{idkey=5876b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F945-booshi-wever-upp-avp-y-mike-e-e-traidornan-pura-sangre-di-nos-pais-aruba-siguiendo-e-tradicion-di-su-abuelo-y-su-tata-mike-e-a-bende-nos-patria-cu-hulanda%3FItemid%3D101][title=Booshi+Wever+%28UPP%29%3A+AVP+y+Mike+E.%2C+e+traidornan+pura+sangre+di+nos+pais+Aruba%21+Siguiendo+e+tradicion+di+su+abuelo+y+su+tata%2C+Mike+E.+a+bende+nos+patria+cu+Hulanda][desc=For+di+principio+di+e+siman+aki%2C+y+mirando+e+declaracionnan+di+minister+Bermudez%2C+nos+por+a+tuma+nota+cu+e+relacion+entre+Hulanda+y+e+%26quot%3Bbraafste+jongetje+van+de+klas%26quot%3B+a+empeora.+En+bez+cu+Mike+E.+y+su+gang+acepta+nan+traicion%2C+baha+e+gobierno+y+yama+eleccion+nobo%2C+nos+ta+mira+cu+e+makinaria+di+propaganda+%C3%A0+la+NAZI+di+tempo+di+Hitler+a+cuminza+draai.+Nos+por+a+mira+un+hala+di+fantocheria+di+plannan%2C+MOU%26%23039%3Bs+atrobe.+Awor+San+Nicolas+mester+bira+e+ciudad+di+Graffiti%3B+un+ciudad+cu+tabata+un+ciudad+ind]}
For di principio di e siman aki, y mirando e declaracionnan di minister Bermudez, nos por a tuma nota cu e relacion entre Hulanda y e "braafste jongetje van de klas" a empeora. En bez cu Mike E. y su gang acepta nan traicion, baha e gobierno y yama eleccion nobo, nos ta mira cu e makinaria di propaganda à la NAZI di tempo di Hitler a cuminza draai.

Nos por a mira un hala di fantocheria di plannan, MOU's atrobe. Awor San Nicolas mester bira e ciudad di Graffiti; un ciudad cu tabata un ciudad industrial, ta ser baha te eynan.
Colmo ta ora nos tuma nota di e declaracion di e "rioolrat" Baba, na unda cu e ta bisa cu for di 2010 Hulanda ta poniendo presion. E homber aki mi tin cu admiti, cu e tin curashi.
Mi a bay busca den mi file, y mi a encontra varios articulonan, cartanan cu mi a manda pa 2de Kamer, pa Donner, pa Plasterk, pa Parlatino, pa e Comision di De-Colonizacion di Nacionnan Uni, etc. etc., na unda mi a denuncia esaki. Mi a denuncia esaki personalmente den presentacionnan cu mi a haci den 2de Kamer y na Parlatino, na unda e representantenan di AVP a bay asina leu di yama mi pa traidor!! Cu Hulanda no ta haciendo nada malo, cu Hulanda ta actuando corecto, ta simpelmente ta deseo di un gobierno cu tin un mayoria absoluto y un mandato cla di e pueblo. Y awor e "rioolrat" aki kier tira santo den wowo di e pueblo aki.

For di tempo cu a firma e acuerdo cu nan amiguisimo Donner, e traidor Mike E. y su "handlangers" dia 27-10-2011, a bay di acuerdo cu lo entrega nos autonomia tanto riba tereno financiero como riba tereno hudicial. A bay eens cu e "randvoorwaarden" poni den e rapport di Donner "Toekomst van het Koninkrijk". Pa ser exacto, e randvoorwaarden ey ta poni riba pagina 16 y 17 den dicho rapport.
Nos no mester lubida e acuerdo di "Diahuebs Santo" unda e dos traidornan Mike E. y Mike de M. a bay di acuerdo cu lo tuma medidanan contra e pueblo, pa asina ey nan por bay fia placa riba mercado internacional na un interes hopi abou.
Y nos no mester lubida e acuerdo di dia 3 di juli 2014, na unda e traidor Mike E. un biaha mas, pero e biaha aki na un manera mas concreto, a invita CFT pa bin haci e investigacion riba nos situacion financiero. Ta interesante pa pidi e grabacionnan cu Plasterk a bisa cu tin, cu na su debido tempo e lo haci publico. Eyden Mike E. a bisa cu e lo acepta cu CFT por bin Aruba. Su voz lo ta un otro prueba con TRAIDOR e ta.

