{idkey=6879b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2594-booshi-wever-upp-declaracion-di-abogado-di-ocean-z-ta-mas-motibo-di-preocupacion-pa-e-situacion-di-permisologia-aki-na-aruba%3FItemid%3D101][title=Booshi+Wever+%28UPP%29%3A+Declaracion+di+abogado+di+%E2%80%9COcean-Z%E2%80%9D+ta+mas+motibo+di+preocupacion+pa+e+situacion+di+permisologia+aki+na+Aruba][desc=Ya+caba+den+nos+comunicado+anterior%2C+UPP+a+mustra+riba+e+declaracion+di+Marisol+Lopez+Tromp+tocante+e+situacion+di+Boetiekhotel+Ocean+Z.+Na+opinion+di+UPP+sea+Benny+Sevinger+mester+retira+como+minister+despues+di+e+declaracionnan+aki+y+tambe+e+sentencianan+di+huez%2C+of+Marisol+Lopez+Tromp%2C+como+parlamentario%2C+lo+mester+retira+su+sosten+na+minister+Sevinger+den+e+caso+aki.Despues+di+a+tuma+nota+di+e+conferencia+di+prensa+di+abogado+di+Ocean+Z%2C+mas+ta+e+interogatorionan+cu+ta+bini+dilanti+tocante+e]}
Ya caba den nos comunicado anterior, UPP a mustra riba e declaracion di Marisol Lopez Tromp tocante e situacion di Boetiekhotel Ocean Z.
Na opinion di UPP sea Benny Sevinger mester retira como minister despues di e declaracionnan aki y tambe e sentencianan di huez, of Marisol Lopez Tromp, como parlamentario, lo mester retira su sosten na minister Sevinger den e caso aki.

Despues di a tuma nota di e conferencia di prensa di abogado di Ocean Z, mas ta e interogatorionan cu ta bini dilanti tocante e “gang van zaken” aki na Aruba pa loke ta trata henter e asunto di otorgamento di permiso.
Di un banda por tin comprension pa inversionistanan cu awor cu nan ta cla pa start sali, ta haya nan cu e situacion cu nan no por ricibi ainda nan hotelvergunning.
E asunto aki ta bira mas cuestionabel ora nos wak cu aki ta trata, segun e abogado, di un desaroyo cu a cuminsa na 2013, na unda e minister di Economia y di Turismo a bishita e proyecto pa mira kiko ta su balor agrega.
Nos no sa kiko a wordo palabra, pero mi no ta kere cu e inversionistanan lo a continua cu e proyecto sin cu a haya un speransa di por a habri e hotel na 2015.
Mas tristo ta di mira con, mientras cu e desaroyadornan di e proyecto tabata realisa y ehecuta e proyecto, un cantidad di permiso no tabata regla. Cu otro palabra, a base di cual palabracion of “green light” e desaroyadornan tabata traha bay goal?
Kende ta e minister(nan) responsabel p’esaki?

Pa di prome, ta faya di no percura pa e cambio di permiso di erfpacht, esta regla e “bestemmings-wijziging” prome.
Henter e conhunto di permiso ta bay bruha y pa asina termina cu hustamente loke mester tabata prome.
Ta permiti hende traha e proyecto sin e cambionan necesario.
Tin un set di permisonan cu tambe a wordo pidi, esta hotel, “vestiging y hinder”.
Tambe ta importante pa haya sa si na momento cu ta bay over na haci un “bestemmings-wijziging”, lo no tabata na su lugar pa publica esaki pa asina duna e personanan cu ta biba den e besindario, oportunidad pa entrega nan obhecionnan.

E sentencia di huez y e caso aki lo mester sirbi tambe pa e resto di maneho cu tin pa loke ta tratacambio di destinacion di terenonan erfpacht, pero pa henter Aruba. Cuanto no ta e habitantenan cu diripiente tin di haber cu sea supermarket, hardware, bar, discoteque, carwash y garage, banda di nan?

Nos di UPP ta contento di mira cu oposicion a haya bon pa pidi un reunion di Staten tocante di asunto aki.
Si Presidente di Parlamento Marisol Lopez-Tromp yama e reunion aki, nos ta spera cu e tuma asiento como parlamentario y laga vice-Presidente di Staten dirigi e reunion, pa asina ey e por expone su punto di bista, y cuestiona e minister di Infrastructura pa loke ta trata su maneho di otorgamento di permiso pa tereno, “bestemmingswijziging”, etc.

UPP kier recorda parlamentario Marisol Lopez-Tromp cu ta hustamente e minister di Infrastructura awe, den pasado a cuestiona e maneho di Marisol Lopez-Tromp como minister di Infrastructura, riba e mesun tipo di asuntonan aki.
Nos kier corda con a haci mofa cu un bode a haya terenonan na grandi riba Sasaki y cu tabata haci negoshi cu ne.

Henter e asunto aki di permisologia, of hustamente e sistema di atende cu permisonan, ta bay full robez, y ta acentua atrobe e forma di pensa di partido AVP y su minister, esta e modus operandi, di “nos tin 13 y ta nos ta manda”.
Asina aki Aruba ta wordo goberna y dirigi.
Aruba, QUO VADIS?

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, januari 19, 2016

Expresionnan haci den e articulo aki no necesariamente ta refleha opinion di ArenaPoliti.co