{idkey=6149b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F183-gabinete-me-ii-aruba-ta-fuerte-den-inovacion%3FItemid%3D101][title=Gabinete+ME+II%3A+Aruba+ta+fuerte+den+inovacion][desc=Aruba+su+historia+ta+si%C3%B1a+nos+cu+e+isla+semper+tabata+fuerte+den+busca+solucion+pa+su+problemanan.+Esey+tabata+e+li%C3%B1a+cora+durante+e+presentacion+di+Prome+Minister+Mike+Eman+diahuebs+ultimo+na+Corsou+unda+e+tabata+key+note+speaker+na+e+Conferencia+%E2%80%98Innovatie+in+Caraibisch+Perspectief%E2%80%99%2C+organisa+pa+e+Dutch+Caribbean+Association+of+Accountants+%28DCAA%29.+Den+un+presentacion+cu+a+wordo+bon+ricibi%2C+Eman+a+conta+con+den+transcurso+di+su+historia+Aruba+semper+tabata+apto+pa+yega+na+solucionnan+inn]}

Aruba su historia ta siña nos cu e isla semper tabata fuerte den busca solucion pa su problemanan. Esey tabata e liña cora durante e presentacion di Prome Minister Mike Eman diahuebs ultimo na Corsou unda e tabata key note speaker na e Conferencia ‘Innovatie in Caraibisch Perspectief’, organisa pa e Dutch Caribbean Association of Accountants (DCAA).

Den un presentacion cu a wordo bon ricibi, Eman a conta con den transcurso di su historia Aruba semper tabata apto pa yega na solucionnan innovativo, pa cuminsa pa haya su Status Aparte na 1986. Minister President Eman: ”Den 25 aña di jaar Status Aparte e Producto Bruto Nacional a crece cuatro bes mas, sigur door cu Aruba a sigui riba e innovacion cu e isla a logra door di pone todo por todo riba tur loke e tin caba, den engrandece su producto turistico. Esaki a conduci entre otro na construccion di mas hotel high-rise. Te cu dia di awe e sector turistico ta e motor tras di e crecemento economico di Aruba. Aruba semper ta fuerte den innovacion”.   

E crisis economico mundial cu a inicia na 2008  a conduci na un caida di e Producto Bruto Nacional di -15%, Aruba a haya su mes dilanti e reto pa bin un biaha mas cu solucionnan inovativo. Un bes mas e isla tabata super exitoso. E crecemento economico cu pa e añanan binidero a wordo estima door di entre otro Fitch Ratings y Standard & Poor’s, ta bek y lo yega na un pro medio di 3.5%.   

Premier Mike Eman: ”Sin embargo, mi Gabinete no a busca solucionnan den un crecemento acelera den forma di construccion di hotel na Aruba. Hopi mas hotel acerca lo conduci ta poco balor adicional pa e poblacion di Aruba”. E industria petrolero tampoco a mustra di ta e solucion.

Pesey mes Gabinete Mike Eman a scoge pa cana un otro caminda. Un caminda cu a termino largo lo conduci na un desaroyo social economico duradero. Eman: “Nos a tuma tempo pa pensa con por fortifica e modelo di gana placa. Esaki a conduci na inversionnan grandi den reformacion di ciudadnan, di bario y scolnan, infrastructura y areanan publico, mescos tambe den sosten di e gruponan cu entrada abou na Aruba cu tur sorto di subsidio. Tambe e base a wordo poni pa un pilar economico nobo pa Aruba. Haci di Aruba un trampolin di y pa e continente Latino-Americano, principalmente enfoca den duna sosten na negoshinan Europeo den Latino-America y negoshinan Latino-Americano na Europa. Na prome instante ta enfoca particularmente den ofrece tecnologia duradero na mercadonan Latino-Americano’.  

Pa Gabinete Mike Eman ta esencial pa haya e balansa apropia pa loke ta crecemento entre economia y situacionnan social di e poblacion. Mike Eman: “Pesey nos a scoge pa prome pone den practica un cantidad di reformanan structural cu tabata necesario, entre otro AOV y AZV. Despues nos a percura pa recuperacion di e confiansa y pa bin cu e modelo di gana placa di Aruba. Esey a conduci cu riba escala grandi a inverti den producto Aruba y diversificacion di nos economia. Awor cu e crecemento economico t’ey atrobe, e tempo a yega pa drecha e ‘huishoudboekje’ di gobierno.  Crece prome y corta despues. Esey ta e secuencia cu nos a scoge p’e. Bo no ta bay corta mey-mey di un recesion y pone asina e economia y poder di compra di e hendenan ainda mas bou presion. E forma di traha aki a conduci na un crecemento y un producto mas fuerte. Resultado ta e peticion enorme pa Aruba riba mercado turistico. Tanto e bishitantenan como e prijs cu hende ta dispuesto pa paga pa bin pasa vakantie na Aruba a crece grandemente.

 Eman a cera su presentacion door di duna e publico cu tabata consisti den su mayoria pa mas di shen accountant, un bista di e caminda cu Aruba a scoge pa cana pa tin un Finansa Publico duradero. Un presupuesto ekilibra lo wordo logra na 2017 y e debe nacional ta cuminsa baha for di 2016. Esaki ta wordo logra door di e operacion di baha gasto mas grandi den historia di pais Aruba door di reformanan den AOV, APFA y e seguro medico AZV.

Expresionnan haci den e articulo aki no necesariamente ta refleha opinion di ArenaPoliti.co