{idkey=1437b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F58-gabinete-me-ii-medwork-ta-firma-un-mou-cu-arbo-unie-pa-crea-un-fundacion-di-un-centro-di-conocemento-na-aruba%3FItemid%3D101][title=Gabinete+ME+II%3A+Medwork+ta+firma+un+MOU+cu+Arbo+Unie+pa+crea+un+fundacion+di+un+Centro+di+Conocemento+na+Aruba][desc=ORANJESTAD+-+Hunto+cu+representantenan+di+e+compania+Hulandes+Arbo+Unie%2C+Ru+Croes%2C+director+di+Medwork+Caribbean+NV%2C+a+bishita+Prome+Minister+Mike+Eman%2C+prome+cu+apertura+di+%E2%80%98Green+Aruba+-+Where+Europe+Meets+the+Americas%E2%80%99+%28GA-EMA%29+cu+ta+tuma+luga+awe.+E+dos+companianan%2C+diabierna+awor%2C+ta+bay+firma+un+Memorandum+of+Understanding+%28MOU%29+pa+e+inicio+di+cooperacion+entre+e+dos+empresanan+aki%2C+for+di+Aruba+brindando+servicio+na+companianan+den+e+region.+Loke+e+coperacion+aki+ta%2C+Aruba+ta+bira+e+]}

ORANJESTAD - Hunto cu representantenan di e compania Hulandes Arbo Unie, Ru Croes, director di Medwork Caribbean NV, a bishita Prome Minister Mike Eman, prome cu apertura di ‘Green Aruba - Where Europe Meets the Americas’ (GA-EMA) cu ta tuma luga awe.

E dos companianan, diabierna awor, ta bay firma un Memorandum of Understanding (MOU) pa e inicio di cooperacion entre e dos empresanan aki, for di Aruba brindando servicio na companianan den e region. Loke e coperacion aki ta, Aruba ta bira e Hub pa Arbo Unie den e continente Americano.

Croes, kende ta ex director di AZV, a splica cu nan lo bay firma un acuerdo di cooperacion cu Arbo Unie, cu ta un compania grandisimo na Hulanda trahando cu miles di compania y cu un portofolio di 1.2 miyon di trahado. "E conferencia di e siman aki ta duna nos e oportunidad no solamente pa introduci nos partner nobo, pero tambe haci uzo di e oportunidadnan di ‘Business To Business’ (B2B) pa cera laso cu otro companianan na Aruba. Hopi mas  importante ta cu compania- y institutonan di afo ta presente e siman aki na Aruba participando den GA-EMA. Nos ta kere cu e ta un bon oportunidad pa nos, como compania Arubiano y cu ta bay traha cu un institucion grandi Hulandes, pa amplia nos network y mustra kico nos ta bay haci conhuntamente na Aruba," Ru Croes, orguyoso di e laso nobo aki, a duna di conoce.

Un di e acuerdonan cu Medwork ta bay firma diabierna awor ta pa lanta un fundacion cu meta di ta un centro di experticio regional riba "Arbeids Omstandigheden" (Occupational Health and Safety). E dos companianan aki lo contribui cu nan experticio y conocemento den e centro, cu lo bay traha cu otro partidonan na Aruba y di exterior riba e tereno aki. "E centro aki lo actua como un Liaison, un Gateway di conocemento riba tereno di ‘occupational health’ pa region."

E combersacion- y negociacion entre e compania Arubiano, Medwork, y esun Hulandes, Arbo Unie, a cuminsa for di inicio di aña y lo cera esaki cu firmamento di e MOU dia 24 di october awor, den cual ta stipula e terenonan riba cual lo bay traha hunto, ademas di e fundacion di un Centro di Conocemento.

Croes ta hopi entusiasma cu tur e beneficionan cu un ‘Green Aruba - Where Europe Meets the Americas’ ta trece, principalmente pa e companianan local, pero cu alabes ta promove Aruba como un gateway, cu ta un iniciativa di Prome Minister Mike Eman. El a bisa cu e obhetivonan cu kier logra cu e tipo di encuentronan aki ta "un proceso largo y dificil. E no ta asina facil, pero si nos kier diversifica economia di Aruba un caminda nos mester cuminsa. Y esaki mi ta kere ta un bon comienso, unda nos mes a experencia con e conferencia aki a stimula e laso entre Medwork y Arbo Unie, uniendo nos forsanan pa bay hunto den region."

Ru Croes, hunto cu Jos van Rooien di Arbo Unie, ta hiba palabra diabierna awor despues di 2'or di merdia. Croes lo papia riba: "Sources of country competitiveness; Human Capital" mientras cu van Rooien, su discurso lo tin e titulo: "Sustainable Employability in Tourism; the Human Factor".

Gabinete Mike Eman II ta invita empresario y companianan local pa participa den e eventonan aki, principalmente e encuentronan di B2B (Business To Business), cu lo crea bon oportunidad pa companianan local cera laso cu empresanan di exterior. 

Expresionnan haci den e articulo aki no necesariamente ta refleha opinion di ArenaPoliti.co