{idkey=7669b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2715-booshi-wever-upp-benny-sevinger-mester-bay-gobernador-y-entrega-su-retiro%3FItemid%3D101][title=Booshi+Wever+%28UPP%29%3A+Benny+Sevinger+mester+bay+Gobernador%2C+y+entrega+su+retiro%21%21][desc=Den+luna+di+januari+UPP+a+mustra+caba+cu+Benny+Sevinger+mester+a+tuma+su+retiro+a+base+di+e+declaracion+di+Presidente+di+Parlamento%2Fciudadano+Marisol+Lopez+Tromp%2C+y+e+declaracion+di+e+inversionista+y+abogado+di+Ocean+Z%2C+pero+en+cambio+nos+por+a+wak+con+di+tur+manera+sr.+Sevinger+a+troce+e+berdad+pa+por+hustifica+su+actonan+tanto+den+prensa+como+den+Parlamento.E+voto+di+desconfianza+di+parti+di+Presidente+di+Parlamento+no+tabata+un+sorpresa+pa+UPP.+Nos+a+mustra+caba+cu+como+ciudadano+Marisol+Lope]}
Den luna di januari UPP a mustra caba cu Benny Sevinger mester a tuma su retiro a base di e declaracion di Presidente di Parlamento/ciudadano Marisol Lopez Tromp, y e declaracion di e inversionista y abogado di Ocean Z, pero en cambio nos por a wak con di tur manera sr. Sevinger a troce e berdad pa por hustifica su actonan tanto den prensa como den Parlamento.

E voto di desconfianza di parti di Presidente di Parlamento no tabata un sorpresa pa UPP.
Nos a mustra caba cu como ciudadano Marisol Lopez Tromp no por tin un postura, y como Presidente di Parlamento/Parlamentario di AVP un otro, particularmente na momento cu e ta un di personanan cu a hiba minister Benny Sevinger huez.
Tambe tabata logico - si e Presidente di Parlamento kier a keda consequente - pa vota contra e presupuesto 2016.
Un voto na fabor di e presupuesto lo a nifica cu sra. Lopez Tromp lo a acepta e maneho di iregularidad cu den e caso aki minister Sevinger a bin ta hibando.

Na opinion di UPP, mirando e dos sentencianan den un luna, e splicacion pober di e minister en cuestion y e resultado di e reunion di Parlamento riba presupuesto 2016, no ta keda nada otro pa Benny Sevinger dirigi su mes na e despacho di Gobernador y entrega su retiro, no "per" 1 april, manera minister Oduber a haci, sino "per direct".

UPP ta wak henter e desaroyo di permisologia di parti di gobierno y den e caso aki di minister Sevinger, cu hopi preocupacion.
Banda di Ocean Z, tambe tin e caso di abogado Rep, kende tambe a lanta un caso contra gobierno.
Di un banda minister ta bisa cu tur proceso ta bay normal, y cu e no ta envolvi y cu e tin di respeta sentencia di huez, pero di otro banda nos tin comprendi cu den e caso di Ocean Z, cu -  apesar cu departamentonan tabata sera- tabata tin instruccion di parti di minister pa haci pura, y a pone hende traha den e dianan liber pa asina "alsnog" otorga e "bestemmingswijziging".

Tambe ta vislumbrando un otro problema pa loke ta mesun region di Malmok, unda e doñonan y inversionista di un Heliport ta pensa di cuminsa un caso contra gobierno pa daño y perhuicio. Ken a duna “green light” pa sigui traha riba e proyecto aki? Al final pueblo ta esun cu tin cu paga.

Awor cu Presidente di Parlamento a papia idioma cla den Parlamento - unda hasta ta bisa cu minister Sevinger parce di ta duna indicacion di ta sostene ilegalidad - ta na su lugar pa mas pronto posibel presidente di Parlamento yama e reunion publico proponi pa oposicion.
Ta mas cu obvio cu nos comunidad merece di tin claridad riba e asunto aki, pasobra no por ta asina cu patrimonio di pueblo ta wordo uza y maluza na antoho di ministernan.
Ainda ta bin acerca e forma con minister Sevinger a otorga un tereno pa Roberto Rincon.
Tin hopi pregunta riba esaki, particularmente e screening cu minister Sevinger a ehecuta riba Rincon, mientras cu di otro banda minister de Meza den Parlamento ta bisa cu nan a uza Seguridad Nacional pa haci e investigacion.

UPP ta kere cu Parlamento mester stop di ta complaciente na e gobierno actual, y wak of percura pa cumplimento di ley y regla aki na Aruba.
Parlamento mester haya e oportunidad pa pidi minister Sevinger bin responsabilisa su mes pa su actonan, ya cu na nos opinion e no por keda mas como minister.

Tur e acontecimentonan aki tambe ta conoci na Hulanda, y tur esaki ta haci nos pais mas daño y ta duna Hulanda mas motibo pa sigui mete cu nos of pa purba di "get rid" di nos.
Esaki ora cu nos scucha Bosman, parlamentario di Tweede Kamer, bisa cu nan no ta e generacion di politiconan mas manera tempo di de Koning, van der Stee, Bas de Gaay Fortman of Wim Kok. Nan exigencianan awendia ta hopi mas grandi, y nan no kier pa nan constituyente, pagador di belasting hulandes, ta bay carga cu e porkeria crea aki banda.

UPP ta lamenta keto bay, cu for di e seno politico aki na Aruba, ainda no a yega na un consciencia general cu lo mester bin cu “Compromiso Nacional” pa percura pa introduci e reglanan estricto di "Good Governance" pa asina ey por contra-aresta loke ta pasa aki na Aruba. Introduccion di e reglanan aki ta e unico manera pa nos por enfrenta e politiconan hulandes cu kier bin mete den nos asuntonan interno.
Y cu palabranan populista nos lo no logra, pero sí cu hechonan.
Aruba QUO VADIS?


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 4, 2016

Expresionnan haci den e articulo aki no necesariamente ta refleha opinion di ArenaPoliti.co