{idkey=9384b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F98-booshi-wever-upp-pa-complace-cu-su-partner-in-crime-otmar-o-kier-bulldoze-ley-cu-mester-haci-un-departamento-un-n-v%3FItemid%3D101][title=Booshi+Wever+%28UPP%29%3A+Pa+complace+cu+su+%26quot%3Bpartner+in+crime%26quot%3B%2C+Otmar+O.+kier+bulldoze+ley+cu+mester+haci+un+departamento+un+N.V.][desc=Den+medionan+di+comunicacion+a+sali+publica+cu+entrante+1+di+november+2014+Directie+Luchtvaart+lo+wordo+parti+den+dos+departamento%2C+y+cu+lo+instala+oficialmente+un+N.V.+nobo%2C+cu+mester+percura+pa+e+seguridad+di+aviacion+civil.+E+pregunta+grandi+ta+cu+si+realmente+tin+necesidad+pa+dividi+Directie+Luchtvaart+y+lanta+un+NV+nobo%3F+No+por+a+simpelmente+hacie+un+%26quot%3Blandsbedrijf%26quot%3B%2C+of+pone+bou+di+e+NV+di+aeropuerto%3F+Of+laga+e+departamento+sigui+funciona+manera+cu+e+ta%2C+pero+inverti+e+placa+necesario+den+e]}

Den medionan di comunicacion a sali publica cu entrante 1 di november 2014 Directie Luchtvaart lo wordo parti den dos departamento, y cu lo instala oficialmente un N.V. nobo, cu mester percura pa e seguridad di aviacion civil.

E pregunta grandi ta cu si realmente tin necesidad pa dividi Directie Luchtvaart y lanta un NV nobo? No por a simpelmente hacie un "landsbedrijf", of pone bou di e NV di aeropuerto? Of laga e departamento sigui funciona manera cu e ta, pero inverti e placa necesario den e departamento?

Ta preguntanan cu Raad van Advies tambe a haci den nan conseho na gobierno. Segun Otmar O. a evalua tur e opcionnan menciona door di RvA, pero cu ningun a resulta factibel. E contesta di gobierno no lo yega RvA te despues cu e proposicion aki wordo discuti den parlamento, pues RvA no lo haña un chens pa analysa e contestanan di Otmar O., y casi sigur e 13 marionetanan di e partido na mando lo grita "VOOR" y asina ignora, manera semper nan ta haci, e criticanan funda y balido di RvA.

Aki un biaha mas e gobierno di Mike E. ta demostra e respet cu nan tin pa nos organo constitucional mas importante di nos Estado di Derecho.

Den curso di siman pasa nos por a tuma nota caba con Mike E. y su secuas Baba H. a grita di hubilo ora cu Raad van Advies a discuti e legitimidad di e KB otorga door di Rijksministerrraad. A publica e conseho aki, contra tur etica y reglanan, y deliberadamente a ignora e resto di e publicacion y criticanan di RvA riba e maneho deficiente di gobierno.

E hipocresia y falta di respet pa RvA atrobe ta wordo acentua door di e gobierno y partido na mando, door di  simpelmente hala e conseho di Raad van Advies riba instalacion di e N.V. nobo un banda. Awor si ni Gobierno ni Baba H. ta scohe pa haci publico e critica di RvA, loke awor si ta permisibel, ya cu esaki oficialmente a yega Parlamento pa tratamento.

E pregunta ta awor: DICON? Wel, e motibo ta obvio si nos tuma na consideracion e tantisimo preguntanan cu Raad van Advies a haci, y particularmente e conclusion y e conseho final cu dicho Raad a duna. Y pa kita tur duda cu por tin, lo mi bay cita e ultimo punto den e conseho. Den e conclusion ta bisa lo siguiente:

"De Raad kan zich NIET met de doelstelling van het onderhavige ontwerp verenigen en geeft u mitsdien in overweging het NIET aan de Staten aan te bieden".

Sinembargo Otmar O. ta pone e conseho aki un banda, y ta manda e concepto Parlamento pa aprobacion.Esaki ta e respet cu tin pa nos Colegio cu mester salbaguardia nos democracia.Awor ta interesante pa bay wak kiko e Presidente di Parlamento ta bay haci. E ta bay manda e ley back of e lo yuda pa "bull-doze" e ley aki? E lo coopera atrobe pa trapa e reglanan basico di "GOOD GOVERNANCE"??Y loke pa ami ta sumamente straño, ta e pura cu e minister tin pa ehecuta e concepto di ley aki. Pakiko tanto pura?

Ora cu tuma nota cu ya caba a nombra un director, sin NINGUN clase di "open sollicitatie", amiguisimo amiguito di Otmar O., y supuestamente cu un salario di 20.000 florin pa luna, anto e ora ey nos por compronde. Parlamento lo acepta un biaha mas cu nan ta ser poni dilanti di un "fait accompli" door di un di nan AMONAN  di partido??

Den su conseho Raad van Advies ta haci mencion tambe cu lo mester bay nombra 7 hende extra cu, banda di e salario barbaro pa un director "handpicked" door di Otmar O, lo bay costa 1.3 miyon florin extra. Loke ta di spera ta, cu e minister aki no bay nombra hende cu no tin e cualificacionnan necesario, mescos cu e director cu ela nombra caba prome cu e NV a wordo aproba door di parlamento, cu parce di NO tin ningun, pero ningun cualificacion pa por eherce e funcion aki manera reglanan internacional ta exigi. Y esaki den un tempo cu nos finanzas publico ta na filingrana, y ta papia di kita 4000 tata y mama di famia for di trabow.

Tumando tur esaki na cuenta ta nos deseo cu pa prome biaha e Parlamento tuma nan trabow na serio y para e "modus operandi" aki di e gobierno. Ta den boso man e ta pa sea nos bisa ta basta cu e tipo di maneho aki contra tur regla di "GOOD GOVERNANCE", of nos ta bay mas profundo den un REPUBLICA DI BANANA cu no tin ningun respet pa reglanan, ni tampoco respet pa nos "waarborginstituties", y na unda ministernan ta haci loke nan kier, y e mayoria den parlamento simpelmente ta keda aproba esaki.

ARUBA: QUO VADIS???              

Den nomber di Union Patriotico Progresista – U.P.P.
Candelario – Booshi – Wever
Brazil, october 28, 2014

Expresionnan haci den e articulo aki no necesariamente ta refleha opinion di ArenaPoliti.co