{idkey=6314b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F615-rene-herde-avp-e-maneho-balansa-for-di-2010-a-duna-resultado-esaki-ta-e-caminda-corecto%3FItemid%3D101][title=Rene+Herd%C3%A9+%28AVP%29%3A+E+maneho+balansa+for+di+2010+a+duna+resultado.+Esaki+ta+e+caminda+corecto.][desc=E+raport+di+IMF+cu+a+sali+siman+pasa+ta+duna+un+bon+bista+di+unda+nos+a+bin%2C+unda+nos+ta+y+unda+nos+ta+bay+na+Aruba+cu+nos+economia%2C+mercado+laboral+y+finansa+publico.+IMF+ta+se%C3%B1ala+bon+cla+cu+ta+for+di+un+caida+economico+di+%26%23039%3Bdobel+cifra%26%23039%3B+%2815%25%29+nos+a+bin%2C+pa+un+crecemento+economico+di+4%2C5%25+na+2013+y+prognostico+di+2%2C25%25+na+2015.+Niun+pais%2C+ni+den+Reino+ni+pafor+di+Reino+a+logra+esaki+den+asina+poco+tempo.+E+resultado+aki+ta+danki+pa+e+tremendo+crecemento+di+entradanan+di+turismo%2C+inversionnan+p]}E raport di IMF cu a sali siman pasa ta duna un bon bista di unda nos a bin, unda nos ta y unda nos ta bay na Aruba cu nos economia, mercado laboral y finansa publico. IMF ta señala bon cla cu ta for di un caida economico di 'dobel cifra' (15%) nos a bin, pa un crecemento economico di 4,5% na 2013 y prognostico di 2,25% na 2015. Niun pais, ni den Reino ni pafor di Reino a logra esaki den asina poco tempo. E resultado aki ta danki pa e tremendo crecemento di entradanan di turismo, inversionnan publico di gobierno y un reforma gradual di sector publico.

Finansa publico ta den recuperacion segun IMF. E reformanan di fondonan di pensioen y di seguro medico a contribui na esaki. E deficit riba presupuesto ta baha e aña aki te na 3.75% te yega in surplus chikito na 2018 cu e maneho actual.

E expectativa di IMF pa futuro ta cu e nos economico lo sigui crece door di bon maneho y desaroyo den turismo y door di inversionnan den proyectonan di gobierno, e.o. e Green Corridor y e Ringweg#3. Productividad mester crece segun IMF sigur awor cu e refeneria ta cera. Inversionnan den e sector di energia renovabel ta un sector prometedor pa Aruba segun IMF. E motibo su tras ta cu e lo reduci e gasto grandi cu Aruba tin cu importacion di petroleo. Hunto cu e reformanan fiscal cu ta planea pa e aña aki y reformanan den aparato di gobierno, finansa publico lo sigui consolida te yega te un surplus chikito na 2018.

Mester bay wak ta pakico inversion y crecemento economico a reduci na 2014. E unico cos cu por a causa esaki ta e intervencion innecesario, inefectivo y illegal di gobierno actual di Hulanda y e consehonan descabeya di CFT. Esey tabata e fuente di inseguridad cu IMF ta señala. Ta esey y e consehonan di CFT, cu a crea inseguridad, a stagna inversion di sector priva y di gobierno y a stroba economia di crece. Ta tempo pa nos miho amigo Hulanda traha cu nos enbez di stroba nos riba tereno di finansa publico.

E conclusion mas importante cu por saca di e raport di IMF aki ta cu e maneho balansa cu Gabinete Mike Eman I y II a hiba y cu nos fraccion a sostene tabata uno corecto. E ta e maneho di prome  stimula economia cu proyectonan publico y mehoracion di forsa di compra, di cuminsa crea un sector economico nobo, e economia "berde" di energia renovabel, di reduci gastonan publico gradualmente dene forma mas responsabel posibel y di balansa finansa publico cu reformanan fiscal y di reorganisacion structural di aparato publico. E maneho aki a duna e resultadonan di pone e economia crece atrobe (-15% pa +2.75%), crea cuponan di trabou, haci fondonan di pensioen y di seguro medico sostenibel y pone finansa publico riba caminda pa uno sostenibel. Tur esaki den apensa cinco aña! Nos no ta cla. Ainda falta un bon caminda pa bay. Pero cu nos ta riba e bon caminda ta sigur. E raport di IMF aki ta confirma esaki!

Expresionnan haci den e articulo aki no necesariamente ta refleha opinion di ArenaPoliti.co