{idkey=116b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2825-dangui-oduber-mep-gobierno-ta-kita-e-drecho-adkeri-di-tur-pensionado-di-apfa-y-svb-basta-nan-bisa-nan-a-scapa-e-fondonan%3FItemid%3D101][title=Dangui+Oduber+%28MEP%29%3A+Gobierno+ta+kita+e+derecho+adkeri+di+tur+pensionado+di+APFA+y+Svb%21+Basta+nan+bisa+nan+a+scapa+e+fondonan%21][desc=Cada+vez+nos+mester+scucha+sea+promer+minister+Mike+Eman+of+lider+di+fraccion+di+AVP+Rene+Herde+papia+tocante+sea+e+fondo+di+Svb+of+e+fondo+di+pensioen+di+APFA.+Nan+ta+bisa+cu+nan+a+rescata+e+fondonan+aki+y+a+scapa+e+fondonan+aki.+Loke+nos+ta+lamenta+ta+e+malinformacion+y+mitad+berdad+cu+cada+rato+nan+ta+keda+menciona.+Ta+condenabel+con+ta+malifnorma+pueblo+sin+conta+henter+e+berdad+kendenan+realmente+e+percura+pa+garantiza+existencia+di+e+fondonan.+Ta+importante+pa+tur+pensionado+di+APFA%2C+esta+]}
Cada vez nos mester scucha sea promer minister Mike Eman of lider di fraccion di AVP Rene Herde papia tocante sea e fondo di Svb of e fondo di pensioen di APFA. Nan ta bisa cu nan a rescata e fondonan aki y a scapa e fondonan aki. Loke nos ta lamenta ta e malinformacion y mitad berdad cu cada rato nan ta keda menciona. Ta condenabel con ta malifnorma pueblo sin conta henter e berdad kendenan realmente e percura pa garantiza existencia di e fondonan.

Ta importante pa tur pensionado di APFA, esta esnan den servicio di gobierno, esnan cu ta traha sea na Setar N.V., Web NV, Elmar NV of na cualkiere otro NV di gobierno cu ta contribui na e fondo di APFA ta informa cual ta e decisionan cu gobierno a tuma perhudicando tur esnan cu ta bayendo cu pensioen y tin cu bai cu pensioen ainda. Anteriormente, promer cu e famoso reforma (medida) di Mike Eman y su gobierno tur deelnemer (pensionado) di APFA ora e baha cu pensioen tawata cobra 70% di su ultimo salario. Banda di esaki e tawata ricibi tambe e pensioen di AZV y tur esakinan e por a cobra na momento cu e yega e edad di 60 anja. Mike Eman a hiba un campanja y a haci e promesa cu ‘’over his dead body’’ lo aumenta e edad di pensioen na 62 anja. Una vez den gobierno no solamente Mike Eman a aumenta e edad di pensioen na 65 anja pa tur esnan cu ta pagando nan prima via APFA. Banda di esaki e gobierno actual a reforma APFA y a bin cu ‘’franchise’’ y tambe middenloonregeling.

No solamente e gobierno aki a kita 60 luna di pensioen, e la pone e empleado publico traha mas pero tambe e la kita casi 50% di su salario. Mayan ora e empleado publico baha cu pensioen e lo bai cobra 50% menos pa pensioen. Na lugar cu gobierno a salvaguardi un pesioen husto pa tur e prima cu e empleado publico ta paga ta kita for di dje. Gobierno mes no a duna nada di su banda pasobra ta esnan cu ta contribui ta wordo sacrifica.

Kiermen ora Mike Eman ta bisa cu e la scapa e fondo di pensioen di APFA e ta ganja pasobra gobierno NO a haci absolutamente nada pa scapa e fondo aki. Esnan cu realmente a scapa e fondo ta e deelnemersnan. Ta nan ta esnan cu mester bai traha mas, entrega mas y cobra menos mayan. Ta nan ta esnan cu mester a entrega casi 300 miyon cu nan tawata tin derecho riba dje pa garantiza extistencia di e fondo di APFA. Gobierno di su banda NO a duna ningun contribucion di placa pasobra loke gobierno a haci ta fia placa di APFA pa paga APFA bek loke e tawata debe. De facto ainda gobierno tin un debe grandi habri serca APFA pero e empleado publico y e otro deelnemers nan di APFA si a entrega grandemente.

Mike Eman mester stop di papia y stop di menciona cu e la scapa e fondo di APFA pasobra na un forma obligatorio e empleadonan publico mester bai traha mas pa mayan cobra menos. E gobierno aki a kita 60 luna di pensioen for di ambtenaar. Si anteriormente ora un ambtenaar baha cu pensioen e tawata cobra 70% di su ultimo salario actualmente ora e baha esaki ta wordo calcula a base di su salario promedio durante henter su carera. Esaki ta nifica cu e empleado publico a bai atras cu por lo menos 50% di su pensioen.

Manera cu e castigo aki ainda no ta basta Mike Eman a aumenta e edad di pensioen di Svb tambe te cu 65 anja y tambe a aumenta e prima di AOV cu 30%. Un empleado publico lo entrega danki na Mike Eman 120 luna di pensioen (60 luna di APFA y 60 luna di Svb). Esaki no ta husto y mas bien por wordo considera un abuso contra e clase trahador. Na e manera aki tur hende por bisa cu nan a scapa e fondonan si ta e trahador mes a wordo castiga y sacrifica pa scapa e fondo. Gobierno di su banda no a duna ningun placa addicional pa garantiza existencia di e fondonan aki.

Expresionnan haci den e articulo aki no necesariamente ta refleha opinion di ArenaPoliti.co