{idkey=2480b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3130-parlamentario-chris-romero-mep-minister-sevinger-a-bolbe-demostra-su-incosistencia-y-maneho-iresponsabel-pa-cu-cartera-di-infrastructura%3FItemid%3D101][title=Parlamentario+Chris+Romero+%28MEP%29%3A+Minister+Sevinger+a+bolbe+demostra+su+incosistencia+y+maneho+iresponsabel+pa+cu+cartera+di+infrastructura][desc=Durante+e+reunion+publico+na+Parlamento+caminda+a+trata+presupuesto+di+DOW+pa+a%C3%B1a+2016%2C+nos+fraccion+a+dirigi+varios+pregunta+na+Minister+Sevinger+relaciona+cu+e+Green+Corridor.+Remarcabel+tabata+cu+Minister+Sevinger+no+por+a+duna+un+contesta+factibel%2C+realistico+y+satisfactorio%2C+riba+2+pregunta+cu+nos+di+Parlamento+a+dirigi+na+su+persona.+Ta+un+hecho+cu+pais+Aruba+tin+un+combenio+cu+Deutsche+Bank%2C+caminda+nos+tin+di+paga+16.5+miyon+pa+a%C3%B1a+p%26%23039%3Basina+nan+por+financia+e+proyecto+di+Green+Corridor.]}
Durante e reunion publico na Parlamento caminda a trata presupuesto di DOW pa aña 2016, nos fraccion a dirigi varios pregunta na Minister Sevinger relaciona cu e Green Corridor.
Remarcabel tabata cu Minister Sevinger no por a duna un contesta factibel, realistico y satisfactorio, riba 2 pregunta cu nos di Parlamento a dirigi na su persona.

Ta un hecho cu pais Aruba tin un combenio cu Deutsche Bank, caminda nos tin di paga 16.5 miyon pa aña p'asina nan por financia e proyecto di Green Corridor.
Y ta precisamente den e contexto aki cu nos a cuestiona Minister Sevinger, purbando di haya mas claridad encuanto e financiamento di e proyecto.
Un di e preguntanan  cu nos a hasi tabata: Kiko lo pasa cu e caminda pa loke ta trata mantencion, den caso cu e compania cu ta trahando riba e proyecto bay failliet? Minister su contesta riba e pregunta aki tabata cu si nan mester bay falliet, Aruba no lo mester paga mas. Un contesta sin contenido realistico y basta inconsistente.
Imaginabo si bo ta bay traha un cas y ta bay laga banco financia esaki, mientras un compania di construccion ta trahando e cas. A resulta cu e compania di construccion a bay failiet sin caba construccion di bo cas. Esaki no ta un argumento cu lo bo por duna banco p’asina no sigi paga bo cas. Realistica y logicamente, e deal pa construi bo cas ta entre abo y compania, banco no tin nada di haber pasobra e lening (financiamiento) a keda aproba pa banco caba, y ta un acuerdo entre abo cu banco.
Dunando e ehempel aki mi kier ilustra cu den e caso especifico di Green Corridor, ta nifica cu Gobierno di Aruba ta responsabel pa paga e Deutsche Bank e suma pacta, sin importa si e desaroyador cumpli of no debidamente cu construccion di e proyecto.
E siguiente pregunta cu Minister Sevinger a neglisha y keda sin contesta deliberadamente, tabata: Ki costo pueblo di Aruba lo tin di bay paga per strekkende meter?
Aunke Minister Sevinger a purba di hasi un calculacion, den pura y sin factornan concreto, el a prefera di bisa cu e ta dificil pa por hasi un calculo asina pasobra tin mas factor cu ta bin aserca y mester tene cuenta cu nan tambe. Pero den e mesun rosea, sr. Sevinger a laga sa cu normalmente ta costa DOW 1200 florin pa cada strekkende meter, y e suma cu el a duna pa e proyecto di Green Corridor, durante tratamento di presupuesto 2016, ta 2300 florin per strekkende meter excluyendo algun parti di e construccion (cual nos sa tambe cu no ta cuadra cu e realidad).
Basa riba nos calculacion di 292 miyon florin riba e proyecto, per strekkende meter, lo mester costa nos pais 36500 florin pa cada stap cubo dal riba e Green Corridor.

Un bes mas por comproba declaracionan irealistico cu ta denota claramente e maneho inconsistente y iresponsabel di Minister Sevinger pa cu cartera di infrastructura.

Expresionnan haci den e articulo aki no necesariamente ta refleha opinion di ArenaPoliti.co