{idkey=8015b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2824-dangui-oduber-mep-minister-otmar-oduber-ta-confirma-cu-turismo-ta-den-crisis-lo-haci-uso-di-fondo-di-reserva-pa-mercadeo%3FItemid%3D101][title=Dangui+Oduber+%28MEP%29%3A+Minister+Otmar+Oduber+ta+confirma+cu+turismo+ta+den+crisis%21+Lo+haci+uso+di+fondo+di+reserva+pa+mercadeo][desc=For+di+algun+anja+caba+nos+ta+hibando+un+discusion+cu+minister+di+turismo+riba+e+calidad+di+turistanan+cu+ta+biniendo+Aruba+y+tambe+e+cantidad+di+placa+cu+turistanan+ta+lagando+atras.+Na+momento+cu+nos+tawata+cuestiona+Otmar+Oduber+esaki+tawata+bira+masha+onsportief+y+masha+arrogante+y+tawata+ignora+e+criticanan.+Nos+mester+recorda+Otmar+Oduber+cu+nos+trabou+ta+pa+vigila+y+controla+gobierno+y+duna+sugerencianan+caminda+por+pa+por+engrandece+nos+turismo.+Esey+no+ta+kita+afor+cu+nos+tarea+y+obliga]}
For di algun anja caba nos ta hibando un discusion cu minister di turismo riba e calidad di turistanan cu ta biniendo Aruba y tambe e cantidad di placa cu turistanan ta lagando atras. Na momento cu nos tawata cuestiona Otmar Oduber esaki tawata bira masha onsportief y masha arrogante y tawata ignora e criticanan. Nos mester recorda Otmar Oduber cu nos trabou ta pa vigila y controla gobierno y duna sugerencianan caminda por pa por engrandece nos turismo. Esey no ta kita afor cu nos tarea y obligacion ta pa informa nos pueblo correctamente sin tin cu manipula cu informacionan. No ta for di awor pero for di 2 anja pasa caba nos a bin ta informando nos pueblo riba e trend nobo den nos turismo. E trend nobo aki ta cu turistanan cu ta biniendo Aruba no ta kedando na hotelnan mas sino mas bien na ‘’other accomodations’’ No solamente esaki ta un trend sino e ‘’turistanan Venezolano” cu a aumenta na un forma explosivo nunca por a wordo considera como turista. Nos a atende cu e fenemomeno aki durante tratamento di presupuesto 2015 y na lugar cu Otmar Oduber a tuma esaki na serio y busca solucionan na e momnento ey,  a bai sinta hunga wega sushi politico manera ta su custumber. E la bai bisa cu mi lo ta insultando Venezolanonan, e la pidi te hasta pa mi pidi un disculpa na e Venezolanonan pa e supuesto insultonan. Awe e propio minister Otmar Oduber ta bin reconoce e feneomeno nobo aki y ta admiti cu tin probleman den nos turismo.

Pa 8 luna consecutivo grado di occupacion di hotelnan ta cayendo. Pa 8 luna consecutivo REV PAR ta bin ta cayendo. Mas cu 400.000 turista cu a bishita nos pais anja pasa NO a hospeda na hotelnan sino na ‘’other accomodations’’. Di e 400.000 turista aki 276,000 turista Venezolano NO a keda na hotel. E 276,000 turista Venezolanonan aki NO por wordo cualifica como turista pero mas bien como turistnan cu a bin Aruba pa saca dollars y divisas di nos pais. No ta pornada banconan a kita machinenan di point of sale for di comerciantenan cu tawata haci negoshi cu e machinenan aki. No ta pornada awe bo ta wak na tur bancomatico den tur skina un nota cu no por lanta dollars mas. Loke nos ta condena ta cu Otmar Oduber ta broma cu cantidad di placa cu turistanan a laga atras a crece pero e mester por sa mihor cu esaki no ta cuadra cu e realidad. Na momento cu un turista Venezolano swipe su carchi pa saca dollars, e transaccion local aki ta wordo registra como placa cu a wordo laga atras den nos economia. En realidad e placa NO a wordo laga atras sino mas bien e placa a wordo saca for di nos economia. E crecemento di turistanan Venezolano NO ta uno logico y nunca por a usa esaki como un crecemento real pasobra e NO ta.

E situacion actual den nos turismo ta uno di crisis mirando cu mas di 30% di turistnan cu ta bin Aruba NO ta keda na hotelnan. Nos mester tene bin na cuenta cu hotelnan ta emplea gran parti di e Mercado laboral na Aruba. For di entrada di hotelnan ATA mes ta haya su entradanan cu ta wordo usa pa mercadea na Aruba. Hotelnan ta paga tur impuesto cu tin y ta cumpli cu tur ley vigente. Na momento cu hotelnan cuminsa bai malo esaki lo crash nos economia. E ta un situacion hopi tenso y grave.

Awe Otmar Oduber ta duna opiscion rason pasobra awe e ta bin admiti cu tin un trend nobo den turismo y pesey mester cambia e strategia di mercadeo. Awe ta bai usa placa cu ta destina pa ora tin crisis pa mercadeo di nos turismo. Awe ta bai mishi cu placa NO mester mishi cune pasobra e placa aki ta destina como reserva na momento cu tin crisis. E unico conclusion cu nos por saca afor e ora ta, Aruba su turismo ta den crisis na e momentonan aki mirando e ultimo delcaracion di Otmar Oduber y tambe e hecho cu e ta bai usa placa di reserva pa mercadeo siendo cu ja e tin miyones di florin caba na su disposicion pa haci mercadeo. E ora toch nos mester para keto y puntra nos mes un rato si e placa cu ta wordo usa pa mercadeo a duna resultado y a sirbi e proposito. Otmar Oduber su maneho mas bien a converti Aruba den un ‘’cheap destination’’.

Expresionnan haci den e articulo aki no necesariamente ta refleha opinion di ArenaPoliti.co