{idkey=235b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2197-minister-di-economia-ing-mike-de-meza-posibel-reapertura-di-refineria-na-aruba-tin-un-impacto-sumamente-grandi-y-positivo%3FItemid%3D101][title=Minister+di+Economia%2C+ing.+Mike+de+Meza%3A+Posibel+Reapertura+di+Refineria+na+Aruba+tin+un+impacto+sumamente+grandi+y+positivo][desc=ORANJESTAD+%E2%80%93+Cuminsamento+di+e+siman+aki+Minister+Mike+de+Meza+a+anuncia+cu%2C+Gobierno+tin+reunionnan+cu+ehecutivonan+di+mas+halto+di+CITGO+na+Aruba+y+e+negociacionnan+ta+bayendo+bon.+Pa+algun+siman+caba+di+ingenieronan+di+CITGO+ta+den+e+refineria+haciendo+diferente+tipo+di+evaluacion+di+e+compleho+industrial+na+San+Nicolas.+Aunke+ing.+de+Meza+ta+splica+cu+no+por+duna+ningun+garantia+ainda%2C+e+ta+panorama+ta+mustra+sumamente+positivo.E+Minister+encarga+cu+carteranan+di+Economia%2C+Comunicacion%2C+En]}
ORANJESTAD – Cuminsamento di e siman aki Minister Mike de Meza a anuncia cu, Gobierno tin reunionnan cu ehecutivonan di mas halto di CITGO na Aruba y e negociacionnan ta bayendo bon. Pa algun siman caba di ingenieronan di CITGO ta den e refineria haciendo diferente tipo di evaluacion di e compleho industrial na San Nicolas. Aunke ing. de Meza ta splica cu no por duna ningun garantia ainda, e ta panorama ta mustra sumamente positivo.

E Minister encarga cu carteranan di Economia, Comunicacion, Energia y Medio Ambiente a splica cu, “e impacto economico di e reapertura di un refineria na Aruba ta sumamente grandi.” Basa riba cifranan di  pasado, na momento cu e refineria ta den operacion cu 200 mil bari plus, esaki tabata aporta mas o menos 13 pa 15% na presupuesto di Aruba. “Nos ta premira cu si ta bay tin un reapertura di e refineria cu ‘down the line’, e aporte economico, pa Aruba cu un refineria lo yega na e mesun nivelnan ey tambe y esey lo ta sumamente positivo.”

Calculacionnan ta mustra cu un operacion asina por trece mas di 600 miyon florin den Aruba su economia anualmente, loke tin un refleho positivo pa caha di gobierno y cu facilmente por yega y surpasa 100 miyon florin na impuesto directo y indirecto. Ta premira tambe cu e reapertura por percura pa un cantidad grandi di cupo di trabou, algo cu ta sumamente positivo pa e mercado laboral.

Na final di gobernacion di Gabinete Oduber IV, Valero a stop cu operacion di e refineria, debi na un deterioro di mercado petrolero, pero tambe pa motibo di un mal relacion entre Gabinete Oduber y Valero. Na 2009, ora cu Gabinete Mike Eman a drenta gobierno a haci hopi trabou pa yuda haya e refineria bek den funcion. Gabinete Mike Eman I y Valero a yega na un Settlemente Agreement, caminda a kita tur disputa cu tabata tin den corte y asina a crea un plataforma nobo pa segura cu e industria petrolero por sigui na Aruba. Pero un bes mas, den 2012, mercado petrolero a deteriora cu e consecuencia cu Valero ya no por a sigui cu operacion di e refineria.

Ing. de Meza a sigui splica cu a sigui traha y busca avenidanan pa por busca un operador nobo. A tuma contacto y reuni cu companianan petrolero estatal regional y mundial grandi manera di Brasil, Colombia, Venezuela, Mexico, Merca, Europa, Africa y te hasta den region di Arabia. “Mi por bisa toch cu den discusionnan cu a bira mucho mas intensivo, pa 2 aña caba, nos ta bezig cu e posibilidad di PDVSA y CITGO, un compania estableci na Merca.”

Minister de Meza, “Nos ta sigui e desaroyonan e dianan nos dilanti cu hopi interes y nos lo tene pueblo di Aruba informa di e desaroyonan. E panorama ta mustra sumamente positivo.”

Expresionnan haci den e articulo aki no necesariamente ta refleha opinion di ArenaPoliti.co