{idkey=7687b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1241-booshi-wever-upp-8-ministro-y-13-parlamentario-por-wordo-considera-toerekeningsvatbaar%3FItemid%3D101][title=Booshi+Wever+%28UPP%29%3A+8+ministro+y+13+parlamentario+por+wordo+considera+%26quot%3Btoerekeningsvatbaar%26quot%3B%21%21][desc=Bon+Gobernacion+te+ainda+ta+keda+un+palabra+bunita%21%21%26amp%3Bnbsp%3BUPP+a+tuma+nota+cu+recientemente+Minister+di+Finanzas+y+Organisacion+Gubernamental+tabata+na+Hulanda+den+cuadro+di+e.o.+prestamo+di+placa+riba+mercado+internacional%2C+y+tambe+pa+papia+riba+e+preparacion+di+e+ley+pa+bin+cu+e+supervision+di+alto+nivel%2C+loke+nos+yama+Cft+of+CAft+den+boca+di+pueblo.+Un+ley+cu+keto+bay+aki+na+Aruba+ni+Parlamento+sa+su+contenido%2C+corda+nos+Pueblo.+Pero+parce+cu+algun+ambtenaar+na+Den+Haag+s%C3%AD+conoce+e+contenido.]}
Bon Gobernacion te ainda ta keda un palabra bunita!! 

UPP a tuma nota cu recientemente Minister di Finanzas y Organisacion Gubernamental tabata na Hulanda den cuadro di e.o. prestamo di placa riba mercado internacional, y tambe pa papia riba e preparacion di e ley pa bin cu e supervision di alto nivel, loke nos yama Cft of CAft den boca di pueblo.
Un ley cu keto bay aki na Aruba ni Parlamento sa su contenido, corda nos Pueblo.
Pero parce cu algun ambtenaar na Den Haag sí conoce e contenido.

Loke UPP kier a remarca, ta cu - mientras cu Minister di Finanzas Angel B. ta na Hulanda ta hungando “mooi weer” cu e Hulandes y Hulandes ta hunga esaki bek cu nan - Gobierno di Aruba, encabesa pa nos Prome Minister cu nos a bisa caba ta un persona cu ta “ontoerekeningsvatbaar”, no ta habri cu Pueblo y no ta transparente cu Pueblo manera nan a priminti.
Aki UPP ta referi na e.o. e Landsverordening di 19 di december 2013, esta esun di “Instelling Ministeries”, unda den articulo 10 di e ley aki tin poni, y di cual nos por bisa cu ta un obligacion pa ministernan cumpli cu ne.
E ley, banda di ta bisa cu e minister ta na cabes di su ministerio y ta responsabel pa su ministerio, den articulo 2 ta poni cu den cuadro di ehecucion di su tarea como hefe di un ministerio, e mester percura pa:
a). Maneho drechi;
b). toma di decision drechi y transparente;
c). Consistencia den preparacion, stipulacion y ehecucion di maneho;
d). Sincronisacion den preparacion, stipulacion y ehecucion di su maneho cu e otro ministernan;
e). eficiencia di proceso di trabou den su ministerio, unda ta wordo referi na maneho financiero, maneho material y administracion di esakinan;
f). Maneho financiero cu ta cumpli cu su exigencia legal, ordena y controlabel;
g). Maneho di su begroting di su ministerio;
h). Cumpli cu procedura cu ta regarda transparencia den gobernacion.

Pues loke ta resalta ta gobernacion drechi, transparencia, eficiencia y responsabilisacion di actonan di minister y gobierno. Esaki ta hustamente loke UPP a propaga durante e ultimo eleccion, esta un “Bon Gobernacion”.
Y nos por ripara tambe cu den un recien anuncio di vacatura, cu a sali pa e posicionnan di “Hoofd Financieel Beheer” y di “Chef Financiële Rapportage en Analyse”, Minister di Finanzas, Comunicacion, Utilidad y Energia (cu porcierto segun nos ta un denominacion fout di e Ministerio), ta pone Direccion di Finanzas, banda di tin e responsabilidad pa conseha gobierno riba su maneho Financiero-Economico, haci e control necesario, percura pa e administracion financiero y prepara presupuesto.

Direccion di Finanzas tambe tin di funciona den un ambiente dinamico y politico administrativo, unda cu banda di e exigencianan legal, nan mester tene cuenta, cu exigencianan di “good governance” mester wordo mira bek den transparencia di gobernacion.
P’esey gobierno ta spera tambe cu e “teammedewerkers” por tin un postura pro-activo y dirigi riba resultado. Un biaha mas nos por ripara aki varios punto di importancia, cu nos ta kere, cu na momento bo ta un gobierno participativo, e puntonan aki mester conta generalmente, di ministernan te na ciudadanonan. P’esey tambe, mirando e “ontoerekeningsvatbaarheid” di nos Prome Minister, di awor padilanti, nos lo ta dirigiendo nos mes na Ministernan, Parlamento y na nos Pueblo.

UPP ta kere, cu mirando e condicion di e otro 8 ministernan, nos por calificanan como “toerekeningsvatbaar”, loke ta haci nan mayor culpabel pa e situacion cu Aruba ta aden awor y di abusa di un Prome Minister cu ta biba den su mundo di fantasia, esta den su "Emanlandia" of "Mike in Wonderland”.
Pero UPP no ta keda eynan so, sino ta mira tambe den direccion di nos Parlamento, particularmente e 13 miembronan di AVP cu ta keda sostene e gabinete actual “door dik en dun”.
E 13 personanan aki sigur ta mas culpabel ainda, mirando cu nan ta mantene un Prome Minister, cu mester di ayudo. Nan ta mantene un Prome Minister secuestra den un posicion, djis pa scapa nan propio peyeho, mientras ta poniendo nos cara na berguensa y ta sigui endeuda nos pais, nos Pueblo y nos futuro generacion. Conscientemente nan ta entregando poder di Staten den man di Hulanda.

Y na Pueblo tambe nos ta dirigi nos mes, ya cu ta Pueblo ta esun cu al final tin di dicidi si ta sigui acepta e tipo di desaroyonan aki.
Nos tarea ta keda manera nos a propaga, esta di informa y educa nos Pueblo riba asuntonan cu ta regarda e pais, e nacion cu yama Aruba, cu dia pa dia parce di ta bayendo perdi.
Aruba tin derecho riba un manece nobo, un manece cu ta brinda nos e seguridad tan desea.
Aruba merece di wordo salba!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 17, 2015

Expresionnan haci den e articulo aki no necesariamente ta refleha opinion di ArenaPoliti.co