{idkey=1949b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1123-upp-ta-felicita-tur-ambientalista-activistanan-pro-urirama-y-pueblo-di-aruba-cu-e-resultado-di-e-sentencia-di-juez-pero-no-mester-bay-drumi%3FItemid%3D101][title=Booshi+Wever%3A+UPP+ta+felicita+tur+ambientalista-%2C+activistanan+pro-Urirama%2C+y+Pueblo+di+Aruba+cu+e+resultado+di+e+sentencia+di+juez%2C+pero+no+mester+bay+drumi.][desc=Union+Patriotico+Progresista+cu+satisfaccion+a+tuma+nota+di+e+sentencia+di+Hues+den+e+caso+di+Urirama%2C+na+unda+a+resulta+cu+e+peticion+di+Windpark+Urirama+NV+ta+infunda+y+cu+nan+no+por+usa+e+permiso+otorga%2C+y+e+parke+por+lo+pronto+no+por+bin+mas.+Pues%2C+si+ta+intencion+pa+bin+cu+e+parke%2C+e+proceso+lo+mester+cuminsa+full+di+nobo+y+pasa+den+e+proceduranan+corespondiente.+UPP+kier+a+felicita+tur+ambientalista-%2C+activista-%2C+organisacionnan%2C+y+tambe+Pueblo+di+Aruba+pa+e+resultado+aki.+UPP+mes+ta+di+]}
Union Patriotico Progresista cu satisfaccion a tuma nota di e sentencia di Hues den e caso di Urirama, na unda a resulta cu e peticion di Windpark Urirama NV ta infunda y cu nan no por usa e permiso otorga, y e parke por lo pronto no por bin mas. Pues, si ta intencion pa bin cu e parke, e proceso lo mester cuminsa full di nobo y pasa den e proceduranan corespondiente.

UPP kier a felicita tur ambientalista-, activista-, organisacionnan, y tambe Pueblo di Aruba pa e resultado aki.

UPP mes ta di opinion cu pa loke ta e resultado aki, nos lo mester keda riba nos “qui vive”, mirando cu den e sentencia claramente ta wordo bisa cu loke ta trata e preocupacion di e habitantenan, esaki no lo wordo atendi, pasobra ya caba e parke no ta bin. P'esey Hues lo no por duna un opinion of veredicto na e momentonan aki. Esaki lo por bira necesario ora cu e compania bolbe cuminza e procedura pa haya permiso, y den e sentencia ya caba e compania a indica di a cuminsa cu e peticion pa permiso di un parke di molina di 3.3 Mw. P'esey UPP ta bisa cu mester keda lanta, ya cu algun siman pasa Mike E. a grita cu e proyecto ta bay door, ya cu e tin cu cumpli cu 100% green.

Mirando e rapport di CFT cu e lista grandi di medidanan, UPP a urgi Parlamento di Aruba, na momento cu tabata trata e presupuesto, pa obliga gobierno para cu e tipo di proyectonan aki, mescos cu e proyectonan PPP. Pero manera cu por scucha di e.o. parlamentario Rasmijn di AVP, lo cuminsa cu e proceso pa un permiso nobo.

Tambe UPP ta puntra con a para cu e contrato di WEB NV, cu a core firma tambe masha liher? Con ta para cu e gastonan cu a wordo haci caba? UPP ta urgi atrobe na Parlamento pa exigi copia di e contrato aki, pa asina Pueblo por wak kiko ta e clausula cu tin ora di no cumplimento di e contrato aki, pasobra lo mester tin un clausula cu den tanto tempo WEB lo mester cuminsa haya coriente. Of esaki no ta e caso?

E director (saliente?) di WEB y su experto, ruman di minister Otmar O. a contradeci e ponencia di Mike E. cu Urirama lo nifica alivio den prijs di coriente, y nan a expresa cu prijs di petroli mester ta hopi halto mes pa hustifica un inversion miyonario den e proyecto di Urirama. P'esey UPP ta sugeri si lo no ta na su lugar pa deshaci di e proyecto aki solamente a base di e desaroyo menciona, y esaki sin tuma na cuenta e efecto riba nos medio ambiente, nos panorama natural y salud di e habitante di e barionan di Noord?
Y por ultimo e respet cu mester tin pa e lugar aki, esta e sitio di oracion, meditacion y refleccion, esta e Kapel di Alto Vista?

A yega momento pa Mike E. stop cu tur e locuranan cu unicamente ta yuda na destrosa nos pais y hinca nos mas den debe. Den debe cu ta riba lomba di Pueblo ta wordo poni. Mike E. a bay asina leu di presenta e parke aki como uno cu ta cuadra cu e desaroyo di People, Planet & Profit. Riba su mes un concepto unda cu lo mester sostene desaroyonan unda inversionistanan por haci nan ganashinan, pero semper poniendo nos hendenan y tambe nos mama tera central.

Pero den esaki lastimamente den e concepto aki di Mike E., ta e ultimo “P” so ta conta, esta esun di PROFIT pa esnan cu rond di dje of su partido. PEOPLE – no ta tene cuenta cu e habitantenan, ni nan salud ni nan bienstar! Planet – no ta tene cuenta cu e medio ambiente (flora y fauna) di e sitio aki, cu te ainda tin su proteccion segun nos ley di Ordenanza Teritorial.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 29, 2015

Expresionnan haci den e articulo aki no necesariamente ta refleha opinion di ArenaPoliti.co