiamento of Ingles como idioma di instruccion y scolnan cu tin dos idioma como idioma di instruccion. Na Statia Ingles a bira e idioma di instruccion, door cu e lenga materno ta Ingles. Na Boneiro Hulandes a bira e idioma di instruccion despues di 10-10-10 y a resulta cu menos mucha cu tin e idioma Papiamento como lenga materno ta logra drenta den e areanan mas halto di educacion. E idioma Hulandes ta sigui stroba e desaroyo di Dutch Caribbean, door cu nan no ta haya chens pa practica e idioma aki na cas. 

Scol Multi Lingual 
Na Aruba nos tin un programa cu ta yama Scol Multi Lingual (SML) cual ta honra e 4 idiomanan Papiamento, Hulandes, Ingles y Spaño. Resultadonan inoficial a demostra cu e muchanan tin menos problema pa siña lesa, ta gusta lesa hopi mas y por expresa nan mes miho. Comprension di textonan y tareanan y pensamento critico tambe a yega un nivel mas halto. Esakinan ta habilidadnan academico cu ta necesario pa nos muchanan por sigui desaroya nan mes na un manera mas independiente pa cu nan educacion y talentonan. 

Preguntanan: 
Teniendo cuenta cu tur esaki, nos por puntra nos mes por lo menos dos cos: 1) E muchanan di Aruba ta menos capacita? 2) Enseñansa na Aruba ta sirbi nos muchanan?  

Pa contesta e prome pregunta:  no tin ningun motibo pa asumi cu na Aruba nos muchanan ta menos capacita cu na e otro paisnan den Reino. Lo mester wak e diferencianan cu tin pa cu e enseñansa cu ta wordo brinda. E paisnan mas exitoso na mundo manera hopi hende ta gusta referi na dje, Suecia y Korea, no ta paisnan cu den pasado tawata colonisa, pues nan no a hereda un sistema di educacion introduci door di colonista cu un idioma stranhero como idioma di instruccion. 

Pa haya sa si nos sistema di enseñansa ta sirbi, lo mester bin cu un investigacion profundo y analisis pa haya sa kico SI lo duna miho resultadonan. E idioma Papiamento lo mester haya un rol mas grandi pa asina logra laga mas mucha ta exitoso den enseñansa. E proyecto SML ta un manera pa logra esaki. Tin maneranan mas simpel y menos costoso pa duna mas sosten: Traha riba un Wikipedia na Papiamento, ofrece videolesnan online, ofrece metodonan den klas den mas idioma, toetsnan den mas idioma y desaroya un app educativo. Cu tur e tecnologianan disponibel nos por ofrece hopi mas solucion. Pero e solucionnan aki mester ta adapta na e situacion cu nos tin aki na Aruba. 

Igualdad di Oportunidad
Na e momento aki, e sistema di educacion na Aruba ta preveni igualdad di oportunidad, ta crea muchanan cu falta independencia y confiansa. Nos no por sigui nenga di trece cambionan den enseñansa cu lo duna e oportunidad cu yiunan di un y tur por progresa. Aruba ta un pais cu tambe por cumpli cu derecho di mucha manera stipula door di UNESCO (2008) y ofrece educacion den e lenga materno sea bi-lingual of multilingual. Hunto nos por logra e cambio den enseñansa necesario. Nos mester ta consciente ora di vota. Pa mi esey ta primordial. Asina so idealismo por vence materialismo pa nos logra un miho futuro pa Aruba.

Expresionnan haci den e articulo aki no necesariamente ta refleha opinion di ArenaPoliti.co