{idkey=6780b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3254-upp-seguridad-na-aruba-ta-sufri-keto-bay-pa-falta-di-maneho-riba-tereno-hudicial-y-pa-motibo-di-un-maneho-di-frontera-habri-sin-control%3FItemid%3D101][title=UPP%3A+Seguridad+na+Aruba+ta+sufri+keto+bay+pa+falta+di+maneho+riba+tereno+hudicial+y+pa+motibo+di+un+maneho+di+frontera+habri+sin+control][desc=Cu+hopi+preocupacion+partido+UPP+a+bin+ta+tuma+nota+di+e+crecemento+increible+di+criminalidad+riba+nos+isla.+Mientras+cu+na+2009+ainda+nos+por+corda+con+tanto+Mike+Eman+tabata+sali+for+di+patras+di+un+cura+of+mata+y+bisa+cu+nan+si+tin+e+solucion+pa+criminalidad%2C+awe%2C+7+a%C3%B1a+despues%2C+nos+por+mira+cu+ni+un+maneho+drechi+por+wordo+presenta+na+comunidad+pa+loke+ta+combatimento+di+criminalidad.Na+2013+Arthur+Dowers+como+minister+ainda+tabata+bisa+boca+grandi+cu+ta+algun+hende+ta+haci+di+mas%2C+mientras]}
Cu hopi preocupacion partido UPP a bin ta tuma nota di e crecemento increible di criminalidad riba nos isla. Mientras cu na 2009 ainda nos por corda con tanto Mike Eman tabata sali for di patras di un cura of mata y bisa cu nan si tin e solucion pa criminalidad, awe, 7 aña despues, nos por mira cu ni un maneho drechi por wordo presenta na comunidad pa loke ta combatimento di criminalidad.
Na 2013 Arthur Dowers como minister ainda tabata bisa boca grandi cu ta algun hende ta haci di mas, mientras cu e criminalidad existente ta simpelmente un “percepcion”. Tambe nos ta corda con e parlamentario Velasquez a hasta sugeri nos pueblo pa busca alarma na un compania priva y asina yuda evita p.e. ladronicia na cas.

Na momento cu e situacion di criminalidad a sigui crece, Ministro di Justicia ta sali afor y ta critica e.o. nos mayornan cu no sa con pa cria nos yiunan. Asina tur hende ta wordo culpa, mientras cu e minister mes no ta tuma e pasonan necesario. Na momento di un of otro accion policial, cu bon resultado, e ora ey sí ta core bay show y saca potret, pa asina purba haci damage control.

Awor nos por scucha Dowers bisa cu e culpa di e criminalidad ta e turismo di pais bisiña cu ta bin na gran escala, y cu mester mas inversion den ekipo y polis pa proteha nos comunidad.
Den mesun sentido nos por a scucha lider di fraccion di AVP, Herde, declara cu tin dos causa pa e aumento di criminalidad y inseguridad alarmante na Aruba.
Na prome lugar esun di e educacion cu nos muchanan no ta haya na cas ni na scol, y na di dos lugar e ingreso di hende for di pais bisiña cu a bin nos isla a causa di e situacion socio economico pesimo na nan pais.

UPP por constata tambe un critica pisa riba ministro di Justicia dor di tanto oposicion, corantnan simpatisante di e partido na mando, pero tambe di integrantenan di e partido berde mes cu parce di ta exigiendo cabez di Dowers.
UPP seguramente ta hopi preocupa pa e cantidad di arma cu tin riba nos isla. Parce no tin e control na nos fronteranan, y cada biaha nos por tende tambe di mas ilegalnan cu ta drentando Aruba. Nunca nos no ta tende cu nan a wordo saca.
Asina nos por menciona cu desde hopi tempo caba no ta tuma e lugar e screening riba antecendente di esnan cu ta drenta Aruba. Ni antecendente hudicial ni esun medico. Nos frontera ta hopi habri mes, loke ta haci cu esaki ta trece cu ne tambe influencia di afor cu ta contribui solamente na aumento di inseguridad riba e isla.
UPP ta lamenta si cu ta tarda 7 aña pa Dowers reconoce cu nada no a wordo haci. Cu no tin maneho y no tin inversion den nos seguridad. Tambe cu nos fronteranan no ta na ordo.

Mientras cu Dowers ta den e loop politico, nos tin un minister presidente cu defacto ta ausente. E lider di e gabinete no t’ey, y no ta eherce su rol di lider, loke cu su minister Otmar Oduber a bise dia 6 di januari dilanti oficina di Gobernador.
Mientras cu Mike Eman ta keiro na Merca (New York, Washington DC y City of Doral na Florida pa firma un acuerdo atrobe dia 6 di mei), na Aruba nos pueblo ta keda sufri.
Como prome ministro Mike Eman ta fayando barbaramente, y parce di no ta importa mes cu e situacion, pero ta trata di busca fama rond mundo. E ta e persona principal cu mester wordo mira como culpabel, pasobra tanten cu e no ta interveni den su ministernan y pone nan na ordo pa nan traha pa nos pueblo, situacion ta sigui bay for di man.
Un minister di justicia cu realmente no ta mustra interes den ataca nos problemanan y otro ministernan (di Labor y Stranheria) cu ta haci y deshaci cu situacion di permiso aki na Aruba, mientras cu nos fronteranan no ta wordo cuida manera mester ta.
Un minister di Finanzas cu no ta mira e necesidad pa hinca placa den proteccion di pueblo, pero si ta bay di acuerdo pa hinca un par di miyon den camara na KIA, kitando esaki for di nos muchanan especial.
Un minister di economia cu parce ta su propio economia e ta ocupa cu ne, mientras cu e situacion socio-economico, desempleo y hamber, ta pone cu tin un aumento di criminalidad pa por sobrevivi.

UPP na varios ocasion a alerta pa e situacionnan aki, y den diferente ocasion a denuncia e maneho deliberado di gabinete Mike Eman pa percura cu nos frontera a wordo hancho habri. A elimina e sistema di swiss model y screening di esnan cu ta drenta. E kitamento di visa. Asina nos por sigui menciona.
Awe nos por scucha Herde di AVP ta papia di mester sera e frontera mas. Mientras cu nos por corda con algun tempo pasa Mike Eman, su lider, ta bisa cu Aruba mester keda humanitario y ricibi tur esnan den necesidad cu man habri. Pero que hubo di e Arubianonan den necesidad? Ken ta ricibi nan cu man habri?
UPP ta kere cu ya ta laat caba pa e gabinete actual bini cu maneho y medidanan pa frena e situacion alarmante di criminalidad aki na Aruba, y no ta keda nada otro pa e gobierno aki bay cas mas liher cu ta posibel. Si mester warda pa e gobierno aki bay cas otro aña despues di eleccion, nos pueblo lo sangra muri na man di e gobierno di mas malo cu Aruba a conoce.

Aruba QUO VADIS?

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 5, 2016

Expresionnan haci den e articulo aki no necesariamente ta refleha opinion di ArenaPoliti.co