Ta tempo pa core cu e traidornan aki den bon of den malo. Bin cu un gobierno transitorio cu mester trece cambionan fundamental den nos leynan. Mester bin cu reglanan estricto pa garantisa cu NUNCA mas, politiconan malbado, masacra nos pais.
Hunto cu e leynan aki pa garantiza cu nos pais lo ser goberna a base di principionan di "GOOD GOVERNANCE", mester bin cambionan fundamental den nos leynan electoral. Esaki mester socede den 6 luna y yama eleccionnan nobo.
Y e gobierno nobo mester bay acudi back cu Hulanda pa trata di recobra no solamente confianza pero tambe nos autonomia, cu e traidor Mike E. y e gang di co-traidornan a entrega na politiconan Hulandes pa nan impone medidanan contra nos pueblo pa motibo di e gobernacion y gobierno malbado, cu e mesun politiconan Hulandes aki tur e tempo, a apoya deliberadamente.

No por ta asina cu NUNCA a tuma e advertencianan cu a ser manda pa nan, na serio, y a permiti pa e gang di traidornan di AVP haci y deshaci, y awor kier bin hunga Pontius Pilatus, y bin tuma medida contra nos pueblo.
Nos mester uni y exigi di Hulanda tambe un splicacion di nan actitud pasivo y esun di ignora e advertencianan.
Aruba y su pueblo so no por ser poni riba e tabernakel di sacrificio pa motibo di un set di politiconan sin escrupulo y malbado, acesora y yuda dor di sindicatonan y gremionan commercial, cu a percura pa e situacion deplorabel cu nos ta aden awor.
Hamas nos por acepta esaki. Ta p’esey Aruba merece un gobierno cu ta consisti di hendenan cu curashi y determinacion pa enfrenta e situacion aki cu tur serenidad y seriedad, pa nos sali menos herida cu ta posibel.
Nos ta pidi e parlamentarionan di AVP, pa un biaha, tuma un postura patriotico, pro Aruba y pro Pueblo, y para e trein di desaster cu ta biniendo den tunnel, y stop di pensa riba partido. E malbadonan, traidornan y e hendenan sin escrupulo aki, NO por keda den gobierno ni un dia mas.
Mester haci tur loke ta den nos alcanse, den bon of den malo core cu nan y lihe, pasobra NO por confia Mike E. di keda na poder ni un seconde so. Mike E. a demostra mescos cu su ruman Henny E., di ta rencoroso y vengativo, y no lo bay acepta sin mas un perdida di cara atrobe, si Hulanda impone un Algemene Maatregel van RijksBestuur.
Mike E. lo trata na tur forma di ehecuta un maniobra cu lo por hinca Aruba den mas problema ainda. Aki mester tene na cuenta e presentacion cu su aliado hulandes Brinkhorst (ex-minister pa e partido D66) a tene recientemente na Hulanda, na unda e a conseha gobierno di Aruba pa evalua e posibilidad di mehora e relacion cu Europa door di laga su LGO status cay y escohe pa e UPG status.
Mike E. ta comporta su mes awor aki manera un bestia herida cu ta bira mas peligroso ainda.
Ta importante pa nos pueblo compronde e comportacion di Mike E. bon, y stop e bagamunderia di su gobierno, pasobra ta e pueblo so por scapa loke por ser scapa ainda!!!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, april 22, 2015

Expresionnan haci den e articulo aki no necesariamente ta refleha opinion di ArenaPoliti.co