{idkey=7994b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2823-parlamentario-jeffrey-kelly-avp-pabien-na-pueblo-di-aruba-riba-dia-internacional-di-lenga-materno%3FItemid%3D101][title=Parlamentario+Jeffrey+Kelly+%28AVP%29%3A+Pabien+na+pueblo+di+Aruba+riba+Dia+Internacional+di+Lenga+Materno][desc=Dia+Internacional+di+Lenga+Materno+ta+pone+nos+para+un+rato+keto+y+reflexiona+riba+nos+idioma+materno%2C+cu+ta+Papiamento.+Riba+dia+21+di+februari+di+tur+a%C3%B1a+ta+Dia+Internacional+di+Lenga+Materno%2C+proclama+door+di+UNESCO.+Tin+varios+organisacion+no+gubernamental+manera+Fundacion+Lanta+Papiamento+%28FLP%29%2C+Grupo+Corector+di+Papiamento+%28GCP%29+y+instancia+di+gobierno%2C+manera+nos+Biblioteca+Nacional+%28BNA%29%2C+Instituto+Pedagogico+Arubano+%28IPA%29%2C+Sr.+Mirto+Lacle%2C+docentenan+di+Papiamento+na+scolnan+avanza%2C+Li]}Dia Internacional di Lenga Materno ta pone nos para un rato keto y reflexiona riba nos idioma materno, cu ta Papiamento. Riba dia 21 di februari di tur aña ta Dia Internacional di Lenga Materno, proclama door di UNESCO. Tin varios organisacion no gubernamental manera Fundacion Lanta Papiamento (FLP), Grupo Corector di Papiamento (GCP) y instancia di gobierno, manera nos Biblioteca Nacional (BNA), Instituto Pedagogico Arubano (IPA), Sr. Mirto Lacle, docentenan di Papiamento na scolnan avanza, Linguistanan y Departamento di Cultura Aruba cu ta activo cu varios proyecto popular. Proyecto manera “Arte di Palabra”, “Expedicion Rescate” y algun publicacion. Tur ta trahando cu hopi amor pa nos idioma Papiamento. Ta di reconoce tambe e lucha hiba pa reconocemento di nos idioma, te cu Papiamento, riba 21 di mei 2003, a keda oficialisa door di Parlamento di Aruba. 

Nos futuro generacion 

Lo mester sigui duna nos hobennan oportunidad pa demostra nan creatividad literario, pa promove lesamento y skirbimento den nos idioma Papiamento mas y mas tambe; pa stimula publicacion di arte literario den Papiamento. Nos escritornan lo por haya oportunidad di skirbi mas buki na Papiamento dunando aporte na nos curiculo di nos enseñanza y enrikece e conocemento di nos idioma. Nos compositornan mester wordo motiva pa sigui compone canacionnan den nos idioma Papiamento.

Responsabilidad ta di nos tur

Mas y mas nos instancianan gubernamental y no gubernamental lo mester saca relatonan y den forma oficial y e uzo corecto di nos idioma Papiamento. Lo ta bon tambe pa nos medionan di comunicacion haci uzo corecto di Papiamento, pa yuda stimula esaki den nos comunidad.
Den sentido general ta considera idioma, como e medio unificador di mas importante di un cultura. Idioma ta carga tur pensamento y experiencia humano, cultura y identidad. Idioma ta transferi cultura. Idioma ta e vehiculo importante di comunicacion diario entre nos.

Gobierno di Aruba mester sigui duna prioridad na idioma Papiamento como un instrumento importante den educacion general y cultural. Ortografia tambe ta un simbolo sumamente importante, como muestra di un propio identidad. Mester mustra cu e oficialisacion por crea aprecio y stimula nos pa, cu orguyo y amor, siña conoce e historia di nos idioma materno bon. Conhuntamente nos mester promove e uzo corecto di papi’e y skirbie.

Tambe riba nos medionan social nos lo mester trata di comunica cu otro den e uzo corecto di nos dushi lenga materno, cu ta Papiamento. Nos ta bay haci 13 aña caba cu Papiamento ta un idioma oficial como Arubiano nos ta keda cu e reto cu nos tin pa e comunidad keda bon educa y promove nos mes un idioma; cuid’e y hacie mas conoci y bon uzo di nos Papiamento pa generacionnan cu ta bin.

30 aña di nos Status Aparte

Mirando e lucha largo di e pueblo di Aruba pa defende e identidad Arubano y e derecho di autodeterminacion, finalmente a surgi un pais nobo y autonomo dia prome di januari 1986 y awe ya nos ta celebrando nos 30 aña di Status Aparte. Den e contexto historico aki a surgi tambe un rebalorisacion di nos cultura local y di Papiamento como idioma nacional, cu ta un proceso continuo.

Demostra amor y orguyo pa loke ta di nos

Papiamento ta sumamente importante como muestra di un propio identidad. E oficialisacion na 2003 tambe ta parti di un proceso di rebalorisacion social- cultural di Aruba como pais. Esaki por crea mas aprecio y stimula nos pa, cu orguyo y amor, siña conoce e historia di nos idioma materno bon. Ban cuida Papiamento como Idioma Nacional y como Idioma Oficial y dune e balor cu e merece. Parlamentario Kelly ta finalisa dunando pabien na nos Arubianonan riba Dia Internacional di Lenga Materno.

Expresionnan haci den e articulo aki no necesariamente ta refleha opinion di ArenaPoliti.co