{idkey=651b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3461-prome-minister-mike-eman-mester-wak-bon-ki-tipo-di-operacion-di-hotel-tin-mas-rendimento-pa-e-inversion-di-hotel-pero-tambe-pa-e-sacrificio-di-pais-aruba%3FItemid%3D101][title=Prome+Minister+Mike+Eman%3A+Mester+wak+bon+ki+tipo+di+operacion+di+hotel+tin+mas+rendimento+pa+e+inversion+di+hotel%2C+pero+tambe+pa+e+sacrificio+di+Pais+Aruba][desc=ORANJESTAD+%E2%80%93+Mirando+tur+loke+pais+Aruba+ta+percura+p%E2%80%99e+na+beneficio+di+un+ambiente+sano+di+inversion+den+industria+turistico%2C+ta+mas+cu+husto+pa+Gobierno+kier+wak+cu+e+balansa+di+rendimento+ta+uno+igual+tanto+pa+e+hoteleronan%2C+como+pa+comunidad+local.+Stakeholders+cu+awo+ta+contra+di+e+regulacion+di+sector+All-Inclusive%2C+mester+tene+na+cuenta+tur+loke+sector+publico+ta+contribui+cu+ne+ya+cu+e+turista+ta+bin+pa+conoce+e+producto+Aruba+y+no+djis+e+hotel+so.+Prome+Minister+Mike+Eman+a+refresca]}
ORANJESTAD – Mirando tur loke pais Aruba ta percura p’e na beneficio di un ambiente sano di inversion den industria turistico, ta mas cu husto pa Gobierno kier wak cu e balansa di rendimento ta uno igual tanto pa e hoteleronan, como pa comunidad local. Stakeholders cu awo ta contra di e regulacion di sector All-Inclusive, mester tene na cuenta tur loke sector publico ta contribui cu ne ya cu e turista ta bin pa conoce e producto Aruba y no djis e hotel so. Prome Minister Mike Eman a refresca memoria pasando dor di e diferente sacrificio y contribucion e pais ta haci den nomber di turismo y pakico ta importante pa su resultadonan ta reparti entre e mercado local tambe.

Pa cuminsa, cada bes cu nos expande nos oferta di acomodacion hotelero, ta ocupa toch un parti grandi di nos naturalesa. Hunto cu ne ta bin e di infrastructura cu Gobierno tin cu inverti den dje. “Nos ta entrega hopi biaha cu dolor na nos curason un otro pida di nos naturalesa di nos beach,” Premier Eman a bisa. “Nos ta corda ainda e ultimo hotel cu a bin, Ritz Carlton y cuanto inkietud tabatin den nos comunidad pa e hecho cu un area asina a wordo destina atrobe pa industria turistico.”

Ademas di naturalesa y e infrastructura cu ta bin na su luga, Gobierno tin bou di su responsabilidad e parti di siguridad. Mas aleu Pais Aruba ta destina mas cu 100 miyon Dollar na mercadeo di Aruba pa aña. E suma aki ta bin directamente for di e presupuesto di e pais y dirigi na Aruba Tourism Authority pa promociona e isla den exterior loke ta traduci den negoshi pa e hotelnan. Gobierno ta haci esaki paso ta compronde cu ora un hotel ta yen tur esnan cu ta envolvi den e mundo turistico tambe ta beneficia; esey no ta e caso si e propiedad ta All-Inclusive.

Premier Mike Eman a declara cu “Nos ta haci sacrificionan grandi pa e industria aki pasobra nos ta mira su balor. 80% di economia di Aruba ta draai riba e industria turistico, pero e mester keda di un concepto cu tin un rendimento pa henter pueblo y no unicamente pa e hotel, e propietario y e accionistanan.” Den e hotel tambe tin trahadonan cu mester di un sistema di enseñansa y di salubridad pa nan y nan famia.

“Tin cu wak hopi bon cua ta tipo di operacion di hotel tin e maximo di rendimento pa e inversion cu bo ta haci y e sacrificio cu bo ta haci pa asina por sostene e pilar economico; pa percura pa e rendimento pa nos comunidad, e salario cu e trahadonan ta haya, e entrada cu esnan cu no ta traha den hotel directamente, pero cu pafo ta depende di e ‘spin off’ di turismo,” asina lider di Gabinete Mike Eman II a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co