{idkey=9277b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2642-partido-abo-situacion-di-e-virus-zika-mester-atencion-awor-ban-wak-si-tin-seriedad-y-boluntad-politico%3FItemid%3D101][title=Partido+ABO%3A+Situacion+di+e+virus+Zika+mester+atencion+awor.+Ban+wak+si+tin+seriedad+y+boluntad+politico][desc=Despues+cu+siman+pasa+partido+ABO+a+puntra+publicamente+atencion+pa+e+epidemia+di+e+virus+Zika+cu+ta+plamando+rapido+riba+e+continente+America+Latino+y+den+Caribe%2C+e+departamento+di+Salubridad+publico+a+reacciona+y+a+bisa+cu+te+ainda+Aruba+no+conoce+un+caso+di+e+virus.+E+dia+siguiente%2C+Corsou+a+informa+cu+nan+a+conoce+nan+prome+caso+di+e+virus+Zika.+Locual+ta+haci+e+virus+Zika+sumamente+peligroso%2C+ta+e+hecho+cu+e+ta+afecta+e+cerebro+di+babynan+cu+ainda+ta+den+barica+di+nan+mama.+E+babynan+aki+ta]}
Despues cu siman pasa partido ABO a puntra publicamente atencion pa e epidemia di e virus Zika cu ta plamando rapido riba e continente America Latino y den Caribe, e departamento di Salubridad publico a reacciona y a bisa cu te ainda Aruba no conoce un caso di e virus. E dia siguiente, Corsou a informa cu nan a conoce nan prome caso di e virus Zika.

Locual ta haci e virus Zika sumamente peligroso, ta e hecho cu e ta afecta e cerebro di babynan cu ainda ta den barica di nan mama. E babynan aki ta nace cu un cerebro mas chikito y cu defectonan. Esaki lo trece un peso emocional (y financiero) pa e mucha, famia y sociedad. Ainda no tin un cura pa e malesa y e unico recomendacion ta pospone e embaraso of aplica un abortus. Siman pasa e minister di Salubridad di Colombia, a pidi su compatriotanan pa pospone nan embaraso pa cuminsa te cu juli. Tambe e minister a informa cu tin sospecho cu e virus Zika, tambe lo tin algo di haci cu e aumento di e casonan di ‘Guillian Barré Syndrome’ den e pais. ‘Guillian Barré Syndrome’ ta un malesa caminda e mesun sistema inmunologico di un persona ta ataca e celnan di nervio. E postura di e gobierno Colombiano, ta ilustra e seriedad di e autoridad pa e virus Zika y e situacion den e pais. Paisnan manera Merca, Gran Britania y hasta Hulanda a cuminsa adverti nan ciudadanonan pa preferibel no biaha pa e paisnan caminda ta conoci cu nan tin e virus Zika. Pues manera Aruba ta rondona cu paisnan caminda e virus Zika a haci su entrada caba, e lo no dura mucho tempo mas pa e yega nos isla, si e no ta akinan caba.

Nos ta custumbra di warda te ora e baca a hoga, pa core bin cu mil y un comision (pa na lubida e cantidad di ‘foto shoot’ di algun politiconan) pa asina laga pueblo kere cu algo ta wordo haci. Den e caso di e virus Zika, nos no solamente ta papiando di un drama personal pa e famia, pero un menasa duradero pa nos turismo. Pues manera Aruba ta depende pa casi 100% di turismo, nos di partido ABO no ta kere cu nos tin cu warda te ora e prome caso di e virus Zika revela su mes na e departamento di Salubridad, pero un postura pro-activo y rapido mester wordo tuma.

Medidanan pro-activo contra e virus Zika:

• - Manera no tin un cura pa e efectonan di e virus Zika, pero nos sa cu e virus ta wordo transmiti pa e mesun sangura Aedes cu ta transmiti Dengue y Chikunguya, mester bin un programa di fumigacion awor y structural pa elimina e sangura Aedes. Asina e transmision di tur tres virus peligroso por wordo reduci. Esaki ta posibel manera el’a wordo haci den pasado pa elimina e sangura cu ta transmiti e malesa di Malaria;

• - Mester intensiva e control riba tur producto cu ta bini Aruba riba webo, larva y sangura. Den e caso cu nan wordo detecta, e cargacion tin cu bolbe su destino bek sin por drenta Aruba;

• - Mester di facilidadnan medico dedica pa haci testnan cu por detecta e virus lihe y asina autoridadnan por isola e caso prome e sigui plama;

• - Gobierno tin cu aloca e fondonan necesario lihe pa combati e virus Zika. Net manera nan sa haya fondonan lihe pa show, biahamento y proyectonan dudoso, nan mester por haya y aloca e fondonan necesario pa e menasa di e virus Zika. Y si mester adapta e presupuesto 2016, cu lo bay wordo trata e siman aki den parlamento, SO BE IT!

Cu esaki, partido ABO kier duna algun sugerencia cu por wordo implementa rapido y cu no mester di mil y un comision pa studia e materia prome. No tin tempo pa esey awor. Laga gobierno y parlamento mustra awor kico ta nan prioridad, ken su interes nan ta sirbi y con serio nan ta tuma e menasa di e virus Zika. Pues ban focus un tiki menos riba e eventonan carnavalesco y shownan politico, y pone mas atencion y seriedad riba e situacion di e virus Zika!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co