{idkey=5123b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2198-parlamentario-chris-romero-ministernan-di-gabinete-mike-eman-coriendo-pa-nan-responsabilidad-mientras-cu-problematica-di-turismo-venezolano-ta-bayendo-for-di-control%3FItemid%3D101][title=Parlamentario+Chris+Romero+%28MEP%29%3A+Ministernan+di+Gabinete+Mike+Eman+coriendo+pa+nan+responsabilidad%2C+mientras+cu+problematica+di+turismo+venezolano+ta+bayendo+for+di+control][desc=Otro+acto+di+Mike+Eman+su+%26quot%3BCirco+Politico%26quot%3B%26amp%3Bnbsp%3BPa+ningun+di+nos+cu+ta+bibando+na+Aruba+ta+un+secreto+cu+e+exodo+di+ciudadanonan+venezolano+ta+lagando+resultadonan+negativo+pa+nos+comunidad.+Como+pais+chikito%2C+un+fluho+asina+grandi+y+descontrola+di+turistanan+venezolano+di+e+categoria+%26quot%3Blastra+maleta%26quot%3B+of+%26quot%3Braspa+tarjeta%26quot%3B%2C+ta+birando+visiblemente+perhudicial+den+diferente+aspecto+di+nos+bida+diario.+Maske+cu+ta+berdad+cu+e+turistanan+aki+ta+contribui+pa+nos+economia+keda+draai%2C+esaki+tin+un+costo+h]}
Otro acto di Mike Eman su "Circo Politico" 

Pa ningun di nos cu ta bibando na Aruba ta un secreto cu e exodo di ciudadanonan venezolano ta lagando resultadonan negativo pa nos comunidad. Como pais chikito, un fluho asina grandi y descontrola di turistanan venezolano di e categoria "lastra maleta" of "raspa tarjeta", ta birando visiblemente perhudicial den diferente aspecto di nos bida diario.

Maske cu ta berdad cu e turistanan aki ta contribui pa nos economia keda draai, esaki tin un costo hopi mas grandi pa nos comunidad.
Nos no por sera wowo na e realidad cu nos ta bibando actualmente na Aruba. Un realidad tristo y te hasta spantoso ora cu nos mira con e cifranan di criminalidad a subi y ta keda subi, cu consecuencia cu nos niun ta sinti nos mes sigur mas.
E Aruba di awor no ta e Aruba di antes, unda cu nos por a drumi anochi cu bentana y te hasta porta di cas habri, sin tene miedo cu nos lo por bira victima di ladronicia. Y loke ta mas preocupante ainda, ta ora cu nos mira con nos turistanan ta bira victima di atraco casi diariamente.
E Aruba trankil y sigur, e "One Happy Island" cu nos tabata orguyoso di propaganda internacionalmente como paraiso turistico, no t'ey mas. Pero, kiko Gabinete Mike Eman ta hasiendo pa alivia e situacion y trese control bek?

Nos por mira cu mientras Minister di Husticia ta bisa cu ta un percepcion nos tin cu Aruba ta sufriendo na man di criminalidad, e realidad ta cu tur dia noticieronan y corantnan ta mustranos lo contrario. Tur dia nos ta lesa den prensa noticianan desagradable y angustiante di atraconan y hortamento.
Un realidad amargo cu nos ta obliga di enfrenta awor, ta cu criminalidad ta den su maximo punto desde cu e exodo venezolano a cuminsa tuma Aruba over.

Pero ora di puntra Minister Dowers kiko e mes como Minister responsabel di e cartera di Husticia ta haciendo pa controla e situacion aki, su contesta ta irealistico y visiblemente sin resultado.
Na un banda nos tin un Minister di Turismo cu ta hungando heroe, y ta labando man pa no asumi ningun tipo di responsabilidad den e problematica cu ta andando. Na un otro banda nos ta mira cu Minister Sevinger a haya ta bon pa kita importancia na e asunto bisando cu solamente 4% (4000) di cada 100 mil turista venezolano, ta keda Aruba pa traha ilegalmente. Mirando e cifras cu tin circulando di e cantidad di turista venezolano cu ta drenta Aruba, nos por deduci facilmente cu tin, segun calculacion di Minister Sevinger, mas o menos 9 mil venezolano ilegal na Aruba actualmente. Pero esaki aparentemente, no ta un problema den wowo di Minister Sevinger.

Ta bisto cu ningun Minister concerni kier actua y mucho menos tuma responsabilidad. Nan ta prefera di asumi postura di un avestruz y hinca cabes bou tera, lagando asina e problema sigi escala sin tuma ningun paso concreto pa realmente duna nos comunidad un alivio.
Un biaha mas nos tin cu duna Minister Bermudez rason, Gabinete Mike Eman ta simplemente un circo politico...!

Expresionnan haci den e articulo aki no necesariamente ta refleha opinion di ArenaPoliti.co