{idkey=8327b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2375-booshi-wever-upp-aumento-di-pensioen-di-biehes-no-ta-un-fabor-pero-un-deber-di-svb-y-gobierno-segun-e-ley-di-aov%3FItemid%3D101][title=Booshi+Wever+%28UPP%29%3A+Aumento+di+pensioen+di+biehes+no+ta+un+fabor%2C+pero+un+deber+di+SVB+y+gobierno+segun+e+ley+di+AOV][desc=Recientemente+a+sali+varios+informacion+entorno+un+aumento+di+pensioen+di+biehes%2C+y+e+makinaria+di+propaganda+di+e+gobierno+di+AVP+a+cuminza+cu+un+campa%C3%B1a+formidable%2C+haciendo+comosifuera+cu+ta+un+fabor+ta+haciendo+na+nos+pensionadonan%2C+y+alabes+no+por+a+keda+afo+di+tira+culpa+riba+e+gobernacion+anterior.+Conforme+e+landsverordening+AOV%2C+tur+a%C3%B1a+mester+haci+un+evaluacion+si+mester+adapta+e+suma+den+e+caso+cu+e+costo+di+bida+a+subi%2C+y+alabes+e+mesun+landsverordening+ta+stipula+cu+gobierno+meste]}
Recientemente a sali varios informacion entorno un aumento di pensioen di biehes, y e makinaria di propaganda di e gobierno di AVP a cuminza cu un campaña formidable, haciendo comosifuera cu ta un fabor ta haciendo na nos pensionadonan, y alabes no por a keda afo di tira culpa riba e gobernacion anterior.

Conforme e landsverordening AOV, tur aña mester haci un evaluacion si mester adapta e suma den e caso cu e costo di bida a subi, y alabes e mesun landsverordening ta stipula cu gobierno mester para garantia pa tur e pagonan cu mester ser haci conforme e ley aki.
Si resulta cu SVB no tin e fondo necesario pa cubri e gasto aki, anto gobierno tin e obligacion pa duna un "renteloze voorschot" na SVB.

Como titular anteriormente encarga cu SVB, mi a tuma nota cu den pasado tanto SVB como Gobiernonan, incluso mi mes, no tur ora a cumpli cu e obligacion aki, y pa es motibo aki, na 2005 mi persona, hunto cu gerencia di SVB, a tuma e decision cu mester cumpli cabalmente cu loke ley ta stipula, y a dicidi cu lo bay adapta e suma di pensioen di biehes ora cu esaki ta necesario.
Tin biaha esaki a sosode te hasta despues di 6 luna.

Como ehempel nos ta duna e transcurso ("verloop") di e suma pa soltero so:
Na juni 2005 a aumenta e pensioen pa soltero di 900 florin pa 945 florin.
Na januari 2006 a aumenta esaki un biaha mas, y ela bira 990 florin.
Na juli 2007 a aumenta e suma pa 1000 florin, y na januari 2008 esaki a bira 1021 florin.
E ultimo aumento cu a ser duna, ta data di januari 2009, pa locual e suma a bira 1057 florin.
Pues den 4 aña e pensionado soltero a conoce un aumento di 157 florin, cu ta un averahe di casi 40 florin pa aña. Pa e pensionado casa e suma aki ta mas ainda.

E tempo ey no a tira culpa riba ningun hende, ni a haci yen di propaganda.
Tampoco a haci comosifuera cu ta un fabor mi a haci na e pensionadonan.
SVB y mi persona a haci loke tabata nos obligacion pa haci!
Banda di esaki, e tempo ey tambe a tuma e decision cu gobierno lo paga e prima di AZV pa e pensionadonan, sin cu tabatin e obligacion pa haci esey!

Mi ta kere cu ningun hende den su sano huicio por tin duda cu NO tabata tin un aumento di costo di bida entre 2009 y 2015, sinembargo enbez cu gobierno y SVB a asumi nan responsabilidad y a aumenta e pensioen manera ley ta stipula, a prefera pa bay haci comosifuera cu nan ta haci e pensionado un fabor door di duna na 2011 un reparatietoeslag di 50 florin, y na 2013 a aumenta esaki na 100 florin. Si simpelmente a sigui cu loke a ser haci desde 2005, e pensionado soltero probablemente lo por a ricibi mas cu e 100 florin di "reparatietoeslag" (6 aña bes 40 florin ta 240 florin!). Atrobe, aki e pensionado casa lo por a ricibi mas ainda.

Tur e fantocheria y propaganda pa cu e "reparatietoeslag" tabata tin un solo meta, y esey ta pa tapa e incumplimiento di SVB y gobierno cu e ley di AOV, y perhudica asina e pensionado aun mas.
Ta p'esey ta di lamenta cu ta haci comosifuera cu un biaha mas ta un fabor ta haci e pensionado, siendo cu sa cu ta un derecho e ta, y cu gobierno tin e obligacion pa adapta e suma aki.
Pero ora cu bo tin un gobierno cu tin su prioridadnan robes poni, cosnan asina ta pasa, y ta hopi tristo cu tin hende ta laga nan mes ser usa den e weganan aki, enbez di mustra gobierno riba nan responsabilidad y "come accross" cu e placa conforme e ley di AOV.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 5, 2015

Expresionnan haci den e articulo aki no necesariamente ta refleha opinion di ArenaPoliti.co